1, 2. Ngutiphi tintfo letenta liBhayibheli libe sipho lesijabulisako lesivela kuNkulunkulu?

USAKHUMBULA yini utfola sipho lesihle sibuya kumngani wakho lomtsandzako? Kutfola leso sipho kwakungatsintsi nje kuphela inhlitiyo kodvwa futsi kwakujabulisa. Phela sipho sikutjela lokutsite ngaloyo muntfu lokuphe sona—kutsi uyabatisa bungani benu. Akungabateki kutsi wabonga ngesipho lesibuya kumngani wakho lesicatjangelwe kahle.

² LiBhayibheli lisipho lesivela kuNkulunkulu, lokufanele sisibonge kakhulu. Lencwadzi lengafanani naletinye tincwadzi isikhombisa tintfo lebesingeke sitati ngaphandle kwayo. Nasi sibonelo: Isifundzisa ngekudalwa kwemazulu, umhlaba, kanye nendvodza yekucala nemfati wekucala. LiBhayibheli licuketse timiso lesingatetsemba letisisitako kute sikhone kumelana netinkhatsato tekuphila. Lisichazela kutsi Nkulunkulu utasigwalisa kanjani setsembiso sakhe sekuletsa simo lesincono emhlabeni. Cabanga nje ngesipho lesihle kangaka liBhayibheli lelingiso!

3. Njengobe Jehova asilungisele liBhayibheli, kusitjelani loko ngaye, futsi kungani kusijabulisa?

³ LiBhayibheli liphindze libe sipho lesijabulisako ngobe liveta lokutsite ngeMuphi walo, Nkulunkulu Jehova. Lokutsi  nje usinike liBhayibheli kubufakazi lobucacile bekutsi ufuna simati kancono. LiBhayibheli lingakusita usondzele kuJehova.

4. Yini lekujabulisako ngekusakatwa kweliBhayibheli?

⁴ Nangabe uneliBhayibheli, ciniseka kutsi awuwedvwa. LiBhayibheli liphelele nobe liyincenye liye lashicilelwa ngetilwimi letingetulu kwa-2 300. Ngenca yaloko litfolwa ngemaphesenti langetulu kwa-90 ebantfu emhlabeni wonkhe. Kusakatwa emaBhayibheli langetulu kwesigidzi liviki ngalinye. Kuye kwashicilelwa emaBhayibheli laphelele nobe layincenye langetulu kwetinkulungwane tetigidzi. Kute ngisho naleyodvwa incwadzi lefanana neliBhayibheli.

5. LiBhayibheli ‘liphefumulelwe nguNkulunkulu’ ngayiphi indlela?

⁵ Ngetulu kwaloko, liBhayibheli ‘liphefumulelwe nguNkulunkulu.’ (2 Thimothi 3:16) Ngayiphi indlela? LiBhayibheli ngekwalo litsi: “Bantfu bakhuluma lokukwaNkulunkulu, bachutjwa ngumoya longcwele.” (2 Phetro 1:21) Kute sifanekise loku: Somabhizinisi angahle acele mabhalane wakhe kutsi ambhalele incwadzi. Lencwadzi isuke icuketse imiyalo nemicabango yasomabhizinisi. Isuke iyasomabhizinisi, hhayi mabhalane. Ngendlela lefanako, liBhayibheli licuketse umlayeto  waNkulunkulu, hhayi webantfu labalibhala. Kungako lonkhe liBhayibheli ‘lilivi laNkulunkulu.’—1 Thesalonika 2:13.

6, 7. Kungani kuvumelana lokusetincenyeni teliBhayibheli kuphawuleka ngalokukhetsekile?

