KGAOLO YA 13
Timothea o ne a Batla ho Thusa Batho
Timothea e ne e le mohlankana ya neng a thabela ho thusa batho. O ne a tsamaya dibaka tse ngata a thusa batho. Ka lebaka la ho etsa sena, o ne a phela hamonate. Na o ka rata ho ithuta ka bophelo ba Timothea?—
Mme wa Timothea le nkgono wa hae ba ile ba mo ruta ka Jehova
O holetse motseng o bitswang Lystra. Ha a ne a sa le monyenyane, nkgono wa hae Loise le mme wa hae Eunise, ba ile ba mo ruta ka Jehova. Ha Timothea a ntse a hola, o ne a batla ho thusa batho hore ba ithute ka Jehova.
Ha Timothea e sa le mohlankana, Pauluse o ile a re a ye le yena dibakeng tse ding e le hore ba rute batho ka Jehova. Timothea o ile a dumela. O ne a batla ho tsamaya hobane o ne a batla ho thusa batho.
Timothea o ile a tsamaya le Pauluse mme ba fihla motseng wa Macedonia o bitswang Thesalonika. E le hore ba fihle moo ba ile ba tlameha ho tsamaya ka maoto nako e telele ebe ba palama sekepe. Ha ba fihla moo, ba ile ba ruta batho ba bangata ka Jehova. Empa batho ba bang ba ile ba halefa mme ba ne ba batla ho ba ntsha kotsi. Kahoo Pauluse le Timothea ba ile ba tloha mme ba ya dibakeng tse ding.
Timothea o ne a phela hamonate a bile a thabile
Dikgwedi tse mmalwa ka mora moo, Pauluse o ile a kopa Timothea hore a kgutlele Thesalonika mme a bone hore na barababo rona ba ntse ba e ya jwang. Ho ne ho hlokahala hore motho a be sebete haholo ha a kgutlela motseng oo hobane o ne o le kotsi! Empa Timothea o ile a ya hobane o ne a tshwenyehile ka barababo rona ba moo. O ile a kgutla a tshwaretse Pauluse ditaba tse monate. Barababo ba Thesalonika ba ne ba e ya hantle!
Timothea o ile a sebetsa le Pauluse ka dilemo tse ngata. Pauluse o ile a ngola hore Timothea e ne e le yena motho ya ka mo romelang ho thusa diphutheho. Timothea o ne a rata Jehova mme o ne a rata le batho.
Na o rata batho mme o batla ho ba thusa hore ba ithute ka Jehova?— Haeba ho jwalo, o ka phela hamonate o bile o thabile jwaloka Timothea!
