POTSO YA 3
Nka Buisana le Batswadi ba ka Jwang?
O NE O TLA ETSANG?
Nahana ka sena: Ke Laboraro mantsiboya. Lebo ya dilemo di 17 o qetile mosebetsi wa hae, jwale o batla ho phomola ho se hokae! O itahlela sofeng mme o laeta TV.
Hona nakong eo, ntate wa hae o kena monyako, mme ha a thabele seo.
“Lebohang! Ke hobaneng ha o senya nako ka ho shebella TV ha e lokela ebe o thusa ngwaneno ka homework? Ha ho mohla o etsang seo re o laelang sona!”
Lebo o buela ka marameng, o re: “Eish! Ntate o se a qadile,” empa ntate wa hae o wa mo utlwa.
Ntate wa hae o atamela ho yena o re: “O reng moshanyana?”
Lebo o bua a tenehile o re: “Ha ke re letho.”
Ntate o halefa le ho feta. O re: “O se ke wa bua le nna jwalo!”
Haeba e ne e le wena, o ne o tla etsang hore o qobe boemo boo?
NAHANISISA HANTLE!
Ho buisana le batswadi ba hao ho tshwana le ho kganna koloi. Ha o fihla moo tsela e kwetsweng, o ka sebedisa tsela e nngwe.
KA MOHLALA:
Ngwanana ya bitswang Leah o re: “Ho thata ho bua le ntate wa ka. Ka dinako tse ding ha ke ntse ke bua, o tla be a re, ‘Ha ke a utlwa, o ntso reng?’”
LEAH A KA KGETHA HO ETSA E NNGWE YA DINTHO TSENA TSE THARO.
-
A ka halefela ntate wa hae.
Leah o wa kwata mme o re: “Ako mamele hle! Taba ena ke ya bohlokwa!”
-
A ka tlohela ho bua le ntate wa hae.
Leah o kgetha hore a se ke a hlola a bolella ntate wa hae mathata a hae.
-
A ka emela nako e loketseng, ebe o bua le ntate wa hae hape.
Leah o bua le ntate wa hae ka nako e nngwe, kapa o mo ngolla lengolo ho mo hlalosetsa mathata a hae.
O ne o ka kgothalletsa Leah hore a etseng?
NAHANA KA SENA: Ho na le ntho e ferekantseng ntate wa Leah, ka hoo ha a hlokomele hore moradi wa hae o na le bothata. Haeba Leah a kgetha ho kwata, ntate wa hae o ne a tla mo makalla hore na o kwatetseng. Ho feta moo, ntate wa Leah o ne a ke ke a mo mamela, ebile seo se ne se tla bontsha hore ha a hlomphe ntate wa hae. (Baefese 6:2) Ka hoo, ho hlakile hore ho etsa dintho ka tsela ena ho ke ke ha mo tswela molemo.
Feela jwalo ka ha o ka nka tsela e nngwe ha e nngwe e kwetswe, o ka fumana tsela e nngwe ya ho buisana le batswadi ba hao
Le hoja ho bonahala eka ho kgaotsa ho bua ke yona tsela e bonolo, ha e le hantle ho kotsi. Hobaneng? Hobane ho hlokahala hore Leah a bue le ntate wa hae ka mathata a hae e le hore a fumane thuso. Ho thola ha ho thuse ka letho.
Ha Leah a emela nako e loketseng ya ho bua le ntate wa hae, seo se bontsha hore ha a dumelle letho hore le mo sitise hore ba buisane. Ebile ha a kgetha ho ngolla ntate wa hae lengolo, o tla imoloha hanghang.
Ho ngola lengolo ho ka boela ha mo thusa hore a behe ditaba tsa hae hantle. Ha ntate wa Leah a bala lengolo leo, o tla utlwa seo Leah a neng a batla ho mo bolella sona, e leng se ka mo thusang hore a utlwisise bothata ba hae. Ho emela nako e loketseng ya ho bua ho ka tswela Leah le ntate wa hae molemo. Ho sa tsotellehe hore na Leah o buisana le ntate wa hae kapa o ngola lengolo, sena se dumellana le keletso ya Bibele e reng re ‘phehelle dintho tse tlisang kgotso.’—Baroma 14:19.
Ke dintho dife tse ding tseo Leah a ka di etsang?
Nahana ka ntho e le nngwe, ebe ka mora moo o nahana ka hore na ho tla ba le diphello dife?
QOBA HO BUA DINTHO TSE SA HLAKANG
Hopola hore batswadi ba hao ba ka nna ba se ke ba utlwisisa seo o se buang.
KA MOHLALA:
Batswadi ba o botsa hore na o kwatetseng. Wena o re, “Ha ke batle ho bua ka taba eo.”
Ha o tjho jwalo, batswadi ba hao ba nahana hore ha o batle ho bua le bona hobane ha o ba tshepe. Ba nka hore o batla ho bolella metswalle ya hao mathata a hao, eseng bona.
A re re mohlomong o tobane le bothata, jwale batswadi ba hao ba batla ho o thusa. Jwale o re: “Le se ke la kgathatseha, ke tla bona hore na ke etsa jwang.”
-
Batswadi ba hao ba ka nahanang?
-
Ho ka ba molemo hore o reng?
O ka Nna wa Rata le Tsena
BATJHA BA A BOTSA
Ke Jwang Nka Bolellang Batswadi ba ka ho re na ke Ikutlwa Jwang ka Melao eo ba e Behang?
Leka ho bua le batswadi ba hao ka hlompho mme o bone hore le tla utlwana.
DIPOPAE
Nka Bua le Batswadi ba ka Jwang?
O ka buisana le batswadi ba hao jwang haeba o utlwa eka ha o batle ho bua?
