1. Hangata Jehova o araba dithapelo tsa bahlanka ba hae jwang?

 JEHOVA a ka o sebedisa ho araba thapelo ya motho e mong. A ka o sebedisa ebang o moholo, o mohlanka ya sebeletsang, o pulamadiboho kapa o mohweletsi. A ka boela a o sebedisa ebang o motjha, o se o hodile, o mora kapa moradiwabo rona. Ha motho ya ratang Jehova a kopa thuso ho yena, hangata o sebedisa baholo le bahlanka ba bang ba hae ho mo ‘tshedisa haholo.’ (Bakol. 4:​11) Re thabela ho sebeletsa Jehova ka tsela ena le ho thusa Bakrestemmoho. Re ka kgona ho thusa le ho kgothatsa Bakrestemmoho le rona ha ho ena le mafu a sewa, dikoduwa kapa ba hloriswa.

2. Ke hobaneng ha ho ka ba thata ho thusa ba bang ha ho ena le lefu la sewa?

² Ho ka ba thata hore re thusane ha ho ena le lefu la sewa. Ka mohlala, ho ka ba kotsi ho tjhakela metswalle ya rona le hoja re batla ho etsa jwalo. Re ka nna ra batla ho mema batho ba sokolang ebe ha re kgone ka lebaka la sewa. Re ka batla ho thusa ba bang empa ho ka ba thata haeba lelapa la rona le lona le ena le mathata. Le ha ho le jwalo, re batla ho thusa Bakrestemmoho le rona mme Jehova o a thaba ha re etsa sohle seo re ka se kgonang ho ba thusa. (Diprov. 3:​27; 19:​17) Re ka ba thusa jwang?

3. Re ithutang mohlaleng wa baholo ba phuthehong ya bo Moradiwabo rona Desi? (Jeremia 23:⁠4)

³ Dintho tseo baholo ba ka di etsang. Haeba o moholo, tseba dinku hantle. (Bala Jeremia 23:4.) Moradiwabo rona Desi eo re buileng ka yena sehloohong se fetileng o re: “Baholo ba sehlopheng sa rona sa tshimo ba ne ba dula ba sebetsa le rona tshimong mme ba ne ba eba teng ha re ithabisa.” b Sena se ile sa etsa  hore ho be bonolo hore ba thuse Moradiwabo rona Desi ka mora hore ba bang ba lelapa labo ba hlokahale ka lebaka la sewa sa COVID-19.

4. Ke hobaneng ha baholo ba kgonne ho thusa Moradiwabo rona Desi, hona baholo ba ka ithutang?

⁴ Moradiwabo rona Desi o re: “Ho ne ho le bonolo hore ke bolelle baholo hore na ke ikutlwa jwang le dintho tse ntshwenyang hobane e ne e le metswalle ya ka.” Baholo ba ka ithutang? Hlokomelang Bakrestemmoho pele ba hlahelwa ke mathata. Eba motswalle wa bona. Haeba o sa kgone ho ba etela ka lebaka la lefu la sewa, batla ditsela tse ding tsa ho buisana le bona. Moradiwabo rona Desi o re: “Ka dinako tse ding, baholo ba fapaneng ba ne ba founa kapa ba nthomella melaetsa ka letsatsi le le leng. Ditemana tseo ba ileng ba mpalla tsona di ile tsa nkama maikutlo haholo le hoja e le ditemana tseo ke di tsebang.”

5. Baholo ba ka tseba jwang hore na Bakrestemmoho le bona ba hloka eng, hona ba ka ba thusa jwang?

⁵ Tsela e nngwe eo o ka tsebang hore na Bakrestemmoho le wena ba hloka eng ke ka ho ba botsa dipotso ka bohlale. (Diprov. 20:⁠5) Na ba na le dijo tse lekaneng, meriana le dintho tse ding tseo ba di hlokang? Na ba ka nna ba lahlehelwa ke mosebetsi kapa sebaka seo ba dulang ho sona? Na ba hloka ho thuswa ho ngodisa hore mmuso o ba thuse? Moradiwabo rona Desi o ile a thuswa ke Bakrestemmoho le yena ho fumana dintho tseo a di hlokang empa ntho e ileng ya mo thusa haholo ha a le mathateng, ke lerato leo baholo ba ileng ba mo bontsha lona le ho mo kgothatsa ba sebedisa Bibele. O re: “Baholo ba ile ba nthapella. Le hoja ke sa hopole hantle hore na ba ile ba reng empa ke hopola hantle tsela eo ke ileng ka ikutlwa ka yona. Ke tsela eo Jehova a neng a re ho nna ka yona, ‘Ha o mong.’”​—Esa. 41:​10, 13.

