EKhesariya, bekunendvodza lebeyibitwa ngekutsi nguKhoneliyuse, futsi iyindvuna yelibutfo laseRoma. Nanobe beyingasuye umJuda, emaJuda abeyihlonipha. Beyibasita bantfu labaphuyile. Khoneliyuse abekholelwa kuJehova futsi abethantaza njalo kuye. Ngalelinye lilanga ingilosi yefika kuKhoneliyuse yatsi: ‘Nkulunkulu uyivile imithantazo yakho. Ngako tfuma emadvodza kutsi aye eJopha ayewulandza Phetro.’ Ngekushesha Khoneliyuse watfuma emadvodza lamatsatfu kutsi aye eJopha, lokuluhambo lolungemakhilomitha lacishe abe ngu-50.

NakaseJopha, Phetro wabona umbono. Wabona tilwane emaJuda lebekangakavumeleki kutsi atidle futsi weva livi limtjela kutsi akadle. Phetro wala kudla, watsi: ‘Angizange sengiyidle intfo lengcolile.’ Lelivi latsi kuye: ‘Yekela kubita loko Nkulunkulu lakuhlantile ngekutsi kungcolile.’ Phetro wabese utjelwa kutsi kunemadvodza lamatsatfu emnyango wakhe. Ngako Phetro waya emnyango wafike wabuta lamadvodza kutsi atokwentani. Lamadvodza amphendvula atsi: ‘Sitfunywe nguKhoneliyuse indvuna yelibutfo, utsi asikulandze ute endlini yakhe.’ Phetro wawangenisa lamadvodza kutsi alale busuku  bunye. Ngakusasa, Phetro wahamba nalamadvodza kanye nalabanye bazalwane baseJopha baya eKhesariya.

Nabefika, Khoneliyuse waguca embikwaPhetro. Kodvwa Phetro watsi: ‘Sukuma, nami ngingumuntfu njengawe. Nkulunkulu utse ngite lapha endlini yakho ngisho nobe emaJuda angayi emakhaya ebantfu baletinye tive. Ngicela ungitjele kutsi ungibiteleni.’

Khoneliyuse watsi kuPhetro: ‘Emalangeni lamane lendlulile, ngesikhatsi ngithantaza kuNkulunkulu kwefika ingilosi yatsi angikubite. Ngicela usifundzise emavi aJehova.’ Phetro watsi: ‘Nyalo sengifundzile kutsi Nkulunkulu akakhetsi, kodvwa wemukela nome ngubani lomesabako.’ Phetro wabafundzisa tintfo letinyenti ngaJesu. Umoya longcwele wehlela kuKhoneliyuse nakubo bonkhe lebekanabo futsi bonkhe babhajatiswa.