SEHLOOHO SE ITHUTWANG SA 16
PINA YA 87 Tloong le Kgathollwe
Ho ba Metswalle e Haufi le Bakrestemmoho ho re Tswela Molemo
“Ho hotle ebile ho monate ha bana ba motho ba dutse ha mmoho ba momahane.”—PES. 133:1.
NTLHAKGOLO
Ditlhahiso tsa ka moo re ka bang metswalle e haufi le Bakrestemmoho le rona ka teng le hore na Jehova o re hlohonolofatsa jwang ha re eba metswalle le bona.
1, 2. E nngwe ya dintho tseo Jehova a di nkang e le tsa bohlokwa haholo ke efe, hona o batla hore re etse eng?
TSELA eo re tshwarang batho ba bang ka yona, ke e nngwe ya dintho tseo Jehova a di nkang e le tsa bohlokwa haholo. Jesu o ile a ruta hore re lokela ho rata baahisani ba rona jwalo ka ha re ithata. (Mat. 22:37-39) Seo se akarelletsa ho ba mosa esita le ho batho ba sa dumeleng seo re se dumelang. Ha re ba mosa jwalo, re etsisa Jehova Modimo, ya ‘tjhabisetsang batho ba kgopo le ba lokileng letsatsi la hae le ho nesetsa batho ba lokileng le ba sa lokang pula ya hae.’—Mat. 5:45.
2 Le hoja Jehova a rata batho kaofela, o rata haholoholo batho ba etsang dintho tse nepahetseng. (Joh. 14:21) O batla hore re mo etsise. O re kgothalletsa hore re “ratane haholo” le ho ‘ratana ka matla.’ (1 Pet. 4:8; Bar. 12:10) Lerato lena le tshwana le leo re ratang batho bao re amanang le bona kapa motswalle wa hlooho ya kgomo ka lona.
3. Ke eng eo re lokelang ho e hopola ka lerato?
3 Jwalo ka semela se hlokang ho nosetswa e le hore se hole, re hloka ho sebetsa ka thata e le hore lerato la rona ho batho ba bang le hole. Moapostola Pauluse o ile a eletsa Bakreste a re: “Le dule le ratana jwalo ka bana ba motho.” (Baheb. 13:1) Jehova o batla hore re tswele pele ho hlaolela ho rata batho ba bang. Sehlooho sena se tla re bontsha hore na ke hobaneng ha re lokela ho ba metswalle e haufiufi le Bakrestemmoho le rona le hore na re ka tswela pele ho etsa seo jwang.
KE HOBANENG HA RE LOKELA HO BA METSWALLE E HAUFIUFI LE BA BANG?
4. Jwalo ka ha ho hlalositswe ho Pesaleme ya 133:1, ke jwang re ka tswelang pele ho ananela bonngwe boo re nang le bona? (Sheba ditshwantsho.)
4 Bala Pesaleme ya 133:1. Re dumellana le mantswe a mopesaleme a reng “ho hotle” ebile “ho monate” ho ba metswalle ya nnete le batho ba ratang Jehova. Empa feela jwalo ka ha motho a ka se nkele hloohong sefate se seholo seo a se bonang letsatsi le leng le le leng, le rona re ka nna ra se ananele botle ba bonngwe ba Bokreste. Re dula re bona bara le baradi ba bo rona, mohlomong ka makgetlo a mmalwa bekeng. Re ka etsang e le hore re dule re ba ananela? Re ka ipha nako ya ho nahana ka hore na e mong le e mong wa bona o bohlokwa hakae ka phuthehong le ho rona. Seo se tla etsa hore re ba rate le ho feta.
