Lota o ne a dula le rangwane wa hae Abrahama naheng ya Kanana. Ha nako e ntse e ya, Abrahama le Lota ba ile ba ba le diphoofolo tse ngata haholo mme ka lebaka leo makgulo a ne a haella. Abrahama o ile a re ho Lota: ‘Re ke ke ra kgona ho dula mmoho. Ke kopa o kgethe sebaka seo o batlang ho ya ho sona. Nna ke tla nka sebaka se setseng.’ Na o a bona hore Abrahama o ne a sa batle hore e be yena ya kgethang pele?

Lota o ile a bona sebaka se setle haufi le motse wa Sodoma. Se ne se ena le metsi a mangata le jwang bo botala. O ile a kgetha ho ya sebakeng seo mme a dula ho sona le ba lelapa la hae.

Batho ba Sodoma le ba motseng o mong o haufi le moo wa Gomora, ba ne ba etsa dintho tse mpe. Ba ne ba le babe hoo Jehova a ileng a kgetha ho ba fedisa. Modimo o ne a batla ho sireletsa Lota le ba lelapa la hae. Ka hoo, a romela mangeloi a mabedi hore a re ho bona: ‘Potlakang! Tswang sebakeng sena. Jehova o tlo fedisa motse ona.’

Lota ha a ka a tsamaya hanghang. O ile a dieha. Yaba mangeloi a tshwara Lota, mosadi wa hae le baradi ba hae ka matsoho a ba ntshetsa ka ntle ho motse, a re: ‘Balehang e le hore le pholohe! Le se ke la hetla, ha le ka hetla le tla shwa.’

Ha ba fihla motseng wa Zoware, Jehova a fedisa motse wa Sodoma le wa Gomora ka mollo le sebabole. Mosadi wa Lota ha a ka a mamela  Jehova. O ile a hetla yaba o fetoha seemahale sa letswai. Empa Lota o ile a sireletseha ha mmoho le baradi ba hae, ka ha ba ile ba mamela Jehova. Mosadi wa Lota ha a ka a mamela Modimo mme e tlameha ebe seo se ile sa utlwisa Lota le baradi ba hae bohloko haholo. Le ha ho le jwalo, ba ne ba thabisitswe ke hore ebe bona ba ile ba mamela Jehova.