TIWISWE yini letindvonga taseJerikho? Kubonakala shengatsi tishaywe yibhomu lenkhulu. Kodvwa ngaletotikhatsi bantfu bebete emabhomu, futsi bebete ngisho netibhamu. Lesi kwakungulesinye setimangaliso taJehova. Ase sifundze kutsi senteka kanjani.

Lalela naku Jehova lakutjela Joshuwa, watsi: ‘Wena nemadvodza akho emphi hambani nitungelete lidolobha. Nilitungelete kanye ngelilanga, nikwente loko emalanga lasitfupha. Nibotfwala nelibhokisi lesivumelwane kanye nani. Baphristi labasikhombisa bona kumelwe bahambe embikwalo futsi bashaye nemacilongo abo.

‘Ngelilanga lesikhombisa nibolitungeleta emahlandla lasikhombisa. Batawutsi bantfu nabeva baphristi badvonsa sikhatsi lesidze nabashaya emacilongo, bese bamemeta kakhulu. Tindvonga telidolobha bese tiyawa.’

Joshuwa nebantfu bakwenta konkhe Jehova abebayale ngako. Njengoba bebalitungeleta lidolobha, akekho namunye kubo lowakhuluma, bonkhe bebatibindzele. Intfo leyayivakala kwakungumsindvo wemacilongo kanye newetinyawo. Titsa tebantfu baNkulunkulu taseJerikho tatetfukile. Uyayibona yini lentsambo lebovu lelenga efasitelweni? Labani lelifasitelo lelenga kulo? LaRahabi. Phela wenta loko tinhloli letimbili letamtjela kutsi akwente. Umndeni wakhe wonkhe wawuhleti naye endlini ubukela ngalesikhatsi ema-Israyeli atungeleta liJerikho.

Ekugcineni, ngelilanga lesikhombisa, ngemuva kwekutungeleta lidolobha tikhatsi letisikhombisa, kwakhala emacilongo, emadvodza emphi nawo acala kumemeta kakhulu, tindvonga tawa. Joshuwa watjela bantfu watsi: ‘Bhubhisani konkhe lokungekhatsi kwelidolobha, bantfu netilwane, futsi nikushise konkhe. Kodvwa nishiye yonkhe intfo leyentiwe ngegolide, ngesiliva, ngelitfusi nangensimbi, nikumikise endlini yaJehova yengcebo.’

Joshuwa wakhuluma naletinhloli letimbili watsi: ‘Hambani niye endlini yaRahabi, nifike nimtsatse yena nemndeni wakhe wonkhe.’ Rahabi nemndeni wakhe basindziswa, njengobe betimetsembisile letinhloli.