La Pele le Yang ho Bathesalonika 5:1-28
5 Bana beso, ha le hloke ho ngollwa letho ka dinako le mehla.
2 Le tseba hantle hore letsatsi la Jehova*+ le tla tla feela jwalo ka leshodu bosiu.+
3 Neng kapa neng ha ba re: “Kgotso le tshireletseho!” Ba tla fediswa hanghang ba sa lebella,+ jwalo ka ha mosadi wa moimana a tlelwa ke mahlaba a pelehi ka tshohanyetso. Ho hang ba ke ke ba phonyoha.
4 Lona bana beso ha le lefifing. Ka hoo, letsatsi leo le ke ke la le tsometsa jwalo ka ha kganya ya letsatsi* e tsometsa leshodu
5 hobane kaofela le bana ba lesedi le bana ba motshehare.+ Ha re bana ba bosiu kapa ba lefifi.+
6 Ka hoo, a re se keng ra robala jwalo ka ha ba bang ba robetse+ empa re dule re fadimehile+ ebile re ena le dikelello tse hlaphohetsweng.+
7 Ba robalang ba tlwaetse ho robala bosiu, le ba tahwang ba tlwaetse ho tahwa bosiu.+
8 Empa ha e le rona ba kganyeng, a re duleng re ena le dikelello tse hlaphohetsweng. Re be le tumelo le lerato jwalo ka ha eka re apere tshireletso ya sefuba. Re be le tshepo ya hore re tla pholoha mme tshepo eo e be helmete ya rona.+
9 Modimo ha a re kgethela hore re otlwe empa o re kgethetse hore re pholoswe+ ka Morena wa rona Jesu Kreste.
10 O ile a re shwela+ e le hore ho sa tsotellehe hore na re a phela kapa re a shwa,* re tle re phele le yena.+
11 Ka hona, le tswele pele ho kgothatsana* le ho matlafatsana+ feela jwalo ka ha le ntse le etsa.
12 Bana beso, re le kopa hore le hlomphe ba sebetsang ka thata hara lona, ba le etellang pele mosebetsing wa Morena le ho le eletsa.
13 Le ba nahanele le ho ba rata haholo ka lebaka la mosebetsi wa bona.+ Le phedisane ka kgotso.+
14 Hape bana beso, re le kgothaletsa hore le eletse ba tswileng tseleng,+ le tshedise ba nyahameng,* le tshehetse ba fokolang le be le mamelle bohle.+
15 Etsang bonnete ba hore ho se ke ha eba le ya iphetetsang.+ Le dule le leka ka matla ho etsetsana dintho tse ntle le ho di etsetsa batho ba bang.+
16 Dulang le thabile.+
17 Dulang le rapela.+
18 Le lebohele dintho tsohle.+ Modimo o batla hore balatedi ba Kreste Jesu ba etse dintho tsena.
19 Le se ke la sitisa moya wa Modimo hore o sebetse ho lona.*+
20 Le se ke la bua hampe ka boprofeta.+
21 Etsang bonnete ba hore dintho tsohle di nepahetse,+ le kgomarele tse nepahetseng.
22 Le qobe dintho tsohle tse fosahetseng.+
23 Bana beso, e se eka Modimo wa kgotso a ka etsa hore le halalele ka hohle. E se eka makgabane ohle a lona, bophelo* ba lona le mmele ya lona di ka fumanwa di se na molato ebile di phethahetse ka ditsela tsohle nakong eo Morena wa rona Jesu Kreste a bang teng.+
24 Ya le kgethileng* o a tshepahala mme o tla etsa dintho tseo.
25 Bana beso, le dule le re rapella.+
26 Dumedisang bana ba bo rona kaofela ka lerato.*
27 Ke le kopa ka lebitso la Morena wa rona hore le balle bana ba bo rona kaofela lengolo lena.+
28 E se eka Morena wa rona Jesu Kreste a ka ba mosa* ho lona.
Dintlha tse qetellong ya sehloho
^ Sheba Ntlha ya A5.
^ Kapa: “motshehare.”
^ Kapa: “robetse.”
^ Kapa: “tshedisana.”
^ Kapa: “ba sithabetseng.”
^ Ka Segerike: “Le se ke la tima mollo wa moya.”
^ Ka Segerike: “bitsitseng.”
^ Ka Segerike: “kako e halalelang.”