6. Bakrestemmoho ba ka thusana jwang? (Sheba setshwantsho.)

⁶ Dintho tseo ba bang ba ka di etsang. Le hoja baholo ba ikarabella ka ho hlokomela Bakrestemmoho, Jehova o batla hore kaofela ha rona re kgothatse le ho thusa Bakrestemmoho le rona. (Bagal. 6:​10) Ntho le ha e le efe eo re ka e etsang ho thusa motho ya kulang, ho sa tsotellehe hore na e nyenyane hakae e ka mo kgothatsa haholo. Ngwana a ka kgothatsa morabo rona ka ho mo ngolla karete kapa ho mo toroyela setshwantsho. Motjha a ka thusa moradiwabo rona ka ho yo mo rekela dintho tseo a  di hlokang. Ba bang ba ka phehela motho ya kulang dijo ebe ba mo isetsa tsona. Batho bohle ka phuthehong ba hloka ho kgothatswa ha ho ena le sewa. Ka mora diboka, mohlomong re ka qoqa le Bakrestemmoho ha re le Holong ya Mmuso kapa ka marangrang. Baholo le bona ba hloka ho kgothatswa. Bara le baradibabo rona ba bang ba rometse baholo ba sebetsang ka thata nakong ya sewa dikarete tse nang le melaetsa e ba lebohang. Ho a thabisa ha re ‘tswela pele ho kgothatsana le ho matlafatsana.’​—1 Bathes. 5:11.

7. Ke mathata afe a ka hlahelang batho ka mora koduwa?

⁷ Koduwa e ka etsa hore bophelo ba motho bo fetohe ka ho panya ha leihlo. Batho ba ka lahlehelwa ke dintho tsa bona, matlo a bona kapa ba hlokahallwa. Dintho tsena tse utlwisang bohloko di etsahalla le Bakrestemmoho le rona. Re ka ba thusa jwang?

8. Baholo le dihlooho tsa malapa ba ka etsang pele koduwa e hlaha?

⁸ Dintho tseo baholo ba ka di etsang. Baholo, thusang Bakrestemmoho hore ba itokisetse koduwa pele e hlaha. Etsang bonnete ba hore batho bohle ka phuthehong ba a tseba hore na ba lokela ho etsang e le hore ba dule ba sireletsehile le hore ba founela baholo nakong ya koduwa. Moradiwabo rona Margaret eo re buileng ka yena sehloohong se fetileng o re: “Puong ya ditlhoko tsa phutheho, baholo ba ile ba fana ka puo e neng e bontsha hore ho ntse ho tla ba le mollo sebakeng seo re dulang ho sona. Ba ile ba re re lokela ho tswa hanghang haeba ba boholong pusong ba ka re laela hore re etse jwalo kapa haeba ho ka ba kotsi.” Dintlha tseo baholo ba ileng ba di bolella phutheho di ne di le nakong hobane ho ile ha eba le mollo o kotsi dibeke tse hlano ka mora moo. Nakong ya borapedi ba lelapa, dihlooho tsa malapa di ka bua ka hore na motho e mong le e mong o lokela ho etsang ha koduwa e hlaha. Haeba wena le bana ba hao le itokisitse, le tla kgona ho kgoba matshwafo ha koduwa e ka hlaha.

9. Baholo ba ka etsang pele ho koduwa le ka mora yona?

⁹ Haeba o molebedi wa sehlopha sa tshimo, etsa bonnete ba hore o na le dinomoro le diaterese tsa batho ba sehlopheng sa hao pele koduwa e hlaha. Di ngole fatshe mme o dule o di sheba hore na di nakong. Seo se tla o thusa hore o kgone ho fumana mohweletsi e mong le e mong ho bona hore na o hloka eng nakong ya koduwa. Bolella mohokahanyi wa sehlopha sa baholo hanghang hore na bahweletsi ba hloka eng mme yena o tla tsebisa molebedi wa potoloho. Ha bara bana ba bo rona ba sebetsa ha mmoho, ba ka kgona ho thusa bahweletsi. Ka mora mollo oo o bileng teng, molebedi wa potoloho ya bo Moradiwabo rona Margaret o ile a nka dihora tse 36 a sa robale, a thusa baholo ba neng ba leka ho founela le ho hlokomela bara le baradibabo rona ba 450 ba ileng ba tlameha ho tswa matlong a bona. (2 Bakor. 11:​27) Ka hoo, bara le baradibabo rona ba ile ba fumana sebaka seo ba ka dulang ho sona.

