KA Moqebelo wa la 25 April 2015, ho ile ha eba le tshisinyeho ya lefatshe e matla haholo Nepal, e leng naha e dithaba e ka leboya ho India. Tshisinyeho ena e ile ya fihla sebakeng se bohole ba dikhilomithara tse 80 ka leboyabochabela ho motsemoholo wa Kathmandu. Ho ile ha shwa batho ba fetang 8 500 mme ena e bile koduwa e kgolo ka ho fetisisa Nepal. Matlo a fetang halofo ya milione a ile a senyeha. Naheng ya Nepal ho na le Dipaki Tsa Jehova tse 2 200 mme bongata ba tsona bo ile ba ameha kotsing ena. Ka bomadimabe, mosadi e mong wa Paki le bana ba hae ba babedi ba ile ba hlokahala.

Mosadi e mong wa Paki ya bitswang Michelle o re: “Diphuthehong tse ding tshisinyeho eo e ile ya fihla barababorona ba ntse ba tshwere seboka. Haeba e ne e ba fumane ba le matlong a bona bongata ba bona bo ka be bo ile ba shwa kapa ba lemala.” Ke hobaneng ha batho ba neng ba le sebokeng ba ile ba sireletseha? Ba ile ba sireletswa ke tsela eo Holo ya Mmuso ya Dipaki Tsa Jehova e hahilweng ka yona.

Diholo tsa Dipaki Tsa Jehova tsa Nepal di hahilwe ka tsela e etsang hore di se ke tsa senyeha nakong ya ditshisinyeho tsa lefatshe. Monna e mong ya bitswang Man Bahadur, ya sebetsang dikahong tsa diholo tsa Dipaki Tsa Jehova, o re: “Re ne re botswa kgafetsa hore na ke hobaneng ha re etsa metheo e tsitsitseng empa re haha diholo tse nyenyane. Hona jwale re bona melemo!” Kamora tshisinyeho eo, ho ile ha fanwa ka tumello ya hore batho ba dule diholong tseo. Le hoja batho ba ne ba ntse ba tshohile, Dipaki Tsa Jehova le baahisane ba tsona di ile tsa ikutlwa di sireletsehile ka diholong tseo.

Baholo ba diphutheho ba ile ba batla barababorona ba neng ba sa tsejwe hore na ba hokae. Mosadi e mong wa Paki ya bitswang Babita o re: “Baholo ba ile ba itela bakeng sa rona. Re ile ra thaba haholo ha re bona kamoo ba re ratang kateng.” Letsatsi kamora hore ho be le tshisinyeho, ditho tse tharo tsa komiti e hlokomelang mosebetsi wa Dipaki Tsa Jehova tsa Nepal hammoho le balebedi ba etelang diphutheho, ba ile ba etela diphutheho tse neng di anngwe ke ketsahalo ena e le hore ba ka sheba hore na di hlokang le hore ba thuse baholo.

Gary Breaux le mosadi wa hae Ruby, ba tswang ntlokgolo ya Dipaki Tsa Jehova e United States ba ile ba etela Nepal. Setho se seng sa komiti e hlokomelang mosebetsi wa Dipaki Tsa Jehova tsa Nepal, e leng Reuben o re: “Ka lebaka la pherekano e neng e le teng Kathmandu, re ne re nahana hore Moraborona Breaux a ke ke a kgona ho re etela. Empa o ile a fihla! Dipaki di ile tsa thabela ketelo eo haholo.”

Monna e mong ya bitswang Silas ya sebetsang ofising ya Dipaki Tsa Jehova e Nepal o re: “Hang feela kamora hore difounu di lokiswe, re ile ra fumana mehala bosiu le motshehare! Dipaki tsa dinaheng tse fapaneng di ne di tshwenyehile ka rona. Le hoja ba bang ba ne ba sa bue puo ya rona, re ne re kgona ho utlwa hore baa re rata le hore ba thabela ho re thusa.”

 Kamora matsatsi a mmalwa ho bile le tshisinyeho, Dipaki tse tswang metseng e haufi di ile tsa fana ka dijo. Ho ekelletsa moo, Dipaki Tsa Jehova di ile tsa theha Komiti ya Diphallelo, mme dithuso di ile tsa fihla, haholoholo ho tswa naheng ya Bangladesh, India, le Japane. Kamora matsatsi a seng makae, ho ile ha fihla dingaka tsa Dipaki ho tswa Europe mme di ile tsa sebeletsa ka hara e nngwe ya Diholo tsa Mmuso tsa Dipaki Tsa Jehova. Ba ile ba kena mosebetsing hanghang mme ha baa ka ba ba thusa feela ka maqeba a mmeleng empa ba ile ba boela ba ba thusa hore ba sebetsane le bothata ba ho sithabela maikutlong.

Ha a hlalosa tsela eo ba neng ba ikutlwa ka yona, mosadi e mong ya bitswang Uttara o re: “Tshisinyeho eo ya lefatshe e ne e le mpe haholo ebile e tshosa. Empa kamorao ho ketsahalo eo, re ile ra utlwa re atamelane haholo le bara le baradibaborona.” Ruri tshisinyeho eo ha e ya ka ya fokodisa lerato leo Dipaki di ratanang le ho rata Jehova ka lona. Ho e na le hoo, lerato leo le ile la tiya le ho feta.