1, 2. Ke jwang Jehova a ileng a etsa hore re be karolo ya lelapa la hae, hona hobaneng?

JEHOVA o ile a re mema hore re be karolo ya lelapa la hae. Ka nnete ena ke memo e thabisang. Lelapa lena, le entswe ka batho ba inehetseng ho Modimo le ba nang le tumelo sehlabelong sa thekollo sa mora wa hae. Ka hoo re lelapa le thabileng, ka ha re na le tshepo ya ho phela ka ho sa feleng ebang ke lehodimong kapa Paradeiseng lefatsheng.

² Ka ha Jehova o re rata haholo, o entse bonnete ba hore re ba karolo ya lelapa la hae. Empa o entse sena jwang? Ka hore a tele ntho ya bohlokwa ka ho fetisisa. (Joh. 3:16) Ka hoo re ile ra “rekwa ka theko.” (1 Bakor. 6:20) Jehova o entse hore re be le kamano e haufi le yena ka hore a fane ka thekollo. Ka lebaka leo, re ka kgona ho bitsa motho ya moholo ka ho fetisisa lehodimong le lefatsheng Ntate wa rona. Hape jwalo ka ha re bone sehloohong se fetileng, Jehova ke Ntate ya molemo.

3. Ke dipotso dife tseo re ka nnang ra ipotsa tsona? (Sheba lebokose le reng “ Na Jehova o a Mpona?”)

³ Re ka nna ra ipotsa jwalo ka mongodi e mong wa Bibele ya ileng a re: “Ke tla buseletsang ho Jehova bakeng sa melemo yohle ya hae ho nna?” (Pes. 116:12) Nnete ke hore re ke ke ra lefa Jehova bakeng sa dintho tseo a re etseditseng tsona. Ho ntse ho le jwalo, re susumelletseha ho mo rata hobane le yena o a re rata. Moapostola Johanne yena o ile a re: “Re a rata, hobane o ile a re rata pele.” (1 Joh. 4:19) Jwale ke ka ditsela dife re ka bontshang hore re rata Ntate wa rona ya lehodimong?

4. Ho ya ka Jakobo 4:8, ke hobaneng ha re lokela ho leka ho ba metswalle ya Jehova?

⁴ Jehova o batla re be metswalle ya hae le hore re buisane le yena. (Bala Jakobo 4:8.) O re kgothalletsa hore re ‘phehelle thapelong,’ hobane ka mehla o ipha nako ya ho mamela dithapelo tsa rona. (Bar. 12:12) Ka lehlakoreng le leng, re mo mamela ka hore re bale Lentswe la hae le dingolwa tse thehilweng Bibeleng tse re thusang ho e utlwisisa. Re boetse re mo mamela ka hore re mamele ka hloko dibokeng. Ka ha ha bana ba buisana le batswadi ba bona ka mehla sena se etsa hore ba be haufi le bona, ka tsela e tshwanang ha re buisana le Jehova ka mehla re tla ba metswalle ya hae.

5. Nka ntlafatsa dithapelo tsa ka jwang?

⁵ Nahana ka dithapelo tsa hao. Hopola hore Jehova o batla hore re mo bolelle ka moo re ikutlwang ka teng ha re mo rapela. (Pes. 62:8) Ke ka hoo re lokelang ho ipotsa potso ena: ‘Na ha ke rapela ke bolella Jehova maikutlo aka kapa dithapelo tsa ka di utlwahala eka di ngotswe fatshe kapa ke di tshwere ka hlooho?’ Ha ho pelaelo hore o rata Jehova haholo mme o batla setswalle sa lona se dule se le matla. Ka hoo e le hore setswalle sa lona se dule se le matla, o lokela ho buisana le yena ka mehla. O ka etsa sena ka hore o mo bolelle dintho tseo o sa kgoneng ho di bolella batho ba bang, dintho tse o thabisang le tse o utlwisang bohloko. Ka ho etsa jwalo, kgodiseha hore o tla o thusa.

