BANYALANI
2: Tshebedisanommoho
E BOLELANG?
Banyalani ba sebetsang mmoho ba jwalo ka mofofisi wa sefofane le mothusi wa hae. Ha mathata a hlaha ba a nahanelana.
MOLAOMOTHEO WA BIBELE: “Ha ba sa le babedi, empa e se e le nama e le nngwe”—Matheu 19:6.
“Banyalani ba lokela ho sebetsa mmoho e le hore lenyalo la bona le atlehe.”—Christopher.
KE HOBANENG HA SEE E LE SA BOHLOKWA?
Haeba banyalani ba sena tshebedisanommoho, ha mathata a hlaha ba a lwantshana ho ena le hore ba a rarolle. Ntho e nyane e fetoha thaba.
“Tshebedisanommoho ke ntho ya bohlokwa ka ho fetisisa lenyalong. Haeba nna le molekane wa ka re sena tshebedisanommoho, seo se tla be se bolela hore re batho ba babedi ba dulang hammoho empa e mong le mong a iketsetsa dintho tsa hae, mme sena se ne se tla baka bothata nakong eo re etsang diqeto tsa bohlokwa.”—Alexandra.
SEO O KA SE ETSANG
ITLHAHLOBE
-
Na ke nka hore tjhelete eo ke e kgolang “ke ya ka ke le mong”?
-
Na ke hloka ho ba hole le molekane wa ka e le hore ke phole ka hloohong?
-
Na ha ke iphe nako ya ho tlwaela ba ha bo molekane wa ka le hoja yena a le haufi le bona?
BUISANA LE MOLEKANE WA HAO
-
Ke dintlheng dife moo re kgonang ho sebedisana mmoho?
-
Re ka ntlafatsa ho kae?
-
Re ka etsang ho ntlafatsa tsela eo re sebedisanang ka yona?
DINTHO TSE KA O THUSANG
-
A ko nahane ka papadi ya tenese, e mong o eme ka lehlakoreng lena mme e mong o eme ka lehlakoreng lane. Jwale, keng seo o ka se etsang e le hore o be ka lehlakoreng le le leng le molekane wa hao?
-
Ho ena le hore o re ‘Nka hlola jwang?’ o ka re ‘Re ka hlola jwang?’
“Hore na phoso ke ya mang ha se yona ntho ya bohlokwa. Ntho ya bohlokwa ke hore banyalani ba be le kgotso mme ba momahane.”—Ethan.
MOLAOMOTHEO WA BIBELE: “Le sa hlokomele dithahasello tsa ditaba tsa lona feela, empa hape le hlokomela dithahasello tsa ba bang.”—Bafilipi 2:3, 4.
