Umbuto lomayelana nenjongo yekuphila ungabutwa ngetindlela letehlukahlukene, njengekutsi Sadalelwani? nobe Kuphila kwami kunayo yini injongo? LiBhayibheli liveta kutsi injongo yetfu yekuphila kutsi sakhe buhlobo naNkulunkulu. Cabanga nganankha lamanye emaciniso labalulekile lavetwa liBhayibheli.

•   Nkulunkulu unguMdali wetfu. LiBhayibheli litsi: “Nguye [Nkulunkulu] lowasidala, asitidalanga.”​—Tihlabelelo 100:3; Sembulo 4:11.

•   Nkulunkulu unenjongo yayo yonkhe intfo layidalako, lokufaka ekhatsi natsi.​—Isaya 45:18.

•   Nkulunkulu wasidala sinesidzingo sekwati ‘tintfo letiphatselene naye,’ lokufaka ekhatsi sifiso sekwati injongo yekuphila. (Matewu 5:3) Ufuna sisenetise lesifiso.​—Tihlabelelo 145:16.

•   Senetisa sifiso sekwati tintfo letiphatselene naNkulunkulu ngekutsi sakhe buhlobo naye. Nanobe kuba nebuhlobo naNkulunkulu kungabonakala kungeke kwenteke kulabanye, liBhayibheli liyasikhutsata: “Sondzelani kuNkulunkulu, naye utawusondzela kini.”​—Jakobe 4:8; 2:23.

•   Kuze sibe bangani baNkulunkulu kufanele siphile ngekuvumelana nenjongo yakhe ngatsi. LiBhayibheli liyayiveta lenjongo kuMshumayeli 12:13: “Yesaba Nkulunkulu weliciniso futsi ugcine imiyalo yakhe, ngobe nguloku lokubaluleke kakhulu umuntfu lokufanele akwente.”

•   Esikhatsini lesitako, sitayibona ngalokugcwele injongo yaNkulunkulu yasekucaleni ngatsi, nakasusa kuhlupheka futsi anika bangani bakhe nobe labo labamkhontako kuphila lokuphakadze.​—Tihlabelelo 37:10, 11.