SIFUNDVO 6
Likhona Yini Litsemba Ngebantfu Labafile?
1. Ngutiphi tindzaba letimnandzi mayelana nalabo labafile?
Jesu nakafika efika eBhetani, lesedvute neJerusalema, besekwendlule emalanga lamane umngani wakhe Lazaru afile. Jesu watsatsa bodzadze wemufi, boMariya kanye naMata, waya nabo ethuneni lapho Lazaru abengcwatjwe khona. Ngekushesha nje, besekunesicumbi sebantfu. Asewucabange nje ngenjabulo boMata naMariya lababanayo ngesikhatsi Jesu avusa Lazaru!—Fundza Johane 11:21-24, 38-44.
Mata abesavele atati letindzaba letimnandzi mayelana nalabafile. Abekwati nekutsi Jehova uyawuvusa labafile baphindze baphile lapha emhlabeni.—Fundza Jobe 14:14, 15.
2. Labafile bakusiphi simo?
Nkulunkulu watjela Adamu: “Njengobe ulutfuli, uyawubuyela elutfulini.”—GENESISI 3:19.
Bantfu badalwa ngelutfuli lwemhlabatsi. (Genesisi 2:7; 3:19) Tsine asisiwo umoya lophila emitimbeni yenyama. Sitidalwa tenyama, ngako kute incenye yetfu lesindzako nasifa. Nasifa, tingcondvo tetfu nato tiyafa, futsi imicabango yetfu iyaphela. Ngako, Lazaru akashongo lutfo mayelana nalakubona ngesikhatsi afile, ngobe labafile abati lutfo.—Fundza Umshumayeli 9:5, 6, 10.
Nasebafile bantfu, Nkulunkulu ubajezisa ngekubashisa emlilweni yini? Njengobe liBhayibheli lisho kutsi labafile abati lutfo, kusebaleni-ke kutsi sihogo semlilo siyimfundziso yemanga lenyundzela Nkulunkulu. Kwayona nje indzaba yekuhlupha bantfu ngekubashisa emlilweni iyamenyanyisa Nkulunkulu.—Fundza Jeremiya 7:31.
3. Labafile bangakhuluma yini natsi?
Lafile abakwati kukhuluma futsi abeva. (Tihlabelelo 115:17) Kodvwa letinye tingilosi timbi, futsi tingakhuluma nebantfu tente shangatsi tingulabafile. (2 Phetro 2:4) Jehova akasivumeli kutsi setame kukhuluma nebantfu labafile.—Fundza Dutheronomi 18:10, 11.
4. Bobani labayawuvuswa?
Tigidzi letinyenti tebantfu lasebafa tiyawuvuselwa emhlabeni. Ngisho nalabanye labebangamati Nkulunkulu futsi labebenta lokubi, nabo bayawuvuswa.—Fundza Tihlabelelo 37:9; Imisebenti 24:15.
Labo labavusiwe batawufundza liciniso ngaNkulunkulu baphindze bakholwe kuJesu, futsi bavete loko ngekumlalela. (Sembulo 20:11-13) Labo labayawuvuswa, futsi bente lokulungile, batawujabulela kuphila lokuphakadze emhlabeni.—Fundza Johane 5:28, 29.
5. Kuvuswa kwalabafile kusitjelani ngaJehova?
Ngekutfumela indvodzana yakhe, Nkulunkulu wenta kutsi sibe nelitsemba lekutsi labo labafile batawuvuswa. Ngako-ke, kuvuswa kwalabafile kusikhombisa lutsandvo kanye nemusa waJehova. Nasekuvuswa labafile, ngubani wena longatsandza kumbona?—Fundza Johane 3:16; Roma 6:23.
