Ha Faro a utlwa hore Baiseraele ba tsamaile Egepeta, a fetola monahano wa hae. A laela masole a hae a re: ‘Lokisang dikoloi tsa ntwa re ba lelekise. Re ka be re sa ba tlohella hore ba tsamaye.’ Faro le banna ba hae ba ile ba lelekisa Baiseraele.

Jehova o ne a sebedisa leru ho tataisa batho ba hae motshehare mme bosiu a sebedisa mollo. Yaba o ba isa Lewatleng le Lefubedu mme a re ba hlome ditente pela lona.

Baiseraele ba bona hore Faro le banna ba hae ba ba setse morao. Ho ne ho se moo ba ka yang, hobane ka pele e ne e le lewatle mme ka morao e le masole a Egepeta. Jwale ba re ho Moshe: ‘Re tlo shwa. O ka be o ile wa re tlohela Egepeta.’ Moshe a re ho bona: ‘Le se ke la tshoha. Jehova o tla re sireletsa.’ Ruri Moshe o ne a tshepa Jehova.

Yaba Jehova o re Baiseraele ba phuthe ditente tsa bona. Bosiung boo, Jehova a beha leru pakeng tsa Baiseraele le Baegepeta. Ka lehlakoreng la Baegepeta ho ne ho le lefifi empa ka ho la Baiseraele ho ena le lesedi.

 Jehova a re Moshe a otlolle letsoho la hae hodima lewatle. Jehova a etsa hore ho foke moya o matla bosiu bohle. Ka hoo, lewatle la buleha ka lehare. Baiseraele ba tsamaya hara lona moo ho ommeng.

Faro le banna ba hae ba ba sala morao. Empa Jehova a ba ferekanya. Mabidi a dikoloi tsa bona tsa ntwa a qala ho tswa. Masole a re: ‘A re tsweng mona. Jehova o a ba lwanela!’

Jehova a re ho Moshe: ‘Otlollela letsoho la hao hodima lewatle.’ Hanghang metsi a kwahela lebotho la Baegepeta. Faro le banna bohle ba hae ba shwa. Ha ho le ya mong wa bona ya ileng a pholoha.

Baiseraele bona ba feta ba sireletsehile mme ba rorisa Modimo ka pina, ba re: ‘Binelang Jehova, ka ha o phahame haholo. O lahletse pere le mopalami wa yona ka lewatleng.’ Ha ba bang ba ntse ba bina, basadi ba ne ba tantsha ba bile ba letsa meropa. Baiseraele bohle ba ne ba thabile haholo ka ha jwale ba ne ba lokolohile.