Ngaphambi kwemkhosi weliPhasika nga-32 C.E., baphostoli bebabuya kuyoshumayela futsi badziniwe, ngako Jesu wahamba nabo ngesikebhe baya eBhethsayida kuze bayophumula. Ngesikhatsi lesikebhe sisondzela ngasemhlabatsini lowomile, Jesu wabona bantfu labanyenti beta emvakwabo. Nanobe Jesu bekafuna kuphumula nebaphostoli bakhe, wabemukela kahle labantfu. Welapha labagulako futsi wacala kufundzisa. Wabafundzisa ngeMbuso waNkulunkulu lilanga lonkhe. Naselishonile lilanga, baphostoli bakhe beta kuye batsi: ‘Labantfu sebalambile. Batjele bahambe bayewutifunela kudla.’

Jesu watsi kubo: ‘Akudzingeki kutsi bahambe, bapheni nine kudla, badle.’ Baphostoli bambuta batsi: ‘Ufuna siyobatsengela tinkhwa yini?’ Lomunye umphostoli lokutsiwa nguFiliphu watsi: ‘Noma ngabe besinemali lenyenti, besingeke sikhone kutsengela bonkhe labantfu labangaka tinkhwa.’

Jesu wababuta watsi: ‘Sinekudla lokunganani?’ Andreya watsi: ‘Sinetinkhwa letisihlanu netimfishi letimbili. Ngeke benele labantfu.’ Jesu watsi: ‘Nginikeni letinkhwa naletimfishi.’ Watjela labantfu kutsi bahlale etjanini ngeticumbi tabo-50 netabo-100. Jesu watsatsa letinkhwa naletimfishi wabuka etulu wathantaza. Wahlephula letinkhwa watinika baphostoli bakhe, bona base bemukelisa labantfu. Emadvodza langu-5 000, bafati kanye nebantfwana badla besutsa. Nasebacedzile kudla, baphostoli  babutsa lebekusele kuze bangamoshi. Kwagcwala emabhasikidi langu-12. Loku kwaba simangaliso.

Labantfu bajabula kakhulu baze bafuna kubeka Jesu kutsi abe yiNkhosi. Kodvwa yena bekati kutsi besisengakafiki sikhatsi sekutsi abe yiNkhosi. Watjela labantfu kutsi bahambe, wase utjela baphostoli bakhe kutsi baye ngesheya kweLwandle lwaseGalile. Bagibela esikebheni bahamba. Jesu yena wahamba yedvwa waya entsabeni. Leni? Ngobe bekafuna kuyothantaza kuBabe wakhe. Ngisho nobe bekanemsebenti lomnyenti, abetinika sikhatsi sekuthantaza.