Batali labanyenti ababavumeli bantfwana babo kutsi basebentise tinhlelo tekuchumana ngenca yebungoti lobukhona kuto. Nobe kunjalo, nangabe ukhetsa kumvumela umntfwana wakho loseminyakeni yekutfomba kutsi asebentise tinhlelo tekuchumana, ungamsita njani kutsi atibalekele letingoti futsi atisebentise kahle letinhlelo tekuchumana?

Kulesihloko

•  Lokubalulekile kumntfwana wakho

•  Indlela umntfwana wakho lativa ngayo

•  Indlela umntfwana wakho latiphatsa ngayo nakasebentisa tinhlelo tekuchumana

•  Leningacoca ngako

 Lokufanele ukwati: Ngenca yekutsi akusimelula kuyekela tinhlelo tekuchumana, umntfwana wakho angahle adzinge umsite kuze alawule sikhatsi lasicitsa kuletinhlelo tekuchumana.

 Simiso seliBhayibheli: “[Ciniseka] ngetintfo letibaluleke kakhulu.”​—KubaseFiliphi 1:10.

 Longacabanga ngako: Indlela umntfwana wakho lasebentisa ngayo tinhlelo tekuchumana imenta angasalali kahle yini, angasawenti umsebenti wesikolwa kahle nobe angasacitsi sikhatsi nemndeni? Bacwaningi batsi bantfu labasha badzinga kulala ema-awa langu-9 ngelilanga, kodvwa labo labacitsa sikhatsi lesinyenti bakuletinhlelo tekuchumana kungenteka balale ema-awa langu-7 nobe ngephansi.

 Longakwenta: Coca nemntfwana wakho ngetintfo letibalulekile, futsi nicoce ngetindlela letihlakaniphile tekulinganisela sikhatsi lasicitsa kuletinhlelo tekuchumana. Beka imitsetfo lekhombisa kucabangela, njengekutsi angangeni netintfo tebuchwephesha ekamelweni lakhe nakayolala. Umgomo wakho kusita lona losemusha kutsi akwati kutibamba, lokubuntfu lobutamsita nasekamdzala.​—1 KubaseKhorinte 9:25.

 Lokufanele ukwati: Kubuka titfombe kanye naloko lokwentiwa bangani bakhe kuletinhlelo tekuchumana kungenta umntfwana wakho ative ashiywa ngaphandle, akhatsatekile futsi acindzetelekile.

 Simiso seliBhayibheli: “Lahlani . . . umona.”​—1 Phetro 2:1.

 Longacabanga ngako: Kusebentisa tinhlelo tekuchumana kwenta umntfwana wakho aticatsanise nalabanye yini ngendlela labukeka ngayo? Umntfwana wakho uva shengatsi kuphila kwalabanye kuyajabulisa yini kunekwakhe?

 Longakwenta: Coca nemntfwana wakho ngetingoti tekuticatsanisa nalabanye. Khumbula kutsi loku kuwatsintsa kakhulu emantfombatane kunebafana ngoba wona anendzaba kakhulu nendlela labukeka ngayo kanye nebuhlobo lanabo nalabanye. Ungaphindze umcele kutsi ahle atinika sikhatsi sekungatisebentisi letinhlelo tekuchumana. Lelinye lijaha lokutsiwa nguJacob latsi: “Kwendlula sikhatsi lesitsite ngite tinhlelo tekuchumana elucingweni lwami. Loko kwangisita kutsi ngibone kutsi yini lebaluleke sibili, futsi ngaba nesitfombe lesifanele ngami kanye nangalabanye.”

 Lokufanele ukwati: Kuba setinhlelweni tekuchumana kufana nekuphila imphilo yakho embikwesicumbi sebantfu. Kutawenteka kutsi nicabane nobe ningevani nalabatsite.

 Simiso seliBhayibheli: “Lahlani tonkhe tinhlobo tenzondo, intfukutselo, lulaka, umsindvo, inkhulumo lehlabako . . . nibophatsana ngemusa.”​—Kubase-Efesu 4:31, 32.

 Longacabanga ngako: Tinhlelo tekuchumana tenta umntfwana wakho atikhandze sekahleba yini, acabene nalabanye nobe sekakhuluma emavi langasikahle?

 Longakwenta: Sita umntfwana wakho ati kutsi angatisebentisa njani kahle tinhlelo tekuchumana. Incwadzi letsi Digital Kids itsi: “Kungumsebenti wetfu njengebatali kufundzisa bantfwana betfu kutsi kuba nelunya akwemukeleki; kungaba setinhlelweni tekuchumana nobe nanibonana matfupha.”

 Khumbula kutsi tinhlelo tekuchumana atikabaluleki, futsi akusibo bonkhe batali labavumela bantfwana babo kutsi batisebentise. Nawumvumela umntfwana wakho kutsi atisebentise letinhlelo tekuchumana, kufanele uciniseke kutsi ukhule ngalokwenele kutsi angakhona kulawula sikhatsi lasisebentisa kuto, unabo bangani langacoca nabo buso nebuso futsi akatibukeli tintfo lokungakafaneli atibukele.