KGAOLO YA 3
Rahaba o ne a Dumela ho Jehova
A re nke hore re motseng wa Jeriko. Jeriko e naheng ya Kanana mme batho ba moo ha ba dumele ho Jehova. Mosadi ya bitswang Rahaba o dula moo.
Ha Rahaba e sa le ngwanana o ile a utlwa dipale tsa kamoo Moshe a ileng a ntsha Baiseraele Egepeta kateng mme a arola Lewatle le Lefubedu. O ile a boela a utlwa kamoo Jehova a ileng a ba thusa ho hlola dintwa tseo ba neng ba di lwana le dira tsa bona. Jwale, o se a utlwa hore Baiseraele ba hlomme diahelo tsa bona pela Jeriko!
Rahaba o ile a sireletsa dihlwela hobane o ne a dumela ho Jehova
Mantsiboyeng a mang, Baiseraele ba babedi ba ile ba kena Jeriko ho tla hlwela motse. Ba ile ba fihla ntlong ya Rahaba mme a ba amohela. Bosiung boo, morena wa Jeriko o ile a utlwa hore dihlwela di teng motseng mme di ntlong ya Rahaba. Yaba morena o romela banna ba hae ho ya di tshwara. Rahaba o ile a pata dihlwela tseo tse pedi marulelong a ntlo ya hae mme o ile a re ho banna ba morena: ‘Dihlwela di ne di le teng mona, empa di se di tsamaile. Haeba le ka tsamaya hona jwale le ka nna la di tshwara!’ Na o a tseba hore na ke hobaneng ha Rahaba a ile a sireletsa dihlwela tseo?— Hobane o ne a dumela ho Jehova mme o ne a tseba hore Jehova o tla fa Baiseraele naha ya Kanana.
Pele dihlwela di tsamaya ha Rahaba, di ile tsa mo tshepisa hore yena le ba lelapa labo ba tla sireletswa ha Jeriko e fediswa. Na o a tseba hore ba ile ba re a etse eng?— Ba ile ba re: ‘Nka thapo ena e kgubedu mme o e leketlise fensetereng ya hao. Haeba o ka etsa jwalo, bohle ba ka ntlong ya hao ba tla sireletseha.’ Rahaba o ile a etsa hantle seo dihlwela di ileng tsa re a se etse. Na o a tseba hore na ho ile ha etsahala eng?—
Jehova o ile a sireletsa Rahaba le ba lelapa labo
Matsatsi a mmalwa ka mora moo, Baiseraele ba ile ba pota motse ba thotse tu! Ba ile ba pota motse ka matsatsi a tsheletseng, hanngwe ka letsatsi. Empa ka letsatsi la bosupa, ba ile ba o pota ka makgetlo a supileng. Yaba ba a hweletsa. Jehova o ile a etsa hore mabota a motse a we bu! fatshe. Empa ho ile ha sala feela ntlo e nang le thapo e kgubedu! Na o a e bona setshwantshong moo?— Rahaba le lelapa labo ba ile ba sireletswa!
O ka ithuta eng ho Rahaba?— Rahaba o ne a dumela ho Jehova ka lebaka la dintho tse hlollang tseo a ileng a ithuta tsona ka yena. Le wena o ithuta dintho tse ngata tse hlollang ka Jehova. Na o dumela ho Jehova jwaloka Rahaba?— Rea tseba hore o dumela ho yena!
