Tjhe, madumedi ha a tshwane. Bibele e na le mehlala ya madumedi ao Modimo a sa a thabeleng. Madumedi ana a dihlopha di pedi.

Sehlopha sa pele: Ba rapelang medimo esele

 Ha Bibele e bua ka borapedi ba medimo esele e sebedisa mantswe a kang “pudulo,” “lefeela” le “dintho tseo ho tsona ho neng ho se letho le molemo.” (Jeremia 10:​3-5; 16:19, 20) Jehova a Modimo o ile a laela setjhaba sa boholoholo sa Iseraele a re: “O se ke wa ba le medimo e meng kgahlanong le sefahleho sa ka.” (Exoda 20:​3, 23; 23:​24) Ha Baiseraele ba ne ba rapela medimo e meng, ‘bohale ba Jehova bo ile ba ba tukela.’​—Numere 25:3; Levitike 20:2; Baahloli 2:​13, 14.

 Modimo o ikutlwa ka tsela e tshwanang ha batho ba rapela “ba bitswang medimo.” (1 Bakorinthe 8:​5, 6; Bagalata 4:⁠8) O laela batho ba batlang ho mo rapela hore ba kgaotse ho itswakanya le bodumedi ba bohata, o re: “Tswang hara bona mme le ikarole.” (2 Bakorinthe 6:​14-17) Haeba madumedi ohle a a tshwana mme a rapela Modimo, ke hobaneng ha Modimo a fana ka taelo ee?

Sehlopha sa bobedi: Ba rapelang Modimo wa nnete ka tsela eo a sa e amoheleng

 Ka dinako tse ding, Baiseraele ba ne ba rapela Modimo ba sebedisa mofuta wa borapedi le ditlwaelo tsa medimo ya bohata, empa Jehova ha aa ka a amohela borapedi bo jwalo. (Exoda 32:⁠8; Deuteronoma 12:​2-4) Jesu o ile a nyatsa baetapele ba bodumedi ba mehleng ya hae ka lebaka la tsela eo ba neng ba rapela Modimo ka yona; ba ne etsa eka ba rata Modimo, empa ka boikaketsi ba ne ba “hlokomolohile ditaba tse toma haholo tsa Molao, e leng, toka le mohau le botshepehi.”​—Matheu 23:23.

 Ka ho tshwanang, kajeno ke bodumedi bo thehilweng nneteng feela bo lebisang batho ho Modimo. Nnete ena e fumanwa ka Bibeleng. (Johanne 4:​24; 17:​17; 2 Timothea 3:​16, 17) Madumedi a sa thehang dithuto tsa wona Bibeleng a hulela batho hole le Modimo. Dithuto tse ngata tseo batho ba nahanang hore di thehilwe Bibeleng tse akarelletsang Boraro bo bong, hore moya ha o shwe le hore batho ba hlokofatswa ka ho sa feleng, di tswa ho batho ba neng ba rapela medimo ya bohata. Bodumedi bo buellang dithuto tse jwalo ke ba “lefeela,” hobane bo fetola melao ya Modimo mme bo kenya ditlwaelo tsa bodumedi.​—Mareka 7:​7, 8.

 Modimo o hloile boikaketsi ba bodumedi. (Tite 1:​16) E le hore bodumedi bo hulele batho ho Modimo, bo lokela ho ama bophelo ba batho, bo se ke ba eba le ditlwaelo feela. Ka mohlala, Bibele e re: “Haeba motho le ha e le ofe a ipona eka ke morapedi ya kgomaretseng molao le ha ho le jwalo a sa laole leleme la hae jwalo ka ha eka ke ka tomo, empa a tswela pele ho thetsa pelo ya hae, mofuta wa borapedi wa motho enwa ke lefeela. Mofuta wa borapedi o hlwekileng le o sa silafalang ponong ya Modimo le Ntate wa rona ke ona: ho hlokomela dikgutsana le bahlolohadi matshwenyehong a bona, le hore motho a ipoloke a se na letheba lefatsheng.” (Jakobo 1:​26, 27) Bibele ya King James Version e sebedisa lentswe “borapedi bo hlwekileng” ha e bua ka borapedi bona bo se nang boikaketsi.