6. Keng seo re tlamehang ho se etsa e le hore re be metswalle ya Ntate wa rona ya lehodimong?

⁶ E le hore re be metswalle ya Ntate wa rona ya lehodimong, re tlameha ho dula re le batho ba ananelang. Re dumellana le mantswe a mongodi e mong wa Pesaleme ha a ne a re: “O entse dintho tse ngata, Jehova Modimo wa ka, esita le mesebetsi ya hao e hlollang le menahano ya hao ho rona; ha ho le ya mong ya ka bapiswang le wena. Ha ke ne nka batla ho e bolela le ho bua ka yona, e mengata ho feta ka moo nka e phetang.” (Pes. 40:5) Ha re a lokela ho bua feela hore re ananela dintho tseo Jehova a re etsetsang tsona empa re lokela ho bontsha le ka diketso. Sena se tla be se bontsha hore re fapane le batho ba bangata kajeno, ka ha ha ba ananele dintho tseo Modimo a ba etsetsang tsona. Ha e le hantle ntho e nngwe e bontshang hore re phela “matsatsing a ho qetela” ke hore batho ha bana teboho. (2 Tim. 3:1, 2) Ka hoo, ha re batle ho tshwana le bona.

7. Jehova o batla hore re etseng, hona hobaneng?

⁷ Batswadi ba batla hore bana ba bona ebe metswalle e seng ba dule ba lwantshana. Ka tsela e tshwanang Jehova o batla hore bahlanka bohle ba hae ebe metswalle. Ha e le hantle lerato leo re ratanang ka lona le bontsha hore re Bakreste ba nnete. (Joh. 13:35) Re dumellana le mantswe a mongodi e mong wa Pesaleme ha a ne a re: ‘Ho kgahlisa [hakaakang] ha bara ba motho ba dula ha mmoho bonngweng!’ (Pes. 133:1) Ka hoo re bontsha Jehova hore re a mo rata haeba re rata bara le baradibabo rona. (1 Joh. 4:20) Ka nnete ke ho thabisang ho ba karolo ya lelapa la bara le baradibabo rona ba ‘bontshang mosa le qenehelo e bonolo.’​—Baef. 4:32.

8. Ho ya ka 1 Johanne 5:3, lebaka la bohlokwa la hore re mamele Jehova ke lefe?

⁸ Jehova o batla hore bana ba mamele batswadi ba bona mme le rona o batla hore re mo mamele. (Baef. 6:1) Ka ha ke yena ya  re bopileng ebile o bohlale ho feta ntate le ha e le ofe, re lokela ho mo mamela. Le ha hole jwalo, lebaka le ka sehloohong leo re mamelang Jehova ka lona ke hobane re a mo rata. (Bala 1 Johanne 5:3.) Le hoja re ena le mabaka a mangata a hore re mamele Jehova empa ha a re qobelle hore re mo mamele. Ka ha o re file bolokolohi ba ho ikgethela, o a thaba ha re kgetha ho mo mamela.

9, 10. Ke hobaneng ha e le ha bohlokwa hore re tsebe melao ya Modimo le ho e sebedisa bophelong ba rona?

⁹ Batswadi ba batla hore bana ba bona ba bolokehe. Ke ka hoo ba ba behelang melao e ba sireletsang. Ha bana ba mamela melao eo ba bontsha hore ba hlompha le ho tshepa batswadi ba bona. Ka hoo, ke ha bohlokwa le ho feta hore re tsebe le ho sebedisa melao ya Ntate wa rona ya lehodimong. Ka ho etsa jwalo re bontsha Jehova hore re a mo hlompha le ho mo rata ebile sena se re tswela molemo. (Esa. 48:17, 18) Empa batho ba sa mameleng Jehova le melao ya hae ba ba le ditlamorao tse bohloko.​—Bagal. 6:7, 8.

¹⁰ Ha re phela ka tsela e thabisang Jehova, sena se tla re sireletsa dinthong tse ka re utlwisang bohloko le tse ka senyang kamano ya rona le yena. Jehova o tseba se molemo bakeng sa rona. Aurora ya dulang United States o re: “Ke a tseba hore ha re dula re mamela Jehova re tla thabela bophelo.” Sena ke nnete. O fumane melemo efe ka ho mamela melao ya Jehova?

11. Thapelo e re thusa hore re etseng?

 ¹¹ Thapelo e re thusa hore re mamele le ha ka dinako tse ding ho le thata. Ka dinako tse ding ho ba thata hore re mamele Jehova hobane re baetsadibe empa re tlameha ho leka ka matla hore re mo mamele. Mongodi e mong wa Pesaleme o ile a kopa Modimo ka tiyo a re: “Etsa hore ke utlwisise, e le hore nka boloka molao wa hao. Le hore nka o boloka ka pelo yohle.” (Pes. 119:34) Moradiwabo rona wa pulamadiboho ya bitswang Denise o re: “Ha ke utlwa ho le thata hore ke mamele o mong wa melao ya Jehova, ke rapella hore a mphe matla a ho etsa se nepahetseng.” Re ka kgodiseha hore Jehova o tla araba dithapelo tse jwalo.​—Luka 11:9-13.

