1. O ikutlwa jwang ka nnete?

 BATHO ba Jehova ba rata nnete e fumanwang ka Lentsweng la Modimo. Tumelo ya rona e thehilwe ho lona. (Bar. 10:17) Re kgodisehile hore Jehova o thehile phutheho ya Bokreste “e tshehetsang le ho sireletsa nnete.” (1 Tim. 3:15) Hape re thabela ho ikokobelletsa ‘ba re etellang pele’ ha ba re hlalosetsa nnete e tswang ka Bibeleng le ho re fa tataiso e tumellanong le thato ya Modimo.—Baheb. 13:17.

2. Ho latela Jakobo 5:​19, keng e ka re etsahallang ka mora hore re ithute nnete?

² Le ha ho le jwalo, ka mora ho amohela nnete le ho dumela hore re lokela ho latela tataiso e tswang mokgatlong wa Modimo, re ntse re ka kgeloswa. (Bala Jakobo 5:19.) Satane o rata hore re se ke ra tshepa Bibele kapa tataiso eo re e fumanang ka mokgatlong wa Modimo.—Baef. 4:14.

3. Ke hobaneng ha re lokela ho itshwarella nneteng? (Baefese 6:​13, 14)

³ Bala Baefese 6:​13, 14. Haufinyane Diabolose o tla sebedisa mashano a matla ho kgelosa ditjhaba hore di nke lehlakore kgahlanong le Jehova. (Tshen. 16:​13, 14) Re ka lebella hore Satane o tla leka ka matla ho kgelosa batho ba Jehova. (Tshen. 12:9) Ke ka hoo ho leng bohlokwa hore re ikwetlisetse ho mamela nnete le ho tseba phapang pakeng tsa nnete le leshano. (Bar. 6:17; 1 Pet. 1:22) Re lokela ho etsa sena e le hore re pholohe mahlomola a maholo.

4. Re tlo hlahloba eng sehloohong see?

 ⁴ Sehloohong sena re tlo hlahloba makgabane a mabedi ao re a hlokang, e le hore re ka hlokomela nnete e tswang ka Bibeleng le ho amohela tataiso e tswang mokgatlong wa Modimo. Ka mora moo, re tla tshohla dintlha tse tharo tseo re lokelang ho di latela e le hore re ka tswela pele re tshwareletse nneteng.

MAKGABANE AO RE A HLOKANG E LE HORE RE HLOKOMELE NNETE

5. Ho tshaba Jehova ho re thusa jwang ho kgetholla nnete?

⁵ Ho tshaba Jehova. Ho tshaba Jehova ho bolela hore re mo rata haholo hoo re ke keng ra etsa letho ho mo halefisa. Re na le tabatabelo ya ho ithuta ho kgetholla se nepahetseng ho se fosahetseng, le nnete ho leshano, e le hore re ka fumana kamohelo ya Jehova. (Diprov. 2:​3-6; Baheb. 5:14) Le ka mohla ha re a lokela ho dumella boikutlo ba ho tshaba batho hore bo be matla ho feta ho rata Jehova, hobane hangata dintho tse thabisang batho ha di thabise Jehova.

6. Ho tshaba batho ho ile ha etsa hore dikgosana tsa Baiseraele tse leshome di sothe nnete jwang?

⁶ Haeba re ne re ka tshaba batho ho feta Modimo, re ne re tla kgeloswa nneteng. Nahana ka banna ba 12 ba dikgosana ba ileng ba hlwela naha eo Jehova a neng a tshepisitse ho e fa Baiseraele. Ba leshome ba bona ba ile ba tshaba Bakanana ho feta ho rata Jehova. Ba ile ba re ho Baiseraele: “Re ke ke ra kgona ho lwantsha batho bao hobane ba matla ho re feta.” (Num. 13:​27-31) Ho ya ka pono ya motho, Bakanana ba ne ba le matla ho feta Baiseraele. Empa motho ya neng a re Baiseraele ba ke ke ba kgona ho hlola dira tsa bona o ne a sa nahane ka Jehova. Banna bao ba leshome ba ka be ba ile ba tsepamisa mohopolo ho seo Jehova a neng a batla hore Baiseraele ba se etse. Hape ba ka be ba ile ba nahanisisa  ka dintho tseo Jehova a sa tswa ba etsetsa tsona. Seo se ka be se ba thusitse hore ba hlokomele hore matla ao Bakanana ba nang le ona hase letho ha a bapiswa le matla ao Jehova a nang le ona. Ho fapana le dihlwela tseo tse se nang tumelo, Joshua le Kalebe ba ne ba batla kamohelo ya Jehova. Ba ile ba re ho setjhaba: “Haeba re kgahlisa Jehova, o tla re kenya naheng ena mme a re fe yona.”—Num. 14:​6-9.