10. Ke hobaneng ha baholo ba nka ho hlokomela Bakrestemmoho le bona e le ntho ya bohlokwa? (Johanne 21:⁠15)

¹⁰ Baholo ba lokela ho kgothatsa Bakrestemmoho ka Bibele le ho thusa ba tshwenyehileng. (1 Pet. 5:2) Nakong ya koduwa, baholo ba lokela ho etsa bonnete ba hore bara le baradibabo rona ba sireletsehile le hore ba na le dijo, diaparo le moo ba dulang teng. Le ka mora dikgwedi tse ngata ka mora koduwa, Bakrestemmoho ba ntse ba hloka ho kgothatswa ka Bibele le ho tshediswa. (Bala Johanne 21:​15.) Morabo rona Harold eo e leng setho sa Komiti ya Lekala, ya kopaneng le bara le baradibabo rona ba bangata ba hlahetsweng ke dikoduwa o  re: “Ho nka nako hore ba be hantle. Ba ka nna ba lebala ka dintho tse ba lahlehetseng empa ho ka ba thata hore ba lebale moratuwa wa bona ya hlokahetseng, ntho ya bohlokwa eo ba neng ba ena le yona le boemo bo kotsi boo ba neng ba le ho bona. Ha ba hopola dintho tsena, di ka boela tsa ba utlwisa bohloko. Taba ena ha e bolele hore ha ba na tumelo empa e bolela hore le bona ba na le maikutlo jwalo ka nna le wena.”

11. Malapa a ka nna a dula a hloka ho thuswa ka eng?

¹¹ Baholo ba sebedisa keletso e reng “llang le ba llang.” (Bar. 12:​15) Baholo ba lokela ho kgodisa batho ba hlahetsweng ke koduwa hore Jehova le Bakrestemmoho ba ntse ba ba rata. Ba lokela ho thusa malapa hore a tswele pele ho rapela, ho ithuta Bibele, ho ya dibokeng le ho etsa mosebetsi wa ho ruta batho Bibele. Baholo ba boetse ba lokela ho kgothaletsa batswadi hore ba thuse bana ba bona ho nahana haholo ka dintho tseo koduwa e ke keng ya di senya. Batswadi, hopotsang bana ba lona hore Jehova e tla dula e le Motswalle wa bona ebile o tla dula a ba thusa. Hape le ba hlalosetse hore ba tla dula e le karolo ya lelapa la Jehova le leholo la Bakrestemmoho ba dulang ba ikemiseditse ho ba thusa ka dinako tsohle.​—1 Pet. 2:17.

12. Ba bang ba ka thusetsa jwang nakong ya koduwa? (Sheba setshwantsho.)

¹² Dintho tseo ba bang ba ka di etsang. Haeba ho eba le koduwa pela moo o dulang teng, botsa baholo hore na o ka thusetsa jwang. Mohlomong o ka amohela Bakrestemmoho ba lahlehetsweng ke matlo lelapeng la hao kapa wa amohela batho ba thusang ha ho ena le dikoduwa. O ka isetsa bahweletsi dijo le dintho tse ding tseo ba di hlokang. O ntse o ka kgona ho thusa le ha ho hlahile koduwa sebakeng se hole. Jwang? Ka ho rapella batho ba anngweng ke koduwa. (2 Bakor. 1:​8-11) O ka kgona ho thusetsa mosebetsing wa diphallelo ka ho fana ka monehelo mosebetsing wa lefatshe lohle. (2 Bakor. 8:​2-5) Haeba o kgona ho ya sebakeng seo koduwa e hlahileng ho sona, botsa baholo hore na o ka thusetsa jwang. Haeba o mengwa hore o yo thusetsa, o tla fumana kwetliso e le hore o tle o kgone ho thusa moo ho hlokehang teng.

13. Bakrestemmoho le rona ba tobana le mathata afe dinaheng tseo mosebetsi wa rona o thibetsweng?

¹³ Dinaheng tseo mosebetsi wa rona o thibetsweng, ho hloriswa ho etsa hore bophelo bo  be thata le ho feta bakeng sa Bakrestemmoho le rona. Le bona ba ba le mathata a ditjhelete, ba a kula ebile ba hlokahallwa ke baratuwa ba bona. Empa ka lebaka la hore mosebetsi wa rona o thibetswe, ho ka etsahala hore ebe baholo ha ba kgone ho ba etela kapa ho bua le bona e le hore ba ba kgothatse. Ke yona ntho e ileng ya etsahalla Morabo rona Andrei eo re buileng ka yena sehloohong se fetileng. Moradiwabo rona e mong ya sehlopheng sa hae sa tshimo o ne a ena le mathata a ditjhelete. Hape o ile a hlahelwa ke kotsi ya koloi. O ne a lokela ho etsa diopereishene tse mmalwa. Ka hoo, o ne a sa kgone ho sebetsa. Ho sa tsotellehe dithibelo tseo le sewa, Bakrestemmoho le yena ba ile ba etsa seo ba ka se kgonang ho mo thusa mme Jehova o ne a bona se etsahalang.

