•  Lokufanele ukwati

•  Longakwenta

•  Lokushiwo bontsanga yakho

•   Kute budlelwane lobute tinkinga. Ngenca yekutsi sinesono, umngani wakho, ngisho nemuntfu losondzelene naye kakhulu angahle ente, nobe asho intfo letakuvisa buhlungu. Kuliciniso kutsi nawe uyawenta emaphutsa. Ecinisweni, kungenteka ukhona umuntfu lomkhumbulako nawe loke wamuvisa buhlungu ​—Jakobe 3:2.

•   Tinkundla tekuchumana tingenta kube melula kutsi bantfu bakuvise buhlungu. Sibonelo nje, Losemusha lokutsiwa nguDavid utsi: “Nawungena etinkhundleni tekuchumana futsi ubona titfombe temngani wakho asemcimbini, ungase utibute kutsi wena awukamenywa leni. Loko kungakuvisa buhlungu kakhulu.”

•   Ungayitfola indlela yekulungisa lenkinga.

 Tihlolisise. LiBhayibheli litsi: “Ungasheshi utfukutsele, ngobe intfukutselo ihlala esifubeni setilima.”​—Umshumayeli 7:9, umbhalo longentasi.

 “Ngekuhamba kwesikhatsi ungase ubone kutsi utfukutseliswa lite.”​—Alyssa

 Longacabanga ngako: Usheshe utfukutsele yini? Ungawabeketelela yini kakhudlwana emaphutsa alabanye?​—Umshumayeli 7:21, 22.

 Cabanga ngetinzuzo tekucolela labanye. LiBhayibheli litsi: “Futsi nangabe atsalalisa nakoniwa utawuhlonishwa.”​—Taga 19:11.

 “Ngisho unesizatfu sekukhonona, kuyintfo lenhle kucolela ngalokukhululekile, loku kusho kutsi ungabambi ligcubu. Ungachubeki ukhuluma ngaleliphutsa lomuntfu lalentile ufune njalo aphele kucolisa. Nase umcolele, kwendlulise, ungaphindzi ukhulume ngako.”​—Mallory.

 Longacabanga ngako: Leliphutsa likhulu yini vele? Ungacola yini kuze kube nekuthula?​—KubaseKholose 3:13.

 Cabangela. LiBhayibheli litsi: “ningaticabangeli nine kuphela, kodvwa nicabangele nalabanye.”​—KubaseFiliphi 2:4.

 “Nangabe nihloniphana futsi nitsandzana njengebangani nitolungisa tinkinga ngekushesha ngobe anifuni kulahlekelwa ngulobungani benu.”​—Nicole.

 Longacabanga ngako: Zama kubona tintfo ngendlela lolomunye latibona ngayo​—KubaseFiliphi 2:3.

 Lokubalulekile: Likhono lekukwati kulungisa tinkinga litakusita ngisho sewukhulile. Yini ungacali manje kufundza lelikhono?