7. Re lokela ho etsang e le hore re tshabe Jehova haholwanyane? (Sheba setshwantsho.)

⁷ E le hore re tshabe Jehova haholwanyane, re lokela ho nahana ka hore na ke eng e tla mo kgahlisa nako yohle ha re etsa diqeto. (Pes. 16:8) Ha o ntse o bala ditlaleho tsa Bibele, ipotse: ‘Ha ke ne ke le boemong boo, nka be ke ile ka etsa qeto efe?’ Ka mohlala, ipone o mametse dikgosana tseo tse leshome ha di re Baiseraele ba ke ke ba kgona ho hlola Bakanana. Na o ka be o ile wa di kgolwa yaba o tshaba batho kapa lerato leo o ratang Jehova ka lona le takatso ya ho mo thabisa di ka be di bile matla ho feta ho tshaba batho? Setjhaba sohle sa Iseraele se ile sa hloleha ho hlokomela nnete eo Joshua le Kalebe ba neng ba e bua. Ka lebaka leo, Jehova ha a a ka a dumella Baiseraele bao ho kena Naheng e Tshepisitsweng.—Num. 14:​10, 22, 23.

8. Ke tshobotsi efe eo re lokelang ho e hlaolela hona hobaneng?

⁸ Boikokobetso. Jehova o senolela batho ba ikokobeditseng nnete. (Mat. 11:25) Re ile ra ikokobetsa mme ra amohela thuso ya ho ithuta nnete. (Dik. 8:​30, 31) Le ha ho le jwalo, re lokela ho ba hlokolosi hore re se ke ra ikgohomosa. Boikgohomoso bo ka etsa hore re nahane hore maikutlo a rona a nepahetse jwalo ka melaomotheo ya Mangolo le tataiso e tswang mokgatlong wa Jehova.

9. Re ka etsang hore re dule re ikokobeditse?

⁹ E le hore re dule re ikokobeditse, re lokela ho hopola hore na re fokola hakae ha re bapiswa le Jehova. (Pes. 8:​3, 4) Re ka boela ra kopa Jehova hore a re thuse hore re ikokobetse re be re be le moya wa ho batla ho ithuta. Jehova o tla re thusa hore re nke menahano ya hae e hlahang ka Lentsweng la hae le e tswang mokgatlong wa hae e le bohlokwa ho feta menahano ya rona. Ha o ntse o bala Bibele, batla bopaki bo bontshang hore Jehova o rata batho ba ikokobeditseng le hore o hloile boikgohomoso le boikakaso. Haeba o fumana boikarabelo bo eketsehileng bo etsang hore o be le matla a itseng, leka ka matla hore o dule o ikokobeditse.

RE KA TSHWARELLA NNETENG JWANG?

