Ha re re o ile vacationeng, mme o batla ho bolella metswalle ya hao ka seo o se etsang moo! Empa o tla etsa seo jwang? Na o tla

1.   romella e mong le e mong lengolo?

2.   ngolla e mong le e mong e-mail?

3.   beha dinepe inthaneteng?

 Ha nkgono wa hao le ntatemoholo wa hao ba ne ba lekana le wena, ba ne ba tla kgetha “A”.

 Ha batswadi ba hao bona mohlong ba ne ba ka kgetha “B”.

 “C.” e ratwa ho sebediswa ke batjha ba bangata kajeno. Wena? Haeba ho jwalo, sehlooho sena se tla o thusa ho qoba dikotsi tse itseng.

•  Ho na le melemo efe ha o beha dinepe inthaneteng?

•  Ho na le dikotsi dife ka ho beha dinepe inthaneteng?

•  Seo o ka se etsang

•  Seo batjha ba bang ba se buang

 Di hlaha kapele. “Ha ke tswa leetong le monate kapa ke ne ke dutse le metswalle ya ka ho le monate, ke batla ho beha dinepe tsa ka inthaneteng hang hang ke ntse ke thabetse ntho eo.”​—Melanie

 E bonolo ho e sebedisa. “Ho bonolo haholo ho sheba dinepe tsa moraorao tseo metswalle ya ka e di behang inthaneteng, ho e na le ho ba romella e-mail ho ba botsa hore na ba ntse ba etsang.”​—Jordan

 E o thusa ho dula o bua le batho. “Ba bang ba lelapa la heso le metswalle ya ka ba dula hole. Ha ba beha dinepe tsa bona inthaneteng kgafetsa mme ke di sheba, ho tshwana le ha eka ke ya ba bona!”​—Karen

 O ka beha bophelo ba hao kotsing. Haeba khamera ya hao e kgona ho bontsha sebaka seo o leng ho sona, ha o beha senepe inthaneteng, e ka kgona ho fana le ka boitsebiso boo o neng o sa batle batho ba bo tsebe. “Ho beha dinepe inthaneteng tse nkilweng ka khamera e kgonang ho bontsha sebaka seo o leng ho sona, ho ka thusa batho ba batlang ho o ntsha kotsi ho fumana hore o sebakeng se fe” ke seo ditsebi tsa website ya Digital Trends di se buang.

 Bonneteng, dinokwane tse ding di batla ho feela ha o le siyo hae. Ditlaleho tse ding tseo Digital Trends e di bontshang, ke hore matlo a 18 a ile a kenelwa ke mashodu a mararo nakong eo ho neng ho sena batho hae. Mashodu ao a ne a tseba jwang hore batho ba tla be ba le siyo hae? Ba ile ba kena inthaneteng, ba sheba metsamao ya malapa ao, hore na ba ya hokae hona neng, ka lebaka leo ba ile ba kgona ho utswa dintho tsa boleng ba didolara tse 100,000.

 O ka bona dintho tse kgopisang. Batho ba bang ha ba na dihlong tsa ho beha eng kapa eng inthaneteng e le hore batho ba ka bona. Motjha e mong ya bitswang Sarah o re: “Bothata bo ka hlaha ha o ntse o sheba dinepe tsa batho bao o sa ba tsebeng. Ho tshwana le ha eka o tsamaya motseng oo o sa o tsebeng ebile o se na le mmapa wa ona. O tlo qetella o le sebakeng seo o neng o sa batle ho ba ho sona.”

 O ka senya nako e ngata. Yolanda eo a ntseng a le motjha dilemong o re “Ho bonolo hore o iphumane o qetile nako e ngata o ntse o sheba dinepe tsa batho ebile o ntse o bala seo batho ba bang ba se buang ka tsona. O ka ya boholeng ba hore o dule o batla ho ntsha phone ya hao motsotso o mong le o mong e le hore feela o bone hore na ho se ho hlahileng e ntjha.”

 Motjha e mong ya bitswang Samantha o dumellana le seo. “Ke lokela ho sheba hore na ke qeta nako e kae ke le inthaneteng. O tlameha ho ba le boitshwaro haeba o le motho ya behang dinepe inthaneteng.”

•   Leka ka hohle ho qoba ho sheba dintho tse kgopisang. Bibele e re: “Nke ke ka beha letho le se nang molemo ka pela mahlo a ka.”​—Pesaleme ya 101:3.

   “Ke dula ke sheba dinepe tsa batho bao ke ba tsebang inthaneteng , mme ha ke bona ba beha dinepe tse kgopisang, ke kgaotsa ho di sheba.”​—Steven.

•   O se ke wa etsa setswalle inthanetheng le batho ba sa rateng Jehova, hobane ba ka senya kamano ya hao le Jehova. Bibele e re: “Le se ke la thetswa. ditlwaelano tse mpe di senya mekgwa e metle.”​—1 Bakorinthe 15:33.

   “O se ke wa sheba dintho hobane feela di le fesheneng. Hangata ke moo o tla utlwa ditlhapa, o be o bone le ditshwantsho tsa batho ba tsotseng le tse ding tse tshosang.”​—Jessica.

•   Ipehele nako ya hore o tla kena inthaneteng nako e kae le hore o tla beha dinepe neng. Bibele e re: “Kahoo le dule le lebetse ka tiyo hore kamoo le tsamayang kateng hase jwalo ka batho ba seng bohlale empa ke jwalo ka ba bohlale, le ithekele nako e loketseng.”​—Baefese 5:​15,16.

   “Ha ke sa sheba dinepe tsa batho ba ratang ‘mponeng.’ Ka mohlala, ha motho a ile lewatleng o nka dinepe tse 20 tse tshwanang ebe o di beha inthaneteng. Na ke ntho e utlwahalang eo? Ho senya nako e ngata ho sheba dinepe tseo kaofela!”​—Rebekah.

•   Etsa bonnete ba hore dinepe tseo o di behang inthaneteng ha di fe batho ba bang mohopolo o fosahetseng wa hore o kgathalla wena feela. Mongodi e mong wa Bibele Pauluse o ile a re: “ke bolella e mong le e mong moo hara lona hore a se ke a inahana haholo ho feta kamoo ho hlokahalang ho nahana.” (Baroma 12:3) O se ke wa nahana hore metswalle ya hao e tla dula e thabela ho bona hore na o ntse o beha eng inthaneteng.

   “Ba bang bona ba nka dinepe tsa di selfie tse ngata. Haeba o motswalle wa ka, ke ya tseba hore o shebahala jwang, ha ho hlokahale hore o nne o nkgopotse hore na o shebahala jwang ka ho behe dinepe tse ngata inthaneteng!”​—Allison.