Le ka mohla, o se ke wa hlokomoloha botle ba bonngwe ba Bokreste (Sheba serapa sa 4)
5. Tsela eo re ratanang ka yona e ka ama batho ba bang jwang?
5 Batho ba bang ba qalang ho tla dibokeng, ba tsota lerato leo re ratanang ka lona. Ka lebaka lona leo feela, ba ka etsa qeto ya hore ba fumane nnete. Jesu o ile a re: “Haeba le ratana, bohle ba tla tseba hore le barutuwa ba ka.” (Joh. 13:35) Nahana ka phihlelo ya Chaithra, moithuti wa univesithi ya neng a ithuta Bibele le Dipaki Tsa Jehova. O ile a amohela memo ya ho ya kopanong ya setereke. Ka letsatsi la pele feela, o ile a bolella motho ya neng a mo ruta Bibele, a re: “Ha ho le ka mohla nkileng ka hakwa ke batswadi ba ka. Empa kopanong ya lona, ke hakilwe ka makgetlo a 52 ka letsatsi le le leng feela! Ke ile ka utlwa hore Jehova o a nthata a sebedisa lelapa lena la moya. Ke batla ho ba karolo ya lelapa leo.” Chaithra o ile a hatela pele a ba a kolobetswa ka 2024. Ka nnete ha batho ba ntseng ba ithuta Bibele ba bona mesebetsi ya rona e metle, ho akarelletsa le tsela eo re ratanang ka yona, hangata ba susumelletseha ho sebeletsa Jehova.—Mat. 5:16.
6. Ho ba metswalle e haufi ya bara le baradi ba bo rona ho ka re sireletsa jwang?
6 Ho ba metswalle e haufi le bara le baradi ba bo rona ho ka re sireletsa. Pauluse o ile a re ho Bakrestemmoho le yena: “Le kgothatsane letsatsi le letsatsi . . . e le hore ho se ke ha e-ba le eo pelo ya hae e thatafalang ka lebaka la ho thetswa ke sebe.” (Baheb. 3:13) Haeba re nyahama hoo maoto a rona a qalellang ho kgeloha tseleng ya ho loka, Jehova a ka susumetsa Mokrestemmoho ya hlokomelang taba eo hore a re thuse. (Pes. 73:2, 17, 23) Ka nnete thuso e jwalo e re tswela molemo.
7. Lerato le amana jwang le bonngwe? (Bakolose 3:13, 14)
7 Re karolo ya sehlopha sa batho se sebetsang ka thata ho bontshana lerato. Ka hoo, re fumana ditlhohonolofatso tse ngata. (1 Joh. 4:11) Ka mohlala, lerato le re susumelletsa hore re “tswele pele ho mamellana,” mme seo se etsa hore re dule re le bonngweng. (Bala Bakolose 3:13, 14; Baef. 4:2-6) Ke ka hoo dibokeng ho leng monate o se nang thaka.
HLOMPHANANG
8. Jehova o re thusa jwang hore re kgone ho momahana?
8 Bonngwe boo re nang le bona ke mohlolo ona wa haesale. Jehova o etsa hore re kgone ho ba le bonngwe bona ho sa tsotellehe ho se phethahale ha rona. (1 Bakor. 12:25) Bibele e re ‘Modimo ke yena ya re rutang hore re ratane.’ (1 Bathes. 4:9) Ka mantswe a mang, Jehova o sebedisa Mangolo ho re bolella hantle seo re lokelang ho se etsa e le hore re be metswalle e haufi le ba bang. Re ka rutwa ke Modimo ka hore re hlahlobisise dithuto tsa hae le ho di kenya tshebetsong. (Baheb. 4:12; Jak. 1:25) Eo ke yona ntho eo Dipaki Tsa Jehova di lekang ka thata ho e etsa.
9. Re ithuta eng ho Baroma 12:9-13 mabapi le ho bontsha hore o hlompha batho ba bang?
9 Lentswe la Modimo le re ruta eng ka ho ba metswalle e haufiufi le ba bang? Nahana ka seo Pauluse a ileng a se bua ka ntlha ena ho Baroma 12:9-13. (E bale.) Hlokomela mantswe a reng “eba wa pele wa ho bontsha hore o hlompha batho ba bang.” Mantswe aa a bolelang? A bolela hore re lokela ho nka kgato ya hore re ‘ratane ka matla’ ka hore re tshwarelane, re be le kamohelo ya baeti, re itlwaetse ho fana le ho etsa dintho tse ding. (Baef. 4:32) Ha o a lokela ho emela mora kapa moradi weno hore ebe yena ya qalang pele ho etsa setswalle le wena. O ka ‘ba wa pele’ wa ho etsa jwalo mme o tla utlwisisa seo Jesu a ileng a se bua, ha a re: “Ho fana ho thabisa haholo ho feta ho fuwa.”—Dik. 20:35.