10. Ke bomang bao Jehova a ileng a ba sebedisa ho fa batho ba hae tataiso?

¹⁰ Tswela pele o tshepa tataiso e tswang mokgatlong wa Jehova. Iseraeleng ya boholoholo, Jehova o ile a sebedisa Moshe le Joshua ho fa batho ba hae tataiso. (Josh. 1:​16, 17) Baiseraele ba ne ba dula ba hlohonolofatswa ke Jehova Modimo ha ba nka tataiso eo e tswa ho yena. Dilemo tse makgolo ha morao ha phutheho ya Bokreste e thehwa, Jehova o ile a sebedisa baapostola ba 12 ho fana ka tataiso. (Dik. 8:​14, 15) Ha morao, sehlopha seo se ile sa akareletsa le baholo ba Jerusalema. Ka ho latela tataiso ya banna bao ba tshepahalang, ‘diphutheho di ile tsa nna tsa matlafala tumelong mme tsa hola letsatsi le letsatsi.’ (Dik. 16:​4, 5) Mehleng ya kajeno, le rona re a hlohonolofatswa haeba re latela tataiso eo Jehova a fanang ka yona a sebedisa mokgatlo wa hae. Empa Jehova o ne a ka ikutlwa jwang haeba re ne re ka hana ho ela hloko bao a ba kgethileng ho fana ka tataiso? Re  ka araba potso eo ka ho hlahloba se ileng sa etsahala ha Baiseraele ba ne ba le tseleng e yang Naheng e Tshepisitsweng.

11. Ho ile ha etsahalang ka batho ba sa kang ba hlompha motho eo Modimo a neng a mo kgethile hore a ba etelle pele, e leng Moshe? (Sheba setshwantsho.)

¹¹ Nakong eo Baiseraele ba ntseng ba le leetong le yang Naheng e Tshepisitsweng, banna ba hlaheletseng ba ile ba fetohela Moshe le boemo boo Jehova a mo fileng bona. Ba ile ba re: “Setjhaba sohle [eseng Moshe feela] se a halalela, kaofela ha sona mme Jehova o hara sona.” (Num. 16:​1-3) Le hoja e ne e le nnete hore mahlong a Modimo “setjhaba sohle” se ne se halalela, Jehova o ne a kgethile Moshe hore a etelle setjhaba pele. (Num. 16:28) Ha marabele ao a ne a nyatsa Moshe, ha e le hantle a ne a nyatsa Jehova. A ne a sa nahana ka hore na Jehova o batlang empa a ne a inahanetse feela ka hore na ona a batlang, e leng matla le ho hlahella. Modimo o ile a bolaya baetapele bao ba marabele le bohle ba neng ba dumellana le bona. (Num. 16:​30-35, 41, 49) Mehleng ena re ka kgodiseha hore Jehova ha a kgahlwe ke batho ba sa hlompheng ditokisetso tse entsweng ke mokgatlo wa hae.

12. Ke hobaneng ha re ka dula re tshepa mokgatlo wa Jehova?

¹² Re ka kgona ho dula re tshepa mokgatlo wa Jehova. Haeba ho hlakile hore ho hlokahala hore ho etswe diphetoho tseleng eo re utlwisisang nnete e itseng ya Bibele kapa tseleng eo re sebeletsang Jehova ka yona, ba etellang pele ha ba qeaqee ho etsa diphetoho tse hlokahalang. (Diprov. 4:18) Ba etsa jwalo hobane ba batla ho thabisa Jehova. Ba boetse ba etsa sohle seo ba ka se kgonang ho theha diqeto tsa bona Lentsweng la Modimo, e leng thuto e molemo eo batho bohle ba Jehova ba lokelang ho e mamela.

13. “Thuto e molemo” ke eng, hona re lokela ho etsa eng ka yona?

¹³ “O nke thuto e molemo.” (2 Tim. 1:13) “Thuto e molemo” e bolela dithuto tsa  Bokreste tse fumanwang ka Bibeleng. (Joh. 17:17) Dithuto tsena ke motheo wa ntho e nngwe le e nngwe eo re e dumelang. Mokgatlo wa Jehova o etsa bonnete ba hore dintho tseo re di dumelang di thehilwe thutong eo. Haeba re dumela thuto e molemo, re tla hlohonolofatswa.

