Lengolo la Jude 1:1-25
1 Nna Juda, lekgoba la Jesu Kreste ebile ke le ngwanabo Jakobo,+ ke ngolla lona ba bitsitsweng+ ba ratwang ke Modimo Ntate mme ba sireleditswe e le hore ba tle ba be le Jesu Kreste:+
2 E se eka le ka ekeletswa mohau, kgotso le lerato.
3 Baratuwa, ke ne ke leka ka hohle ho le ngolla ka poloko e re tswelang molemo kaofela.+ Empa ke ile ka bona ho hlokahala hore ke le ngolle ho le eletsa hore le lwane ntwa e thata bakeng sa tumelo+ eo bahalaledi ba ileng ba e fuwa hanngwe ebile e le la ho qetela.*
4 Lebaka la ka la ho le ngolla ke hore batho ba itseng bao Mangolo a boletseng kgale hore ba tla ahlolwa, ba kene hara lona ka sekgukgu. Ke batho ba sa rateng Modimo, ba fetolang mosa* wa Modimo wa rona lebaka la ho ikemela ka boitshwaro ba bona bo bobe boo ba bo etsang ba sa swabe.*+ Ha ba tshepahalle eo e leng yena feela monga rona le Morena wa rona, Jesu Kreste.+
5 Le hoja le se le ntse le tseba taba ena, ke batla ho le hopotsa hore le ha Jehova* a ile a pholosa batho ho tswa naheng ya Egepeta,+ ka mora moo o ile a fedisa ba se nang tumelo.+
6 Hape mangeloi a sa kang a dula boemong ba ona ba pele empa a furalla sebaka seo a dulang ho sona,+ o a fasitse lefifing le letsholetsho ka diketane tseo ho seng mohla di tla kgaoha ho fihlela mangeloi ao a ahlolwa letsatsing le leholo.+
7 Ka tsela e tshwanang, baahi ba metse ya Sodoma le Gomora le ba metse e haufi le bona ba ile ba inehella boitšoaro bo bobe bo amanang le thobalano* le ditakatso tseo e seng tsa tlhaho.+ Metse eo e ileng ya ahlolwa mme ya fuwa kotlo ya mollo o sa feleng,+ ke temoso ho rona.
8 Ho sa tsotellehe temoso eo, batho bana le bona ba dula ba nahana* dintho tse fosahetseng, ba silafatsa mmele ya ba bang, ha ba hlomphe bolaodi mme ba bua hampe ka bao Modimo a ba fileng boemo bo hlomphehang.+
9 Empa ha Mikaele+ lengeloi le ka sehloohong+ a ne a pheha kgang le Diabolose ka setopo sa Moshe,+ ha a ka a kgetha ho mo ahlola ka mantswe a nyefolang+ empa o ile a re: “E se eka Jehova* a ka o fa kahlolo e o loketseng.”*+
10 Empa batho bana ba bua hampe ka dintho tsohle tse halalelang tseo ba sa di utlwisiseng.+ Ba jwalo ka diphoofolo tse sa nahaneng,+ ba itshilafatsa ka diketso tsa bona tse bophoofolo.
11 Ba madimabe ka ha ba latetse tsela ya Kaine,+ ba mathetse tseleng e fosahetseng ya Balame+ bakeng sa moputso mme ba timeditswe ka ha ba buile mantswe a borabele+ jwalo ka Kora.+
12 Ha ba le meketeng ya lona* ba ntse ba keteka le lona, ba jwalo ka mafika a kotsi* a patehileng tlasa metsi.+ Ke badisa ba inahanetseng dimpa tsa bona feela.+ Ke maru a se nang metsi, a iswang kwana le kwana ke moya.+ Ke difate tse se nang ditholwana qetellong ya lehwetla, tse omeletseng ha bohloko* le tse fothotsweng.
13 Ke maqhubu a lewatle le befileng a hlatsang ditshila tse neng di lokela ho ba hlabisa dihlong.+ Ke dinaledi tse lelerang mme Modimo o di behile lefifing le letsholetsho moo di tla dula teng ho ya ho ile.+
14 Enoke+ e leng wa bosupa ho tloha ho Adama le yena o ile a profeta ka bona a re: “Jehova* o ile a tla ka mangeloi a hae a halalelang a diketekete*+
15 ho diha kahlolo kgahlanong le batho bohle,+ ho fumana bohle ba sa hlompheng Modimo ba le molato wa diketso tsohle tsa bona tse kgopo. Modimo o tla etsa jwalo hobane ba entse diketso tse kgopo mme ha ba mo hlomphe ba bile ba bua dintho tse tshosang ka yena.”+
16 Batho bana ba rata ho korotla+ mme ba tletleba ka dintho tse ba hlahelang bophelong. Ba inehella ditakatso tsa bona+ mme ba utlwahala ka dipuo hore ba a ikgohomosa. Ba ya ka tshobotsi* e le hore ba iphumanele melemo.+
17 Ha e le lona baratuwa, le hopole dipolelo tseo baapostola ba Morena wa rona Jesu Kreste ba kileng ba di bua.*
18 Ba ne ba atisa ho re ho lona: “Mehleng ya bofelo* ho tla ba le basomi, ba laolwang ke ditakatso tsa bona tse kgopo.”+
19 Batho bana ke bona ba bakang dikarohano,+ ba itshwereng jwalo ka diphoofolo* le ba se nang moya wa Modimo.
20 Empa lona baratuwa, le matlafatse tumelo ya lona e halalelang ka ho fetisisa mme le rapele ka thuso ya moya o halalelang.+
21 Ka ho etsa jwalo, le tla dula le ratwa ke Modimo+ ha le ntse le letetse mohau wa Morena wa rona Jesu Kreste mme le lebeletse bophelo bo sa feleng.+
22 Hape le nne le hauhele+ ba sa kgodisehang ka tumelo ya bona,+
23 ba pholoseng+ ka ho ba ntsha mollong.* Empa le nne le hauhele ba bang. Le be hlokolosi ha le etsa jwalo esere ba le silafatsa ka diketso tsa bona tse kgopo.*+
24 Modimo ya kgonang ho le thusa hore le se ke la kgoptjwa le ho le hlahisa ka pela kganya ya hae le se na molato+ le bile le thabile haholo,
25 ke yena feela Mopholosi wa rona ka Jesu Kreste Morena wa rona. Ho yena e be tlotla, ho hlompheha, matla le bolaodi ho tloha dinakong tsa kgalekgale, hona jwale le ka ho sa feleng. Amen.
Dintlha tse qetellong ya sehloho
^ Kapa: “hang le ka ho ke keng ha phetwa.”
^ Sheba Ntlha ya A5.
^ Kapa: “ba lora.”
^ Sheba Ntlha ya A5.
^ Kapa: “E se eka Jehova a ka o kgalemela ka matla.”
^ Ka Segerike: “meketeng ya lona ya lerato.”
^ Mafika a motsu a ka metsing a ka phunyang sekepe, a ntsha batho kotsi kapa a ba bolaya.
^ Ka Segerike: “tse shweleng habedi.”
^ Sheba Ntlha ya A5.
^ Kapa: “dimiriade.”
^ Kapa: “Ba rorisa batho.”
^ Kapa: “ba di profetileng.”
^ Ka Segerike: “Nakong ya ho qetela.”
^ Kapa: “ba sa rateng Modimo.”
^ Kapa: “e le hore ba se ke ba fediswa.”
^ Ka Segerike: “Le hloye esita le seaparo sa ka hare se silafaditsweng ke nama.”
