1, 2. Jesu utivete angumcondzisi lohlakaniphile ngayiphi indlela?

 TIBONE ngeliso lengcondvo uhanjiswa ngumuntfu lonalokuhlangenwe nako lohambisa tivakashi, anihambisa edolobheni lelimangalisako futsi lelihle. Wena nalabo lohamba nabo niyacala kulibona lelidolobha, ngako nilalela konkhe lanitjela kona. Ngaletinye tikhatsi wena naletivakashi nititfola nilangatelela kwati ngetintfo letikulelidolobha lenisengakatiboni. Nanibuta lomuntfu lonihambisako mayelana nato, uvele anganiphendvuli kudzimate kube sikhatsi lesifanele sekwenta njalo, nobe aniphendvule lapho senikubona loko lebenikubuta. Njengobe nichubeka nihamba, nimangaliswa kuhlakanipha kwalona lonihambisako, ngobe unitjela loko lenifuna kukwati ngesikhatsi lekufanele nikwati ngaso.

² EmaKhristu eliciniso nawo asesimeni lesifanana nesalabantfu labavakashile. Sifundza ngekutimisela mayelana nelidolobha lelimangalisa kakhulu, ‘lokulidolobha lelinetisekelo leticinile,’ lelimelela uMbuso waNkulunkulu. (Heb. 11:10) Ngesikhatsi Jesu alapha emhlabeni, wacondzisa balandzeli bakhe ngekubanika lwati lolujulile lolumayelana naloyo Mbuso. Wayiphendvula yonkhe yini imibuto yabo waphindze wabatjela konkhe lokumayelana naloMbuso ngesikhatsi sinye? Cha, akazange. Watsi: “Kunetintfo letinyenti lokusafanele nginitjele tona, kodvwa ngeke nikwati kuticondza nyalo.” (Joh. 16:12) Njengobe ahlakaniphe kwendlula bonkhe bantfu labahambisa tivakashi, Jesu akazange etfwese bafundzi bakhe ngelwati lebebangeke bakhone kulwetfwala.

3, 4. (a) Jesu uchubeke njani afundzisa bantfu labetsembekile ngeMbuso waNkulunkulu? (b) Sitawucoca ngani kulesehluko?

³ Jesu washo lamavi labhalwe kuJohane 16:12 ngebusuku bakhe bekugcina aphila emhlabeni. Ngemuva kwekufa kwakhe, abetawuchubeka abafundzisa njani bantfu labetsembekile mayelana neMbuso waNkulunkulu? Wacinisekisa baphostoli bakhe ngalamavi latsi: “Umoya lowembula liciniso utanihola, khona nitelicondzisisa liciniso.” a (Joh. 16:13) Umoya longcwele singase siwutsatse njengemuntfu lonesineke lohambisa tivakashi. Jesu usebentisa lomoya kute afundzise balandzeli bakhe konkhe labadzinga kukwati mayelana neMbuso waNkulunkulu, ngesikhatsi labadzinga kukwati ngaso.

⁴ Ase sicoce ngendlela umoya longcwele waJehova lobewusolo ucondzisa ngayo emaKhristu lacotfo elwatini lolukhulu  lolumayelana naloyo Mbuso. Kwekucala, sitawucoca ngendlela lesisicondza ngayo sikhatsi uMbuso waNkulunkulu lowacala ngaso kubusa. Ngemuva kwaloko sitawuhlola kutsi bobani labatawubusa kuwo nekutsi bobani tikhonti tawo, siphindze sihlole nematsemba labanawo. Ekugcineni, sitawubona kutsi balandzeli baKhristu bakutfola njani kucondza lokucacile lokumayelana nekutsi kusho kutsini kwetsembeka kuloMbuso.

5, 6. (a) Ngumuphi umbono loliphutsa Bafundzi BeliBhayibheli lebebanawo mayelana nekucala kwekubusa kweMbuso kanye nekuvuna? (b) Kungani lemibono leliphutsa kungakafaneli isente singabate kutsi Jesu abebacondzisa balandzeli bakhe?

