BUKA Samuweli, utsela emafutsa enhloko yalendvodza. Nguloku labebavamise kukwenta uma bafuna kukhombisa kutsi umuntfu ukhetfwe kutsi abe yinkhosi. Jehova watsi Samuweli akatsele emafutsa enhloko yaSawula. Lawa kwakungemafutsa lakhetsekile futsi lanukelela kamnandzi.

Sawula abecabanga kutsi yena angeke akwati kuba yinkhosi lenhle. Ngako watsi kuSamuweli: ‘Mine ngingumBhenjamini, sive lesincane kakhulu ka-Israyeli. Pho, usholani kimi kutsi ngitawuba yinkhosi?’ Jehova abemtsandza Sawula, ngoba abengenti shengatsi yena mkhulu kunalabanye bantfu futsi abengatenti loncono. Kungako amkhetsa kutsi abe yinkhosi.

Sawula abengasilo luphuya nobe umuntfu lophasi. Abevela emndenini lonjingile, abeyindvodza lebukeka kahle kakhulu, futsi amudze. Abemudze kwendlula onkhe ema-Israyeli. Abenematubane futsi ayindvodza lenemadla lamakhulu. Bantfu bajabula ngoba Jehova abekhetse Sawula kutsi abe yinkhosi. Bamemeta kanye kanye batsi: ‘Lunwele loludze nkhosi!’

Titsa tema-Israyeli tatiloku tiba nemandla lamakhulu, futsi tatiwaphatsa kabi ema-Israyeli. Ngemuva kwesikhashana Sawula acalile kubusa, ema-Amoni eta atewuhlasela ema-Israyeli. Watsi Sawula nakeva ngaloko, wabutsela ndzawonye libutfo lelikhulu lemphi, futsi wawancoba ema-Amoni. Bajabula bantfu ngekutsi Sawula abe yinkhosi.

Njengoba iminyaka ihamba, Sawula wasita ema-Israyeli kutsi ancobe titsa tawo. Abenendvodzana lenesibindzi, ligama layo lokwakunguJonathani. Nayo yasita ema-Israyeli kutsi ancobe timphi letinyenti. EmaFilisti abesaloku atitsa letinkhulu tema-Israyeli. Ngalelinye lilanga kwefika tinkhulungwane letinyenti temaFilisti titekulwa nema-Israyeli.

Samuweli watjela Sawula kutsi amlindze aze afike atewenta umhlatjelo nobe sipho lesiya kuJehova. Kodvwa Samuweli wephuta kufika. Sawula wacala kwesaba, ngobe abecabanga kutsi emaFilisti atawusuke acale imphi. Ngako wavele wawenta lomhlatjelo. Ekugcineni Samuweli wefika, futsi wamtjela kutsi lentfo labeyentile ayikhombisi kumlalela Jehova. Watsi kuye: ‘Jehova sewukhetse lomunye umuntfu kutsi abe yinkhosi yaka-Israyeli esikhundleni sakho.’

Sawula waphindze wangalaleli. Ngako Samuweli wakhuluma naye watsi: ‘Kulalela Jehova kuncono kunekumentela sipho setimvu letikhuluphele. Njengoba walile kutsatsa umyalo wakhe, naye angeke akuyekele uchubeke uyinkhosi yaka-Israyeli.’

Sifundza sifundvo lesihle kuloku. Kusikhombisa kutsi kubalulekile kulalela Jehova ngaso sonkhe sikhatsi. Kuphindze kusitjengise kutsi umuntfu lolungile, njengobe abenjalo naSawula, angashintja abe ngumuntfu longakalungi. Tsine asifuni kuba bantfu labangakalungi, angitsi?