•  Ke hobaneng ha ke ikutlwa tjee

•  Dintho tse tharo tseo o ka di etsang

•  DIthaka tsa hao di reng

 Ho fetofetoha ha maikutlo ho tlwaelehile ha motho a le dilemong tse pakeng tsa 13 le 19 kapa a le dilemong tsa botjha. Le haeba o le qetellong ya dilemo tsena, o ka nna wa makatswa ke kamoo maikutlo a hao a ntseng a fetofetoha kateng.

 Haeba ha o tsebe hore ke hobaneng ha maikutlo a hao a ntse a fetofetoha tjena, hopola hore maikutlo a jwalo hangata a bakwa ke ho fetofetoha ha di hormone, haesita le ho se itshepe le ho tshwenyeha ho bang teng ha motho a ntse a hola. Ntho e thabisang ke hore, o ka kgona ho sebetsana le maikutlo a hao.

 Nnete ke hore: Ho ithuta ho laola maikutlo a hao hona jwale, ho ka o thusa ho sebetsana le maemo a fapaneng a bophelo ha o se o hodile.

 Bua. Bibele e re: “Motswalle wa nnete o lerato ka dinako tsohle, mme ke morabo motho ya tswaletsweng ha ho ena le mahlomola”​—Liproverbia 17:17.

 “Lapeng re na le motswalle ya haufiufi eo ke mo nkang jwalo ka mmangwane. O mmamela ka hloko ha ke bua le yena e leng se etsang hore ke ikutlwe ke phuthulohile ha ke bua le yena. O a mpabatsa haeba ke nahana dintho tse nepahetseng, empa ha ke fositse le teng o mpha keletso ka bonolo.”​—Yolanda.

 Keletso: Ho e na le hore o buisane le thaka tsa hao feela, tseo ho ka etsahalang hore di na le bothata bo tshwanang le ba hao, bua le motswadi kapa motho e mong e moholo eo o mo tshepang.

 Ngola. Bibele e bua ka Jobo eo ha a ne a nyahame a ileng a re: “Ke tla bonahatsa ho tshwenyeha ha ka ka nna. Ke tla bua ka moya o utlwileng bohloko!” (Jobo 10:1) Ntle le ho bua le motho e mong, ntho e nngwe eo o ka e etsang ho “ntsha” maikutlo a hao ke ka hore o a ngole fatshe.

 “Ke dula ke tsamaya ka notepad hohle moo ke yang. Ha ho etsahala ntho e nkwatisang, ke e ngola fatshe. Ho ngola maikutlo a ka ho nthusa haholo.”​—Iliana.

 Keletso: Eba le diary eo o ka ngolang kamoo o ikutlwang kateng, se entseng hore o ikutlwe jwalo le hore o ka sebetsana le sona jwang. Leqephe la ho ngolla la sehlooho sena le ka o thusa ho etsa seo.

 Rapela. Bibele e re: “Lahlela morwalo wa hao ho Jehova, O tla o tshehetsa. Le ka mohla a ke ke a dumella ya lokileng hore a therekele.”​—Pesaleme ya 55:22.

 “Ke dula ke rapela Jehova kamehla ha ke nyahame. Ke ikutlwa ke imolohile ka mora hore ke tshollele pelo ya ka ho yena.”​—Jasmine.

 Keletso: Ho sa tsotelle ho ferekana ho ka bang teng, nahana ka dintho tse tharo tseo o ka di thabelang bophelong ba hao. Hao rapela, kopa thuso ho Jehova empa o se ke wa lebala ho mo leboha ka ditlhohonolofatso tseo a o fileng tsona.