14. Baholo ba ka beha mohlala jwang tabeng ya ho itshetleha ka Jehova?

¹⁴ Dintho tseo baholo ba ka di etsang. Morabo rona Andrei o ile a rapela mme a etsa seo a ka se kgonang ho thusa moradi eo wabo rona. Jehova o ile a mo thusa jwang? O ile a susumetsa Bakrestemmoho le yena ba neng ba ena le bolokolohi ba ho etela ba bang hore ba mo thuse. Ba bang ba ne ba isa moradiwabo rona ngakeng. Ba bang bona ba mo thusa ka ho mo fa tjhelete. Jehova o ile a ba susumetsa hore ba thuse moradi eo wabo rona mme o ile a hlohonolofatsa boiteko ba bona. (Baheb. 13:​16) Baholo, ha mosebetsi wa rona o thibetswe kopang ba bang hore ba le thuse. (Jer. 36:​5, 6) Ntho ya bohlokwa ka ho fetisisa ke hore le itshetlehe ka Jehova. A ka etsa hore o thuse Bakrestemmoho ka dintho tseo ba di hlokang.

15. Ke jwang re ka dulang re ena le kgotso le Bakrestemmoho le hoja re hloriswa?

¹⁵ Dintho tseo ba bang ba ka di etsang. Ha mosebetsi wa rona o thibetswe, re ka nna ra lokela ho kopana re le dihlopha tse nyenyane. Ka hoo, ke ha bohlokwa hore re dule re ena le kgotso le ba bang. Lwantshang Satane eseng bana ba bo lona. Iphapanyetseng diphoso tsa ba bang empa ha ho hlaha bothata le bo lokise kapele. (Diprov. 19:​11; Baef. 4:​26) Ikemisetseng ho thusana. (Tite 3:​14) Tsela eo ba bang ba ileng ba thusa moradiwabo rona eo re buileng ka yena dirapeng tse fetileng ka yona, e ile ya thusa bohle sehlopheng sa bona sa tshimo. Ba ile ba momahana jwalo ka lelapa.​—Pes. 133:1.

16. Ho ya ka Bakolose 4:​3, 18, re ka thusa Bakrestemmoho le rona ba hloriswang jwang?

¹⁶ Bakrestemmoho le rona ba bangata ba tswela pele ho sebeletsa Jehova le hoja mmuso  o thibetse mosebetsi wa rona dinaheng tseo ba dulang ho tsona. Ba bang ba isitswe diteronkong ka lebaka la ho emela tumelo ya bona. Re ka rapella bona le ba malapa a bona. Re ka boela ra rapella bana ba bo rona ba behang bophelo ba bona kotsing e le hore ba thuse ba diteronkong ka ho ba matlafatsa tumelo, ho ba thusa ka dintho tseo ba di hlokang le ka ho ba emela makgotleng a dinyewe. c (Bala Bakolose 4:​3, 18.) Le ka mohla a re se keng ra lebala hore ho rapella Bakrestemmoho le rona bana ho ka ba thusa haholo.​—2 Bathes. 3:​1, 2; 1 Tim. 2:​1, 2.

17. O ka itokisetsa ho hloriswa jwang hona jwale?

¹⁷ Wena le lelapa la hao le ka itokisa hona jwale bakeng sa ho hloriswa. (Dik. 14:​22) Qobang ho nahana ka dintho tsohle tse bohloko tse ka etsahalang. Ho ena le hoo, matlafatsang setswalle sa lona le Jehova mme le thuse le bana ba lona ho etsa jwalo. Haeba ka dinako tse ding o ikutlwa o tshwenyehile, bolella Jehova dintho tsohle tse ka pelong ya hao. (Pes. 62:​7, 8) Buisanang le le lelapa ka mabaka ohle a etsang hore le mo tshepe. d Ho itokisetsa koduwa le ho tshepa Jehova ho tla thusa bana ba hao hore ba be sebete mme ba be le kgotso.

18. Re lebeletse eng nakong e tlang?

¹⁸ Kgotso eo Modimo a re fang yona e etsa hore re ikutlwe re sireletsehile. (Bafil. 4:​6, 7) Jehova o sebedisa kgotso ena ho etsa hore re kgobe matshwafo le hoja re hlahelwa ke mafu a sewa, dikoduwa ebile re hloriswa. O sebedisa baholo hore ba re hlokomele. Hape o fa e mong le e mong wa rona monyetla wa ho thusa ba bang. Kgotso eo re nang le yona hona jwale e tla re thusa hore re mamelle diteko tse kgolo tse tlang ha mmoho le “mahlomola a maholo.” (Mat. 24:​21) Ka nako ya mahlomola a maholo, re tla lokela ho lwanela ho dula re ena le kgotso mme re thuse ba bang ho etsa se tshwanang. Ka mora ona, ha re sa tla ba le mathata ao re tobanang le ona hona jwale. Qetellong, re tla fumana seo Jehova esale a re batlela sona e leng bophelo bo phethahetseng le kgotso ya nnete.​—Esa. 26:​3, 4.