⁵ Njengobe sifundzile eSehlukweni 2 salencwadzi, Bafundzi BeliBhayibheli bacitsa iminyaka leminyenti bachaza kutsi 1914 abetawuba ngumnyaka lobaluleke kakhulu ekugcwalisekeni kwesiphrofetho seliBhayibheli. Nanobe kunjalo, ngaleso sikhatsi bebakholelwa kutsi kuba khona kwaKhristu bekucale nga-1874, nekutsi wacala kubusa ezulwini nga-1878, kanye nekutsi uMbuso bewungeke ubekwe ngalokuphelele kuze kube ngu-October 1914. Bebacabanga nekutsi kuvuna bekutawuba khona kusukela nga-1874 kuya ku-1914 futsi kuphetse ngekubutselwa kwalabagcotjiwe ezulwini. Imibono leliphutsa lefanana nalena isenta singabate yini kutsi Jesu bekacondzisa laba labetsembekile ngemoya longcwele?

⁶ Cha, akusenti singabate! Ase uphindze ucabange ngemfanekiso wetfu lesicoce ngawo ekucaleni. Ucabanga kutsi imibono yaletivakashi leshiwo singakefiki sikhatsi kanye nemibuto letiyibuta ngemdlandla yenta kutsi tingametsembi yini lomuntfu lotihambisako? Cha! Ngendlela lefananako, nanobe ngaletinye tikhatsi bantfu baNkulunkulu betama kucondza imininingwane lemayelana nenjongo yaJehova sisengakefiki sikhatsi sekutsi umoya longcwele ubacondzise kulawo maciniso, kuyacaca kutsi Jesu uyabahola. Ngaleyo ndlela, bantfu labetsembekile bahlale bakulungele kulungiswa futsi bayayishintja imibono yabo ngekutfobeka.​—Jak. 4:6.

7. Bantfu baNkulunkulu babusiswa ngakuphi kubhanyata kwekukhanya lokuvela kuye?

⁷ Eminyakeni leyalandzela 1919, bantfu baNkulunkulu babusiswa ngekubhanyata kwekukhanya lokuchubekako lokuvela kuNkulunkulu. (Fundza Tihlabelelo 97:11.) Nga-1925, ku-Sicongosekulindza kwavela sihloko lesacopha umlandvo, lebesitsi “Kutalwa Kwesive.” Lesihloko saniketa bufakazi lobusekelwe emiBhalweni nalobucinisekisako bekutsi uMbuso WaNkulunkulu Lobuswa NguMesiya watalwa nga-1914, futsi loko kwagcwalisa siphrofetho lesimayelana nemfati waNkulunkulu wasezulwini lobeleka umntfwana, njengobe kuboniswa kuSembulo sehluko 12. b Lesihloko sachubeka sichaza kutsi kuphatfwa kabi kanye nebumatima lobebehlela bantfu baJehova ngaleyo minyaka yetimphi, bekusibonakaliso lesicacile sekutsi Sathane abejikijelwe emhlabeni, “atfukutsele kakhulu, ati kutsi unesikhatsi lesincane.”​—Semb. 12:12.

8, 9. (a) Kubaluleka kweMbuso waNkulunkulu kwacala nini kuvela? (b) Ngumiphi imibuto lesitawucoca ngayo?

⁸ Ubaluleke kangakanani loMbuso? Nga-1928, Sicongosekulindza sacala kugcizelela kutsi uMbuso bewubaluleke kakhulu kwendlula kusindziswa kwemuntfu ngamunye ngenhlawulo. Kuyacaca  kutsi ngeMbuso wakhe lobuswa nguMesiya, Jehova utawungcwelisa libito lakhe, amelele bukhosi bakhe, futsi afeze tonkhe tinjongo takhe mayelana nebantfu.

⁹ Bobani labatawubusa naKhristu kuloyo Mbuso? Bobani labatawuba tikhonti tasemhlabeni taloMbuso? Ngumuphi umsebenti lokufanele wentiwe balandzeli baKhristu?

10. Yini bantfu baNkulunkulu lebebasolo bayicondza mayelana nalabangu-144 000?

¹⁰ Emashumini eminyaka ngaphambi kwa-1914, emaKhristu eliciniso abesavele acondza kutsi balandzeli baKhristu labetsembekile labangu-144 000, bebatawubusa naye ezulwini. c LaBafundzi BeliBhayibheli babona kutsi leli bekulinani lelicondzile, futsi lacala kubutfwa esikhatsini sebaphostoli.