⁶ Kwatsatsa iminyaka lengu-1 600 kutsi liBhayibheli licedvwe kubhalwa. Babhali balo baphila ngetikhatsi letehlukene futsi bebasuka emakhaya langafani. Labanye kubo bebabalimi, labanye babadwebi betinhlanti, kantsi labanye bebabelusi. Labanye bebabaphrofethi, tikhulu, kanye nemakhosi. Umbhali weLivangeli Lukha abengudokodela. Nobe nje balobi beBhayibheli bebavela emakhayeni nasetindzaweni letingafani, liBhayibheli liyavumelana kusukela ekucaleni kuze kube sekugcineni. *

⁷ Incwadzi yekucala yeliBhayibheli isitjela kutsi tinkinga tebantfu tacala kanjani. Incwadzi yekugcina isitjela kutsi umhlaba wonkhe utawuba lipharadisi nobe insimi lenhle. Tincenye teliBhayibheli setitonkhe tihlanganisa tinkhulungwane teminyaka yemlandvo futsi tihlobene nekwembulwa kwetinjongo taNkulunkulu. Kuvumelana kweliBhayibheli kusishiya sibambe longentasi, kodvwa vele nguloko lebesingakulindzela encwadzini levela kuNkulunkulu.

8. Nika tibonelo letikhombisa kutsi liBhayibheli licondzile nalikhuluma ngetindzaba tesayensi.

⁸ LiBhayibheli licondzile nalikhuluma ngetindzaba tesayensi. Licuketse kwatiswa lokwakungacondzakali ngalesikhatsi libhalwa. Nasi sibonelo: Incwadzi yaLevithikhusi icuketse imitsetfo leyayiya kuma-Israyeli lemayelana nekuhloba, kanye nekuhlukaniswa kwalabo lebebanetifo letitsatselwanako, kodvwa tive letibomakhelwane bawo betingati lutfo ngaloku. Ngalesikhatsi kunembono longasiwo ngekuma kwemhlaba, liBhayibheli lavele latsi uyindzingiliti nobe imbulunga. (Isaya 40:22) LiBhayibheli liphindze litsi umhlaba ‘ulenga eteni.’ (Jobe 26:7) Kuliciniso  kutsi liBhayibheli alisiyo incwadzi yesayensi. Kodvwa nalikhuluma ngetindzaba tesayensi, litibeka ngalokucondzile. Loku akusiko yini vele lebesingakulindzela encwadzini levela kuNkulunkulu?

9. (a) LiBhayibheli likhombisa njani kutsi licondzile futsi letsembekile nalikhuluma ngemlandvo? (b) Kwetsembeka kwebabhali balo kukutjelani wena ngeliBhayibheli?

⁹ LiBhayibheli licondzile nalikhuluma ngemlandvo futsi letsembekile. Indlela lelichaza ngayo tintfo icacile. Tindzaba letikulo atikhulumi nje ngemabito ebantfu kuphela, kodvwa tiphindze tikhulume ngisho nangekutalwa kwabo. * Ngalokungafanani netati temlandvo telive, ngalokuvamile letatingakubiki kuncotjwa kwebantfu bato, balobi beBhayibheli bebatsembekile, futsi bebaze babike ngisho nemaphutsa abo newetive takubo. Nasi sibonelo: Encwadzini yeliBhayibheli yaNumeri, Mosi uvuma liphutsa lakhe lelikhulu lelamenta wasolwa kakhulu. (Numeri 20:2-12) Kwetsembeka lokufanana naloku, akumane nje kutfolakale etincwadzini temlandvo, kodvwa kutfolakala eBhayibhelini ngobe livela kuNkulunkulu.

10. Kungani kungamangalisi kutsi liBhayibheli liyincwadzi lelusito?

¹⁰ Ngekutsi liBhayibheli liphefumulelwe nguNkulunkulu, ‘lilungele kufundzisa, nekusola, nekucondzisa, nekuyala ngekulunga.’ (2 Thimothi 3:16) LiBhayibheli liyincwadzi lelusito. Likhombisa kutsi likwati ngalokucondzile kwakheka kwemuntfu. Kungako uMbhali walo, longuNkulunkulu Jehova anguMdali. Ukwati kancono kucabanga kwetfu kanye nendlela lesitiva ngayo. Ngetulu kwaloko, Jehova uyati kutsi yini lesiyidzingako kute sijabule. Uphindze ati netindlela tekuphila lokufanele sitigweme.

