Ho Baefese 2:1-22
2 Le hoja e ne eka le shwele ka lebaka la dibe tsa lona le ditshito tsa lona,+ Modimo o entse hore le phele.
2 Le ile la di etsa hobane ho na le nako eo le neng le phela jwalo ka batho ba lefatshe lena.+ Le ne le mamela mmusi ya laolang moya+ o hlohlelletsang batho+ hore ba se ke ba mamela Modimo.
3 Nakong e fetileng, kaofela re ne re etsa dintho jwalo ka batho bana hobane re ne re etsa dintho ho ya ka ditakatso tsa rona tse fosahetseng+ ebile re etsa dintho tseo re di nahanang.+ Re ne re tshwanelwa ke bohale ba Modimo ho tloha feela ha re tswalwa+ feela jwalo ka batho ba bang.
4 Empa ka ha Modimo o mohau haholo+ hape o re rata haholo,+
5 o ile a etsa hore re phele ha mmoho le Kreste le hoja e ne eka re shwele ka lebaka la diphoso tsa rona.+ O le pholositse hobane a le mosa.*
6 Hape Modimo o ile a re tsosa mmoho le yena, a ba a re beha mmoho le yena lehodimong ka ha re barutuwa ba Kreste Jesu.+
7 O entse jwalo e le hore lefatsheng le letjha* a ka re bontsha mosa o moholo ha a etsetsa rona balatedi ba Kreste Jesu dintho tse ntle.
8 Ka ha le na le tumelo, le pholositswe ka lebaka la mosa o moholo wa Modimo.+ Ha le a pholoswa hobane ho ena le ntho eo le e entseng empa ke mpho eo Modimo a le fileng yona.
9 Ehlile ha le a pholoswa hobane ho ena le ntho eo le e entseng+ e le hore le se ke la ithorisa.
10 Re mosebetsi wa matsoho a hae.+ Ka ha re balatedi ba Kreste Jesu,+ re bopetswe ho etsa mesebetsi e metle eo Modimo a ileng a rera esale pele hore re tle re e etse.
11 Le hopole hore ho na le nako eo Bajuda ba “boloditsweng” ke batho, ba neng ba le bitsa “ba sa bollang.”
12 Ka nako eo, le ne le sa tsebe Kreste, ho se na letho le le kopanyang le Baiseraele ebile le ne le sa kenyelletswa dilekaneng tse amanang le tshepiso.+ Le ne le se na tshepo ebile le sa tsebe Modimo.+
13 Le ne le le hole le Modimo empa le se le le haufi le yena ka lebaka la madi a Kreste hobane le se le le balatedi ba Kreste Jesu.
14 Kreste ke yena ya re fang kgotso+ hobane o entse hore dihlopha tse pedi tse neng di arohane di kopane+ ka hore a dihe lerako le neng le di arotse.+
15 Ka ha o ile a etsa sehlabelo ka mmele wa hae, o ile a hlakola molao le ditaelo tsa Molao wa Moshe e le hore a ka etsa hore dihlopha tse pedi tse neng di hloyane e be sehlopha se le seng+ se nang le kgotso.
16 Ha a ne a shwella palong,*+ o ne a etsa hore dihlopha tsena tse pedi di be le kgotso le Modimo le hore e be ntho e le nngwe. Ka ho nyehela mmele wa hae, o entse hore dihlopha tsena tse pedi di se ke tsa hloyana.+
17 O ile a tla mme a bolella lona ba neng ba le hole le yena le ba neng ba le haufi le yena ditaba tse monate tsa kgotso.
18 Ka lebaka la hae, batho bohle ba kgona ho atamela ho Ntate hobane kaofela re amohela moya o halalelang o tshwanang.
19 Ka hona, ha le sa le baditjhaba+ empa le se le dula le batho ba Modimo*+ mme le ditho tsa lelapa la Modimo.+
20 Le hahilwe hodima motheo wa baapostola le baprofeta,+ ha Jesu Kreste yena e le lejwe la sekgutlo la motheo.+
21 Mohaho o momahaneng le Kreste le dikarolo tsohle tsa wona di kopantswe hantle.+ Mohaho oo o ntse o hola e le hore e be tempele ya Jehova.*+
22 Ka ha le momahane le Kreste, Modimo o entse hore lona le batho ba bang le be ntlo eo a dulang ho yona ka hobane moya wa hae o ho yona.+