11. Labo lebebatawuba ngemalunga amakoti waKhristu batfutfuka njani elwatini lolumayelana nemsebenti wabo wasemhlabeni?

¹¹ Ngako-ke, labo lebebatawuba ngemalunga amakoti waKhristu, bebabelwe kutsi benteni ngesikhatsi basesemhlabeni? Babona kutsi Jesu abegcizelele umsebenti wekushumayela futsi abewufananise nesikhatsi sekuvuna. (Mat. 9:37; Joh. 4:35) Njengobe sibonile eSehlukweni 2, kwaphela sikhatsi lesidze bacabanga kutsi sikhatsi sekuvuna besitawutsatsa iminyaka lengu-40, lebeyitawuphela ngekubutselwa kwalabagcotjiwe ezulwini. Nanobe kunjalo, ngenca yekutsi lomsebenti wachubeka nangemuva kwekuphela kwaleminyaka lengu-40, kunyenti kucaciswa lobekusadzingeka. Nyalo siyati kutsi sikhatsi sekuvuna​—lokusikhatsi sekuhlukanisa kolo elukhuleni, lokusho kuhlukaniswa kwemaKhristu lagcotjiwe letsembekile, ehlukaniswa kumaKhristu emanga, sacala nga-1914. Besesifikile sikhatsi sekutsi kunakwe kubutfwa kwelinani lelisele lalabagcotjiwe.

12, 13. Umfanekiso waJesu wetintfombi letilishumi kanye nemfanekiso wemathalenta, ugcwaliseke njani emalangeni ekugcina?

¹² Kusukela nga-1919, Khristu wachubeka acondzisa sisebenti lesetsembekile nalesihlakaniphile kutsi sigcizelele kubaluleka kwemsebenti wekushumayela. Wasinika lomsebenti ngesikhatsi sebaphostoli. (Mat. 28:19, 20) Waphindze waveta kutsi ngubuphi buntfu balandzeli bakhe labagcotjiwe lebekufanele babe nabo kute bafeze lomsebenti wekushumayela. Wakwenta njani loko? Emfanekisweni wakhe wetintfombi letilishumi, wakhombisa kutsi laba labagcotjiwe bekufanele bahlale balindzile, baphapheme ebuhlotjeni babo naNkulunkulu nangabe bafuna kufinyelela umgomo wabo wekuhlanganyela edzilini lelikhulu lemshado  lelisezulwini, lapho Khristu atawuhlangana khona ‘namakoti’ wakhe walabangu-144 000. (Semb. 21:2) Ngako emfanekisweni wakhe wemathalenta, Jesu wafundzisa kutsi tinceku takhe letigcotjiwe betitawenta ngekukhutsala lomsebenti wekushumayela latinike wona.​—Mat. 25:1-30.

¹³ LamaKhristu lagcotjiwe ativete aphapheme futsi akhutsele kuleminyaka lelikhulu leyendlulile. Asingabati kutsi kuhlala kwawo alindzile kutawuba nemvuzo. Nanobe kunjalo, lomsebenti wekuvuna lomkhulu bewutawugcina ngekubutfwa kwabo bonkhe labangu-144 000 labatawubusa naKhristu yini?

14, 15. Ngumaphi emacembu lamane lokwacocwa ngawo encwadzini letsi “The Finished Mystery”?

¹⁴ Emadvodza kanye nebafati labetsembekile bebasolo bafuna kwati mayelana ‘nalesicumbi lesikhulu’ lokukhulunywa ngaso kuSembulo 7:9-14. Akumangalisi kutsi ngesikhatsi Khristu asengakalembuli lelicembu lelikhulu, kunyenti lebesekuvele kushiwo lokwehluke kakhulu emacinisweni lacacile, lamelula, lesiwatiko futsi lesiwatsandzako lamuhla.