10. Re ka sebetsa ka thata jwang ‘ho bontsha hore re hlompha batho ba bang’? (Sheba setshwantsho.)
10 Ho a thahasellisa ho bona hore hang ka mora hore Pauluse a re bolelle hore re be ba pele ba ho bontsha hore re hlompha batho ba bang, o re ‘re se ke ra ba botswa empa re sebetse ka thata.’ Motho ya sebetsang ka thata o a tjheseha ebile o a ikitlaetsa. Ha a fuwe mosebetsi, o o etsa ka mafolofolo. Diproverbia 3:27, 28 e re: “Fana ka se molemo ho ba hlokang, ha ho le matleng a hao ho ba thusa.” Ka hoo, ha re bona motho ya hlokang, re etsa sohle seo re ka se kgonang ho mo thusa. Ha re diehe ho mo thusa kapa hona ho nahana hore ho na le motho e mong ya tla mo thusa.—1 Joh. 3:17, 18.
Re lokela ho nka bohato ba ho thusa bara le baradi ba bo rona ba hlokang (Sheba serapa sa 10)
11. Ke eng e ka re thusang hore re be metswalle e haufiufi le ba bang?
11 Tsela e nngwe eo re ka bontshang hore re hlompha batho ba bang ke ka hore re potlakele ho ba tshwarela ha ba re foseditse. Baefese 4:26 e re: “Letsatsi le se ke la dikela le ntse le halefile.” Hobaneng? Temana ya 27 e re ho etsa jwalo, ho tla “fa Diabolose monyetla.” Ka Lentsweng la hae, Jehova o re bolella ka makgetlokgetlo hore re tshwarelane. Bakolose 3:13 e re kgothalletsa hore re “tswele pele . . . ho tshwarelana . . . ka pelo yohle.” Ntho e nngwe ya bohlokwa e re thusang hore re be metswalle e haufiufi le ba bang ke ho hlokomoloha diphoso tsa bona le ho ba tshwarela. Ha re etsa jwalo, re tla be re etsa hore ‘re dule re momahane ka hore re be le kgotso’ ‘ka ha re kopantswe ke moya o halalelang.’ (Baef. 4:3) Ka mantswe a bonolo, ho tshwarela ba bang ho tlatsetsa ka ho toba bonngweng le kgotsong eo re nang le yona.
12. Jehova o re thusa jwang hore re be batho ba tshwarelang?
12 Ke nnete hore ho ka ba thata ho tshwarela batho ba re utlwisitseng bohloko. Le ha ho le jwalo, re ka kgona ka thuso ya moya wa Modimo. Ka mora hore Mangolo a re kgothalletse hore re ‘ratane ka matla’ le hore re “sebetse ka thata”, a ile a re: “Dumellang moya o halalelang hore o etse hore le be mafolofolo.” (Baroma 12:11) Ka hoo, moya wa Modimo o ka re thusa hore re bontshe ba bang lerato le matla le ho ba tshwarela ka pelo yohle. Ke ka hoo re kopang Jehova ka tieo hore a re thuse.—Luka 11:13.
“HO SE KE HA EBA LE DIKAROHANO HARA LONA”
13. Ke eng e ka bakang dikarohano hara rona?
13 Phutheho e entswe ka “batho ba mefuta yohle” ba hodisitsweng ka ditsela tse sa tshwaneng. (1 Tim. 2:3, 4) Haeba re se hlokolosi, ho se tshwane hona ho ka baka dikarohano diqetong tseo e leng tsa botho jwalo ka ho apara le ho itlhopha, tsela eo re phekolwang ka yona kapa boithabiso boo re bo kgethang. (Bar. 14:4; 1 Bakor. 1:10) Ka ha Modimo o re rutile hore re ratane, re lokela ho ba hlokolosi hore re se ke ra tsitlella hore diqeto tsa rona di betere ho feta tsa batho ba bang.—Bafil. 2:3.
