Diketso Tsa Baapostola 6:1-15
6 Mehleng eo ha barutuwa ba ntse ba eketseha, Bajuda ba buang Segerike ba tletleba ka Bajuda ba buang Seheberu hobane bahlolohadi ba Bagerike ba ne ba tlodiswa mahlo letsatsi le leng le le leng ha ho fanwa ka dithuso.+
2 Ka hoo, baapostola ba 12 ba bitsa barutuwa bohle yaba ba re: “Ha se ntho e ntle hore re emise ho ruta lentswe la Modimo e le hore re abe dijo ditafoleng.+
3 Bana ba bo rona, ikgetheleng banna ba supileng ba nang le botumo bo botle,+ ba bohlale le ba tletseng moya o halalelang+ e le hore re ka ba fa boikarabelo ba ho okamela mosebetsi ona wa bohlokwa.+
4 Rona re tla nne re rapele le ho ruta lentswe la Modimo.”
5 Barutuwa bohle ba thabela qeto ena. Ba kgetha Setefane, monna ya neng a ena le tumelo e matla a bile a tletse moya o halalelang. Ba kgetha le Filipi,+ Prokore, Nikanore, Timone, Parmena le Nikolase mosokolohi wa Antioke.
6 Ba ba tlisa ho baapostola yaba baapostola ba a rapela mme ba ba beha matsoho.+
7 Ka lebaka leo, lentswe la Modimo la nna la tsebahala+ mme barutuwa ba eketseha haholo+ Jerusalema. Baprista ba bangata le bona ya eba badumedi.+
8 Setefane ke monna eo Modimo a neng a mo rata haholo a bile a mo file matla a maholo. O ne a etsa mehlolo e meholo hara batho.
9 Empa banna ba bang ba sehlopha se bitswang Ntlo ya Thapelo* ya Batho ba Lokolotsweng, ba tla ho tla pheha kgang le Setefane. Ba ne ba ena le Basaerene, Baalexandria le batho ba bang ba tswang Silisia le Asia.
10 Le ha ho le jwalo, ba ne ba sa kgone ho ikemela hobane Setefane a le bohlale a bile a thuswa ke moya o halalelang ho bua.+
11 Ba hlohlelletsa batho ka lekunutu hore ba re: “Re utlwile a rohaka Moshe le Modimo.”
12 Ba baka moferefere hara setjhaba, baholo le bangodi. Yaba kaofela ba a mo kgorohela, ba mo nka ka dikgoka ba mo isa Lekgotleng le Phahameng la Bajuda.*
13 Ba tla le dipaki tsa bohata yaba di re: “Motho enwa o dula a bua hampe ka tempele le ka Molao.
14 Mohlala, re utlwile a re Jesu wa Monazaretha o tla heletsa tempele a be a fetole melao eo Moshe a re fileng yona.”
15 Ha bohle ba neng ba dutse ka kgotla ba sheba Setefane, ba bona sefahleho sa hae eka sa lengeloi.
