Nkulunkulu weliciniso unguMdali wato tonkhe tintfo. Ute sicalo futsi angeke aze abe naso ngisho nesiphetfo. (Tihlabelelo 90:2) Nguye longumTfombo wetindzaba letimnandzi letitfolakala eBhayibhelini. (1 Thimothi 1:11) Njengobe kunguNkulunkulu losinike kuphila, nguye yedvwa lokufanele simkhonte.​—Fundza Sembulo 4:11.

Kute umuntfu lowake wabona Nkulunkulu ngobe unguMoya, lokusho kutsi simo sakhe siphakeme kakhulu kunesimo setidalwa letiphilako emhlabeni. (Johane 1:18; 4:24) Nobe kunjalo, singakwati kubona buntfu baNkulunkulu etintfweni latidalile. Sibonelo saloku kutsi tinhlobo-nhlobo tetitselo kanye netetimbali tikhombisa lutsandvo kanye nekuhlakanipha kwakhe. Bukhulu belizulu nemhlaba busikhombisa emandla akhe.​—Fundza Roma 1:20.

Kunyenti lesingakutfola ngebuntfu baNkulunkulu nasifundza liBhayibheli. Sibonelo saloku kutsi lisitjela ngaloko lakutsandzako nangaloko langakutsandzi, liphindze lisitjele ngendlela laphatsa ngayo bantfu, nangaloko lakwentako etimeni letehlukahlukene.​—Fundza Tihlabelelo 103:7-10.

Jesu watsi: “Babe wetfu losezulwini, alingcweliswe libito lakho.” (Matewu 6:9) Ngisho nobe Nkulunkulu aneticu letinyenti, unalinye kuphela libito. Kulolo nalolo lwimi, libito lakhe libitwa ngendlela leyehlukile. Imvamisa, ngesiSwati libitwa ngalendlela, “Jehova.” Kodvwa labanye bantfu balibita batsi, “Yahweh.”​—Fundza Tihlabelelo 83:18, NW.

Libito laNkulunkulu likhishiwe emaBhayibhelini lamanyenti kwafakwa ticu letitsi Nkhosi nobe Nkulunkulu. Kodvwa ngalesikhatsi kubhalwa liBhayibheli, libito laNkulunkulu belivela  kulo tikhatsi letingaba ngu-7 000. Jesu walenta latiwa libito laNkulunkulu ngalesikhatsi afundzisa bantfu ngaye.​—Fundza Johane 17:26.

Kwandza kwekuhlupheka kukhombisa kutsi Jehova unguNkulunkulu longasikhatsaleli yini vele? Labanye bantfu batsi uyasihluphekisa kute asivivinye, kepha loko akusilo liciniso.​—Fundza Jakobe 1:13.

Nkulunkulu usinike inkhululeko yekutikhetsela. Kufanele sibonge ngekutsi Nkulunkulu usinikete inkhululeko yekumkhonta. (Joshuwa 24:15) Bantfu labanyenti bakhetsa kuhlukumeta labanye, futsi loko kwandzisa kuhlupheka emhlabeni. Jehova uva buhlungu kakhulu nakabona intfo lenjalo.​—Fundza Genesisi 6:5, 6.

Jehova unguNkulunkulu losikhatsalelako. Ufuna kutsi sikujabulele kuphila. Madvutane nje, utakucedza kuhlupheka kanye nalabo labakubangelako. Kwanyalo, unesizatfu lesivakalako sekuvumela kuhlupheka kutsi kuchubeke sikhashana. Esifundvweni-8 sitawufundza ngaleso sizatfu.​—Fundza 2 Phetro 2:9; 3:7, 13.

Jehova usimema kutsi sisondzelane naye ngekutsi sikhulume naye ngemthandazo. Ukhatsalela umuntfu ngamuye. (Tihlabelelo 65:2; 145:18) Uhlale anesifiso sekutsetselela. Uyayibona imetamo yetfu yekufuna kumjabulisa, ngisho nobe ngaletinye tikhatsi sehluleka. Ngako-ke, ngisho nobe sitoni, singakwati kubujabulela buhlobo lobusedvute naNkulunkulu.​—Fundza Tihlabelelo 103:12-14; Jakobe 4:8.

Njengobe kunguJehova losiphe kuphila, kufanele simtsandze kakhulu kwendlula nome ngabe ngumuphi lomunye umuntfu. (Makho 12:30) Njengobe kumtsandza kwakho Nkulunkulu ukukhombisa ngekufundza lokunyenti ngaye nangekwenta loko lakucelako, utawusondzela kakhulu kuye.​—Fundza 1 Thimothi 2:4; 1 Johane 5:3.