14. Re lokela ho leka ka matla ho etsa eng, hona hobaneng?
14 Ntho e nngwe e ka re thusang ho qoba dikarohano ka phuthehong ke ho leka ka matla ho ba batho ba kgathollang le ho matlafatsa ba bang ka dinako tsohle. (1 Bathes. 5:11) Morao tjena, batho ba bangata ba neng ba sa kopanele kapa ba tlositswe ka phuthehong ba se ba kgutlile. Re ba amohela ka diatla tse pedi! (2 Bakor. 2:8) Hlokomela se ileng sa etsahalla moradi wa bo rona e mong ha a fihla Holong ya Mmuso ka mora hore a kgaotse ho kopanela ka dilemo tse leshome. O re: “Batho ba ile ba ntumedisa ka matsoho ba bososetse.” (Dik. 3:19) Diketso tseo tse nyenyane tse bontshang mosa di ile tsa mo ama jwang? O re: “Ke ile ka utlwa eka Jehova o ntshwere ka letsoho mme o ntataisa hore ke thabe hape.” Ha re matlafatsa ba bang, re tla be re dumella Kreste hore a re sebedise ho kgatholla “ba sehlang le ba imetsweng.”—Mat. 11:28, 29.
15. Tsela e nngwe eo re ka etsang hore ho be le bonngwe ka yona ke efe? (Sheba setshwantsho.)
15 Tsela e nngwe eo re ka etsang hore ho be le bonngwe ka yona ke ka ho ela hloko dintho tseo re di buang. Jobo 12:11 e re: “Na tsebe ha e hlahlobe mantswe jwalo ka ha leleme le latswa dijo?” Feela jwalo ka ha motho ya tsebang ho pheha a latswa dijo ho etsa bonnete ba hore di monate pele a di fa batho ba bang, le rona re lokela ho nahana ka hloko pele re bua. (Pes. 141:3) Sepheo sa rona e lokela hore ka dinako tsohle re etse bonnete ba hore dintho tseo re batlang ho di bua di tla matlafatsa, di kgatholle le ho “haha batho ba di mametseng.”—Baef. 4:29.
Nahana ka ntho eo o tlo e bua pele o ka e bua (Sheba serapa sa 15)
16. Ke bomang ka ho kgetheha ba lokelang ho bua ka tsela e kgothatsang?
16 Dihlooho tsa malapa le batswadi ke bona ka ho kgetheha ba lokelang ho etsa bonnete ba hore ba bua dintho tse kgothatsang. (Bakol. 3:19, 21; Tite 2:4) Baholo le bona e lokela ho ba batho ba kgathollang le ba tshedisang jwalo ka ha e le badisa ba mohlape wa Jehova. (Esa. 32:1, 2; Bagal. 6:1) Maele a Bibele a re hopotsa hore: “Lentswe le buuwang ka nako e nepahetseng le molemo haholo.”—Diprov. 15:23.
RATA BATHO BA BANG KA DIKETSO LE KA NNETE
17. Ke jwang re ka etsang bonnete ba hore lerato leo re ratang bara le baradi ba bo rona ka lona le tswa pelong?
17 Moapostola Johanne o re kgothalletsa hore “re se ke ra bua feela hore re rata batho ba bang empa re bontshe le ka diketso hore re a ba rata hape lerato la rona e be la nnete.” (1 Joh. 3:18) Re batla hore lerato leo re ratang bara le baradi ba bo rona ka lona le tswe pelong. Re ka finyella seo jwang? Ka hore re qete nako e ngata re ena le bona. Ho etsa jwalo ho tla re thusa hore re be metswalle e haufiufi le bona re be re matlafatse lerato leo re ba ratang ka lona. Ka hoo, etsa hore o be le nako le bona ha o le dibokeng le tshimong. Iphe nako ya ho ba tjhakela. Ha re etsa jwalo, re bontsha hore ‘Modimo ke yena ya re rutang hore re ratane.’ (1 Bathes. 4:9) Ka hoo, re tla tswela pele ho inwesa ka nkgo hore “ho hotle ebile ho monate ha bana ba motho ba dutse ha mmoho ba momahane.”—Pes. 133:1.
PINA YA 90 Le Kgothatsane