¹⁵ Nga-1917, incwadzi letsi “The Finished Mystery” yatsi: “Kunetincenye nobe tinhlobo letimbili tekusindziswa kwaseZulwini, kanye netincenye nobe tinhlobo letimbili tekusindziswa kwasemhlabeni.” Bobani lebebakha lamacembu lamane ebantfu labanematsemba alokusindziswa lokungafani? Bekucala, bekungulabangu-144 000 lebebatawubusa naKhristu. Besibili, bekusicumbi lesikhulu. Ngaleyo minyaka, bekucatjangwa kutsi lawa ngemaKhristu labesolo asemasontfweni eTinkholo Letitsi TebuKhristu. Bekanako kukholwa, kodvwa bekungakeneli kutsi kungawenta akhone kuchubeka acotfo. Ngako-ke, bekatawuniketwa sikhundla lesiphansi ezulwini. Mayelana nemhlaba, bekucatjangwa kutsi licembu lesitsatfu “belilebantfu basendvulo lebebalungile”​—labafaka ekhatsi bantfu labetsembekile njenga-Abrahama, Mosi kanye nalabanye, lebebatawutfola ligunya ngetulu kwelicembu lesine, lokubantfu labasemhlabeni wonkhe.

16. Ngukuphi kubhanyata kwekukhanya lokuvela kuNkulunkulu lokwaba khona nga-1923 nanga-1932?

¹⁶ Umoya longcwele wabacondzisa njani balandzeli baKhristu ekucondzeni lesikujabulelako lamuhla? Loku kwenteka ngendlela lechubekako, ngelusito lwekubhanyata kwekukhanya lokuvela kuNkulunkulu lobekuvela kancane kancane. Kusukela nga-1923, Sicongosekulindza sanaka licembu lalabo labete litsembe lekuya ezulwini, labatawuphila emhlabeni ngaphansi kwekubusa kwaKhristu. Nga-1932, Sicongosekulindza sacoca ngaJonadaba (Jehonadabi), lowatisondzeta eNkhosini yaka-Israyeli lenguJehu, lebeyibekwe nguNkulunkulu, futsi Jonadaba wayisekela ekulweni nekukhonta kwemanga. (2 Khos. 10:15-17) Lesihloko satsi bekunelicembu lebantfu etikhatsini talamuhla lebelifanana naJonadaba, futsi sachubeka satsi Jehova abetawenta kutsi lelicembu “lisindze e-Amagedoni,” kute liphile lapha emhlabeni.

17. (a) Nga-1935, ngukuphi kubhanyata lokukhulu kwekukhanya lokuvela kuNkulunkulu lokwaba khona? (b) EmaKhristu letsembekile kwawatsintsa njani kucondza lokusha lokumayelana nesicumbi lesikhulu? (Fundza libhokisi lelitsi “ Kwaba Nekukhululeka Lokukhulu.”)

¹⁷ Nga-1935, kwaba nekubhanyata lokukhulu kwekukhanya lokuvela kuNkulunkulu. Emhlanganweni lebewuseWashington, D.C., kwatsiwa sicumbi lesikhulu silicembu lelitawuphila  emhlabeni, lelimelela timvu lokukhulunywa ngato emfanekisweni waJesu wetimvu netimbuti. (Mat. 25:33-40) Lesicumbi lesikhulu besitawuba yincenye ‘yaletinye timvu’ Jesu latsi: ‘Nato kufanele ngitiletse.’ (Joh. 10:16) Ngesikhatsi uMzalwane J. F. Rutherford abeka lenkhulumo watsi: “Ngicela bonkhe labanelitsemba lekuphila phakadze emhlabeni basukume,” kwasukuma bantfu labanyenti, labangetulu kwehhamfu yalabo lebebakhona. Wachubeka watsi: “Bukani, lesi ngiso sicumbi lesikhulu!” Labantfu labanyenti batsintseka kakhulu njengobe besebalicondza litsemba labo lesikhatsi lesitako.

