UNGASHO yini kutsi labantfu babutsani lapha emhlabatsini? Kufanana nesitfwatfwa. Kumhlophe futsi kucolisakele. Kodvwa akusiso sitfwatfwa, kungulokutsite lokudliwako.

Sekwendlule inyanga leyodvwa-vo ema-Israyeli ahambile eGibhithe, efika ahlala ehlane. Kuncane kudla lokumilako lapho, ngako ema-Israyeli akhonona atsi: ‘Sifisa kutsi ngabe Jehova wamane wasibulalela khona le eGibhithe. Ngoba phela lapho sasitfola konkhe kudla lesikufunako.’

Ngako Jehova watsi: ‘Ngitanehlisela sinkhwa lesivela ezulwini.’ Wavele wenta njalo. Ngakusasa ema-Israyeli nawabona lentfo lemhlophe lebeyigcwele emhlabatsini, abutana atsi: ‘Yini lena?’

Mosi watsi kuwo: ‘Sinkhwa lenisiphiwe nguJehova kutsi nisidle.’ Bantfu bebasibita ngekutsi yiMANA. Sasinambitseka njengemakhekhe lentiwe ngeluju.

Waphindze watsi: ‘Ngulowo nalowo akatibutsele loko langakudla.’ Njalo nje ekuseni ema-Israyeli abebutsa lemana. Emini naselishisa lilanga, lemana lesele emhlabatsini yayincibilika.

Watsi futsi: ‘Akubete loshiyela likusasa lokudla.’ Kodvwa lamanye ema-Israyeli awalalelanga. Uyati yini kutsi kwentekani? Ngakusasa lemana lebeyisele yayigcwele tibungu futsi seyicala kunuka bumunyu.

Kwakunelilanga linye evikini lapho Jehova atsi babutse imana yemalanga lamabili. Lelo kwakulilanga lesitfupha. Jehova watsi abayigcine lenye kuze bayidle ngelilanga lelilandzelako, ngoba abengeke akwehlise kudla ngelilanga lesikhombisa. Batsi nabayigcinela lilanga lesikhombisa imana yabo, ayibanga nato tibungu futsi ayizange inuke. Kwakusimanga leso!

Yokhe leminyaka ema-Israyeli layihlala ehlane, Jehova abewondla ngemana.