12. Ho ya ka Baefese 5:1, keng seo re lokelang ho se etsa?

¹² Bala Baefese 5:1. Ka ha re “bana ba ratwang” ba Jehova re etsa sohle seo re ka se kgonang ho mo etsisa. Re tla be re mo etsisa haeba re le batho ba lerato, ba mosa le ba tshwarelang batho ba bang. Ha batho ba sa tsebeng ka Jehova ba bona boitshwaro ba rona bo botle, sena se tla etsa hore ba batle ho ithuta ka yena. (1 Pet. 2:12) Batswadi ba Bakreste ba lokela ho tshwara bana ba bona ka tsela eo Jehova a re tshwarang ka yona. Ha batswadi ba etsa sena, bana ba ka nna ba batla ho ba metswalle ya Ntate wa rona ya lehodimong.

13. Re lokela ho etsang e le hore re be sebete?

 ¹³ Hangata bana ba motlotlo ka bontate ba bona mme ba thabela ho bua ka bona. Ka tsela e tshwanang, le rona re motlotlo ka Ntate wa rona ya lehodimong Jehova mme re batla batho ba bang hore ba mo tsebe. Re ikutlwa jwalo ka Morena Davida, ha ne a re: “[ke] tla ithorisa ka Jehova.” (Pes. 34:2) Empa hothweng ha re le dihlong ho bua ka Jehova? Re ka ba sebete jwang? Re ba sebete ha re nahana ka moo Jehova a tla thabang ka teng ha re bua ka yena le ka moo batho ba bang ba tla fumanang molemo ha ba ithuta ka yena. Jehova o tla re fa sebete seo re se hlokang. Ka hoo jwalo ka ha Jehova a ile a thusa Bakreste ba mehleng ya Bibele hore ba be sebete, le rona o tla re thusa.​—1 Bathes. 2:2.

14. Re na le mabaka afe a bohlokwa ao re lokelang ho bolela ditaba tse molemo ka ona?

¹⁴ Jehova ha a na kgethollo, ka hoo o a thaba ha a bona re bontsha batho ba bang lerato ho sa tsotellehe hore ba tswa hokae. (Lik 10:34, 35) Tsela e nngwe eo re ka bontshang hore re rata batho bana ka yona, ke ka ho ba bolella ditaba tse molemo. (Mat. 28:19, 20) Mosebetsi wa boboledi o ka tswela batho molemo jwang? Batho ba mamelang molaetsa wa rona ba fetola bophelo ba bona, hape ba ka ba le tshepo ya ho phela ka ho sa feleng lefatsheng.​—1 Tim. 4:16

15, 16. Re na le mabaka afe a ho thaba?

¹⁵ Jehova ke Modimo ya lerato, ka hoo o batla lelapa la hae le thabe. (Esa. 65:14) Re na le mabaka a mangata a hore re thabe le hoja re kopana le mathata. Ka mohlala, re kgodisehile hore Ntate wa rona ya lehodimong o re rata haholo. Hape re na le tsebo e nepahetseng ya Bibele. (Jer. 15:16) Re boetse re karolo ya lelapa le ikgethang le nang le batho ba ratang Jehova, melao ya hae ebile ba ratana.​—Pes. 106:4, 5.

¹⁶ Re dula re thabile hobane re kgodisehile hore bophelo e tla ba bo thabisang le ho feta nakong e tlang. Re a tseba hore haufinyana, Jehova o tlo fedisa batho bohle ba kgopo le hore tlasa Mmuso wa hae lefatshe lohle e tla ba Paradeise. Re boetse re na le tshepo ya hore batho bohle ba hlokahetseng ba tla tsoswa mme ba boela ba phele le rona. (Joh 5:28, 29) Ena e tla ba ntho e thabisang. Ha bohlokwa le ho feta, re kgodisehile hore haufinyane motho e mong le e mong ya lehodimong le lefatsheng o tla fa Ntate wa rona ya lerato tlhompho, thoriso le borapedi bo mo tshwanelang.