18. Balandzeli baKhristu bawunakisisa njani umsebenti wekushumayela, futsi loko kwaba namuphi umphumela?

¹⁸ Kusukela lapho, Khristu abecondzisa bantfu bakhe kutsi banakisise kubutfwa kwalabo labatawuba ngemalunga alesicumbi lesikhulu labatawubonakala ekuhluphekeni lokukhulu futsi labatawuphila ngesikhatsi sako baphindze basindze kuko. Ekucaleni, lokubutfwa kwalesicumbi bekubonakala kungajabulisi. UMzalwane Rutherford waze watsi: “Kubonakala shengatsi ‘lesicumbi lesikhulu’ angeke sibe sikhulu.” Kuliciniso kutsi nyalo siyati kutsi Jehova uwubusise kangakanani umsebenti wekuvuna kusukela ngaleso sikhatsi. Njengobe bacondziswa nguJesu nangumoya longcwele, labagotjiwe kanye nalabo lababambisene nabo ‘baletinye timvu,’ bente kona kanye loko Jesu lakubiketela​—babe “ngumhlambi munye” losebenta ngephansi ‘kwemelusi munye.’

19. Tsine singaba nayo njani incenye ekukhuliseni sicumbi lesikhulu?

¹⁹ Lesicumbi lesikhulu sebantfu labetsembekile sitawuphila phakadze emhlabeni lolipharadisi, sibuswe nguKhristu kanye nalabangu-144 000 labatawubusa naye. Kusijabulisa kakhulu kucabanga ngendlela Khristu labacondzise ngayo bantfu baNkulunkulu kulelitsemba lesikhatsi lesitako lelicacile futsi lelisekelwe emiBhalweni. Kulilungelo kuhlanganyela lelitsemba nalabo lesibatfola ensimini. Ngako-ke, asitimisele nangabe timo tetfu tivuma kutsi sandzise lelinani lesicumbi lesikhulu, kute kudvunyiswa kwelibito laJehova kwandze kakhulu.​—Fundza Lukha 10:2.

20. Inhlangano yaSathane yakhiwa ngutiphi tincenye, futsi kwetsembeka kwemaKhristu kutsintseka njani?

²⁰ Njengobe bantfu baNkulunkulu bebachubeka bafundza mayelana neMbuso, bekusadzingeka nekutsi bakucondze kahle loko lokushiwo kwetsembeka kulohulumende wasezulwini. Mayelana naloko, nga-1922, Sicongosekulindza satsi kunetinhlangano letimbili letisebentako, inhlangano yaJehova neyaSathane; kulena yaSathane kunetekutsengiselana, tinkholo kanye netembusave. Labo labetsembekile eMbusweni waNkulunkulu lobuswa nguKhristu, akukafaneli bafake kwetsembeka kwabo engotini ngekutsi babe nencenye kunobe ngusiphi sici senhlangano yaSathane. (2 Khor. 6:17) Kusho kutsini loko?

21. (a) Sisebenti lesetsembekile sibecwayise njani bantfu baNkulunkulu mayelana nemabhizinisi lamakhulu? (b) Nga-1963, Sicongosekulindza sembula ini mayelana ‘neBhabhulona Lenkhulu’?

²¹ Kudla lokuvela kuNkulunkulu lokulungiswa sisebenti lesetsembekile, bekusolo kuveta konakala kwemabhizinisi lamakhulu futsi kwecwayisa bantfu baNkulunkulu kutsi bangahungwa kutsandza umcebo lokuyintfo levamile. (Mat. 6:24) Ngalokufananako, tincwadzi tetfu nato betichubeka tembula tinkholo  letiyincenye yenhlangano yaSathane. Nga-1963, Sicongosekulindza sakhombisa ngalokucacile kutsi “iBhabhulona Lenkhulu” beyingameleli nje kuphela Tinkholo Letitsi TebuKhristu, kodvwa beyimelela nato tonkhe tinkholo temanga. Ngako-ke, njengobe sitawufundza kabanti eSehlukweni 10 salencwadzi, bantfu baNkulunkulu labakuto tonkhe tindzawo futsi labanemasiko langafani basitiwe kutsi ‘baphume kuyo,’ batihlanta nakuyo yonkhe imikhuba yetinkholo temanga.​—Semb. 18:2, 4.