11, 12. (a) Ngutiphi tihloko Jesu lakhuluma ngato eNshumayelweni yakhe yaseNtsabeni? (b) Ngutiphi letinye timiso letibalulekile liBhayibheli lelikhuma ngato, futsi kungani seluleko salo singaphelelwa sikhatsi?

¹¹ Ase ucabange ngenkulumo yaJesu lebitwa ngekutsi  yiNshumayelo yaseNtsabeni, lebhalwe kuMatewu tehluko-5 kuya ku-7. Kulemfundvo lesesigabeni lesisetulu, Jesu wakhuluma ngetihloko letingafanani, letifaka ekhatsi indlela yekutfola injabulo yeliciniso, indlela yekucatulula tinkinga, indlela yekuthandaza kanye nembono lokahle ngemcebo. Emavi aJesu anemandla futsi alusito kitsi lamuhla njengobe abenjalo nangalesikhatsi awakhuluma.

¹² Letinye timiso teliBhayibheli timayelana nekuphila kwemndeni, imikhuba yekusebenta, kanye nebungani lesiba nabo  nalabanye bantfu. Timiso teliBhayibheli tisebenta kubo bonkhe bantfu, futsi seluleko salo siyazuzisa. Kuhlakanipha lokutfolakala eBhayibhelini kufishaniswe ngalamavi lashiwo nguNkulunkulu ngemphrofethi longu-Isaya: ‘NginguJehova Nkulunkulu wenu, lokunguyena anifundzisa kutsi ngukuphi lokuncono kunako konkhe kini.’—Isaya 48:17, NW.

13. Jehova waphefumulela umphrofethi Isaya kutsi abhale miphi imininingwane macondzana neliBhabhulona?

¹³ LiBhayibheli linetiphrofetho letinyenti, letinye tato setigcwalisekile. Cabangela nasi sibonelo: Ngemphrofethi Isaya, labephila ekhulwini leminyaka lesi-8 B.C.E., Jehova wabiketela kutsi liBhabhulona litawubhujiswa. (Isaya 13:19; 14:22, 23) Kwaniketwa imininingwane lebeyikhombisa kutsi lelidolobha laliyobhujiswa kanjani. Emabutfo lahlaselako abetawubohlisa umfula waseBhabhulona bese angena kulelidolobha ngephandle kwekulwa. Akugcini lapho. Umphrofethi longu-Isaya waze washo nelibito lenkhosi lebeyitawuncoba liBhabhulona—Khuresi.—Isaya 44:27–45:2.

14, 15. Yagcwaliseka njani leminye imininingwane yesiphrofetho sa-Isaya ngeliBhabhulona?

¹⁴ Ngemva kweminyaka lengu-200 ngebusuku ba-October 5/6, 539 B.C.E.—libutfo lefika lahlala ngaseBhabhulona. Kwakungubani indvuna yalo? Kwakuyinkhosi yasePheresiya lebitwa ngekutsi nguKhuresi. Konkhe besekulungile, ngako besekusele kutsi kugcwaliseke lesiphrofetho lesimangalisako. Lelibutfo laKhuresi belitawuhlasela liBhabhulona ngaphandle kwekulwa yini, njengobe kwakubiketelwe?

¹⁵ BaseBhabhulona bebanelidzili ngalobo busuku futsi bebativa balondzekile ngekhatsi kwaletindvonga letindze. Ngalesikhatsi lidzili lisachubeka, Khuresi ngekuhlakanipha waphambukisa emanti emfula lobewugeleta kulelidolobha. Ngekushesha emanti abesabohle ngalokwanele kutsi emabutfo akhe akwati kwewelela ngesheya asondzele etindvongeni talelidolobha. Emabutfo aKhuresi abetawungena njani ngekhatsi  kwaletindvonga taseBhabhulona? Ngesizatfu lesitsite, baseBhabhulona ngalobo busuku ngebudlabha bebashiye emasango alelidolobha avuliwe.

16. (a) Yini leyabiketelwa ngu-Isaya mayelana nemiphumela yeliBhabhulona? (b) Sagcwaliseka njani siphrofetho sa-Isaya sekubhujiswa kweBhabhulona?