14. Bakreste ba bang ba ile ba kgaotsa ho tshwarella ‘thutong e molemo’ jwang?

¹⁴ Ho ka etsahalang haeba re kgaotsa ho theha dintho tseo re di dumelang ‘thutong e molemo’? Nahana ka mohlala ona. Mehleng ya baapostola, ho bonahala hore hara Bakreste ho ile ha eba le mabarebare a reng letsatsi la Jehova le se le fihlile. E ka nna yaba ho ne ho ena le lengolo leo e kang le ngotswe ke moapostola Pauluse le neng le bua mantswe ao. Bakreste ba bang ba Thesalonika ba ile ba dumela mabarebare ao ntle le hore ba hlahlobisise hore na ditaba tseo ke nnete kapa tjhe, yaba ba a di jala. Hoja ba ile ba hopola dintho tseo Pauluse a neng a ba rutile tsona ha a ntse a ena le bona, ba ka be ba sa ka ba thetswa. (2 Bathes. 2:​1-5) Pauluse o ile a eletsa bara ba bo hore ba se ka ba dumela ntho e nngwe le e nngwe eo ba e utlwang. E le hore ba tle ba kgone ho etsa jwalo nakong e tlang, Pauluse o ile a qetella lengolo la hae la bobedi le yang ho Bathesalonika ka mantswe ana: “Nna Pauluse, ke le ngolla tumediso ena ka letsoho la ka. Ona ke mongolo wa ka mme le tla tseba mangolo ohle a ka ka mongolo ona.”—2 Bathes. 3:17.

15. Re ka itshireletsa jwang kgahlanong le mashano a bonahalang eka ke nnete? Fana ka mohlala. (Sheba ditshwantsho.)

¹⁵ Re ka ithuta eng mantsweng ao Pauluse a ileng a a ngolla Bathesalonika? Haeba re utlwa ntho e sa dumellaneng le seo re ithutileng sona ka Bibeleng kapa ha re utlwa mabarebare a makatsang, re lokela ho ba le temoho. Dira tsa rona tsa Soviet Union ya pele, di ile tsa fa bara ba bo rona lengolo leo e neng eka le tswa ntlokgolo. Lengolo leo le ne le kgothaletsa ba bang ba ba bara ba bo rona hore ba iketsetse mokgatlo o mong o ikemetseng.  E ne e eka lengolo leo le tswa ntlokgolo empa bara ba bo rona ba tshepahalang ha ba a ka ba thetswa. Ba ile ba hlokomela hore molaetsa wa lengolo leo o ne o sa dumellane le dintho tseo ba di rutilweng. Mehleng ena, ka dinako tse ding batho ba sa rateng nnete ba sebedisa marangrang ho re ferekanya le ho re arola. Ho ena le hore ‘re dumelle dikelello tsa rona hore di ferekanngwe habonolo,’ re ka itshireletsa ka hore re nahanisise ka hloko hore na dintho tseo re di utlwang kapa tseo re di balang di dumellana le nnete eo re ithutileng yona kapa tjhe.—2 Bathes. 2:2; 1 Joh. 4:1.

16. Ho latela Baroma 16:​17, 18, re lokela ho etsang haeba batho ba bang ba jala ditaba tseo e seng tsa nnete?

¹⁶ Dula o momahane le batho ba tshepahallang Jehova. Modimo o batla hore re mo sebeletse re momahane. Re tla dula re momahane haeba re tshwarella nneteng. Mang kapa mang ya jalang ditaba tseo e seng nnete o baka dikarohano ka phuthehong, ke ka hoo Modimo a re lemosang hore ‘re mo qobe.’ Ho seng jwalo, re ka qala ho kgolwa dintho tseo e seng dinnete mme ra kgaotsa ho tshepahalla Jehova.—Bala Baroma 16:​17, 18.

17. Ke melemo efe eo re tla e fumana haeba re hlokomela nnete mme re itshwarella ka yona?

¹⁷ Haeba re hlokomela nnete mme re itshwarella ka yona, re tla dula re le haufi le Jehova hape tumelo ya rona e tla dula e le matla. (Baef. 4:​15, 16) Re ke ke ra kgeloswa ke Satane ka dithuto tsa hae tsa leshano mme re tla dula re sireletsehile tlasa tlhokomelo ya Jehova nakong ya mahlomola a maholo. Dula o tshwarelletse nneteng, mme ‘Modimo wa kgotso o tla ba le wena.’—Bafil. 4:​8, 9.