Lengolo la Pele le Yang ho Timothea 3:1-16
3 Mantswe ao ke tlo a bua ke nnete: Haeba monna a etsa boiteko ba ho ba molebedi,+ o lakatsa mosebetsi o motle.
2 Molebedi o lokela ho phela ka tsela eo ho seng motho ya ka mo tshwayang phoso, a be le mosadi a le mong, a be le tekatekano dinthong tsohle tseo a di etsang, a be le kelello,+ a hlophisehe, a amohele baeti+ a be a kgone ho ruta.+
3 E se ke ya eba letahwa,+ a se ke a rata ntwa, a se ke a ba manganga,+ a se ke a rata ho pheha kgang+ hape a se ke a rata tjhelete.+
4 E be motho ya laolang lelapa la hae hantle, ya nang le bana ba mamelang le ba itshwereng hantle.+
5 Etswe motho a ka hlokomela phutheho ya Modimo jwang empa a sitwa ho laola lelapa la hae?
6 E se ke ya eba motho eo e sa tswa ba Mokreste+ esere a ikgohomosa yaba o fumana kahlolo e tshwanang le ya Diabolose.
7 Hape e lokela ho ba motho ya buuwang hantle ke batho bao e seng badumedi+ e le hore a se ke a tlotlolleha le ho wela lerabeng la Diabolose.
8 Bahlanka ba sebeletsang le bona e lokela ho ba batho ba hodileng kelellong, e se ke ya eba baikaketsi,* ba se ke ba nwa veine haholo, ba se ke ba eba meharo ya ho fumana leruo ka bolotsana,+
9 ba dule ba tshepahalla lekunutu le halalelang la tumelo ka letswalo le kgutsitseng.+
10 Hape ba hlahlojwe pele hore ho bonwe hore na ba a tshwaneleha. Ka mora moo, e ka ba bahlanka ba sebeletsang ha ho se na letho leo ba qoswang ka lona.+
11 Basadi le bona e be batho ba hodileng kelellong, ba se ke ba senya batho mabitso,+ ba be le tekatekano dinthong tsohle tseo ba di etsang hape ba tshepahale dinthong tsohle.+
12 Mohlanka ya sebeletsang a be le mosadi a le mong, a laole lelapa la hae hantle, haholoholo bana ba hae.
13 Banna ba etsang mosebetsi wa bona hantle ba iketsetsa lebitso le letle ebile ba ka kgona ho bua ka bolokolohi ka tumelo eo ba nang le yona ho Kreste Jesu.
14 Ke batla ho tla ho wena empa ke o ngolla dintho tsena e le hore haeba nka sitwa ho tla kapele,
15 o tsebe hore na o lokela ho itshwara jwang ka tlung ya Modimo,+ eo e leng phutheho ya Modimo ya phelang, e tshehetsang le ho sireletsa nnete.
16 Re ke ke ra hana hore lekunutu le halalelang le amanang le ho sebeletsa Modimo ka botshepehi le leholo. Lekunutu leo ke lena: ‘Jesu e ile ya eba motho,+ Modimo a phatlalatsa hore o lokile ha a mo fa mmele wa moya hape.+ O ile a hlaha ho mangeloi,+ ha buuwa ka yena hara ditjhaba,+ batho ba lefatsheng ba dumela ho yena+ a ba a amohelwa lehodimong le ho tlotliswa.’
Dintlha tse qetellong ya sehloho
^ Kapa: “ba se ke ba eba temepedi.”