¹⁶ Kwabiketelwa loku macondzana neBhabhilona: “Kungeke kuphindze kuhlale muntfu kuyo, kute loyawuphidze ahlale kuyo titukulwane ngetitukulwane; kute um-Arabu loyawumisa lithende lakhe lapho, kute nemelusi loyawuphumulisa imihlambi yakhe kuyo.” (Isaya 13:20) Lesiphrofetho senta lokungetulu nje kwekubiketela ngekuwa kwalelidolobha, saphindze sakhombisa nekutsi liBhabhulona litawubhujiswa ngalokuphelele. Ungabubona bufakazi bekugcwaliseka kwalamavi. Indzawo lekungahlali muntfu kuyo lapho bekwakhiwe khona liBhabhulona—lengemakhilomitha langu-80  enyakatfo yeBagdad, lese-Iraq—ibufakazi bekutsi loko Jehova lakukhuluma asebentisa Isaya kwagcwaliseka: “Ngiyawulishanyela ngemshanyelo wembhubhiso.”—Isaya 14:22, 23. *

17. Kugcwaliseka kwetiphrofetho teliBhayibheli kulucinisa njani lukholo?

 ¹⁷ Kubona kutsi liBhayibheli liyincwadzi yetiphrofetho longatetsemba akulucinisi yini lukholo lwakho? Nangabe Nkulunkulu Jehova aye watigcwalisa tetsembiso latenta kadzeni, natsi sinaso sizatfu sekuciniseka kutsi utasigcwalisa setsembiso selipharadisi lasemhlabeni. (Numeri 23:19) ‘Sinelitsemba lekuphila lokuphakadze lekwatsi umhlaba ungakasekelwa kwetsenjiswa nguNkulunkulu longawacali emanga.’—Thithusi 1:2. *

18. Nguliphi liphuzu lelinemandla lelivetwa ngumphostoli Pawula “ngelivi laNkulunkulu”?

¹⁸ Kuloko lesesikufundzile kulesehluko, kuyacaca kutsi liBhayibheli vele liyincwadzi leyehlukile kuletinye. Kodvwa  kuba ligugu kwalo, akubangelwa nje kuphela kutsi liyavumelana nesayensi, umlandvo nekuhlakanipha lokulusito, kanye netiphrofetho lesingatetsemba. Umphostoli Pawula wabhala: “Livi laNkulunkulu liphilile, linemandla; likhalipha kwengca inkemba lesika tinhlangotsi totimbili. Lisika lidzimate lehlukanise umphefumulo nemoya, emalunga nemnkantja, lehlulele imicabango netifiso tenhlitiyo.”—Hebheru 4:12.

19, 20. (a) LiBhayibheli lingakusita njani kutsi utihlole? (b) Ungabonisa njani kutsi uyabonga ngesipho lesehlukile lesivela kuNkulunkulu, liBhayibheli?

¹⁹ Kufundza “livi” nobe umlayeto waNkulunkulu loseBhayibhelini kungashintja kuphila kwetfu. Lingasisita kutsi sitihlole ngendlela lesingakaze sitihlole ngayo. Singase sitsi siyamtsandza Nkulunkulu, kodvwa indlela lesilalela ngayo loko Livi lakhe leliphefumulelwe liBhayibheli lelikufundzisako, ngiyo leyoveta loko lesikucabangako ngisho netinhloso tetinhlitiyo tetfu.

²⁰ Ngalokucinisekile liBhayibheli yincwadzi levela kuNkulunkulu. Liyincwadzi lokufanele siyifundze, siyidadishe futsi siyitsandze. Bonisa kutsi uyabonga ngalesipho lesivela kuMdali ngekuchubeka uhlolisisa loko lesikuphetse. Ngekwenta kanjalo, uyojabula ngekwati injongo yaNkulunkulu ngebantfu. Kutsi lenjongo iyini nekutsi itawufezeka kanjani, kutawucocwa ngako esehlukweni lesilandzelako.