22. Ngesikhatsi seMphi Yelive Yekucala, bantfu baNkulunkulu labanyenti bebasicondza njani sikhutsato lesikuRoma 13:1?

²² Kutsiwani-ke ngetembusave letiyincenye yenhlangano yaSathane? EmaKhristu eliciniso kufanele yini aye emphini aphindze angene emibangweni yetive? Ngesikhatsi seMphi Yelive Yekucala, Bafundzi BeliBhayibheli bebacondza kutsi balandzeli baKhristu akukafaneli babulale labanye bantfu. (Mat. 26:52) Nanobe kunjalo, labanye bebacabanga kutsi sikhutsato lesitfolakala kuRoma 13:1 lesitsi kufanele ‘sitfobele tiphatsimandla,’ besisho kutsi kufanele baye emphini, bagcoke tembatfo temasotja baphindze baphatse tibhamu; kodvwa nabatjelwa kutsi babulale titsa, badubule emoyeni.

23, 24. Besiwucondza njani umbhalo waRoma 13:1, ngesikhatsi seMphi Yelive Yesibili, futsi ngumuphi umbono locacile balandzeli baKhristu labacondziswa kuwo?

²³ Njengobe Imphi Yelive Yesibili beseyitawucala nga-1939, Sicongosekulindza sacoca kabanti ngekungabi nencenye eveni. Lesihloko sasho ngalokucacile kutsi emaKhristu bewangeke abe nencenye etimphini nasemibangweni yetive yalelive laSathane. Lesi bekusicondziso lebesifike ngesikhatsi. Balandzeli baKhristu bebavikelwe kakhulu ecaleni lengati lelesabekako tive letinyenti lebetitawuba nalo kuleyomphi. Nanobe kunjalo, ekucaleni kwa-1929, tincwadzi tetfu tachaza nekutsi tiphatsimandla lokukhulunywa ngato kuRoma 13:1, bekungasibo babusi lababantfu kodvwa bekunguJehova  kanye naJesu. Bekusadzingeka kucondza lokucacile kulendzaba.

²⁴ Nga-1962, umoya longcwele wacondzisa balandzeli baKhristu kutsi balungise lombono, ngekutsi kushicilelwe tihloko lebetihamba embili letimayelana nembhalo waRoma 13:1-7, ku-Sicongosekulindza sa-November 15 nesa-December 1. Ekugcineni, bantfu baNkulunkulu basicondza lesimiso lesimayelana nekutitfoba lokulingene Jesu labekuvete emavini akhe latiwa kakhulu, latsi: “Nikani Khesari lokukwakhe, kodvwa ninike Nkulunkulu lokukwakhe.” (Luk. 20:25) Nyalo, emaKhristu ayacondza kutsi tiphatsimandla babusi balomhlaba, nekutsi emaKhristu kufanele atitfobe kubo. Nanobe kunjalo, kutitfoba kwawo kulinganiselwe. Nangabe tiphatsimandla titsi singamlaleli Jehova Nkulunkulu, sitawuphendvula njengebaphostoli basendvulo, labatsi: “Kufanele silalele Nkulunkulu njengobe angumbusi kunekutsi silalele bantfu.” (Imis. 5:29) ESehlukweni 13 na-14 salencwadzi, sitawufundza kabanti ngendlela bantfu baNkulunkulu labasisebentise ngayo lesimiso sekutsi emaKhristu angabi nencenye eveni.

25. Yini lekwenta ukutsatse njengesibusiso kucondziswa ngumoya longcwele ekucondzeni uMbuso waNkulunkulu?

²⁵ Asewucabange ngako konkhe balandzeli baKhristu labafundziswe kona mayelana neMbuso kuleminyaka lelikhulu leyendlulile. Sifundze kutsi uMbuso waNkulunkulu ucale nini kubusa ezulwini nekutsi ubaluleke kangakanani. Nyalo sesiwacondza kahle ematsemba lamabili latawutfolwa bantfu labetsembekile, litsemba lekuphila ezulwini nelitsemba lekuphila emhlabeni. Sesiyakwati kukhombisa kwetsembeka kwetfu eMbusweni waNkulunkulu, ngesikhatsi lesifanako sibe sitfobela tiphatsimandla temhlaba ngalokusesilinganisweni. Tibute: ‘Bengitawuwati yini onkhe lamaciniso laligugu, kube Jesu Khristu akazange acondzise sisebenti lesetsembekile lesisemhlabeni kutsi siwacondze siphindze sifundzise ngawo?’ Kusibusiso lesikhulu kucondziswa nguKhristu kanye nemoya longcwele.