Jesu bekangelaphi labagulako nobe avuse labafile kuphela, kodvwa bekakhona nekulawula umoya kanye nemvula. Nasekacedzile kuthantaza entsabeni, Jesu watsi nakabuka Lwandle lwaseGalile wabona kuhhusha umoya lomkhulu. Baphostoli bakhe bebagibele sikebhe futsi bangasakhoni kuhamba ngaso kulomoya lomkhulu. Wehla entsabeni waya kubo ahamba etikwemanti. Ngesikhatsi baphostoli babona umuntfu ahamba etikwemanti, besaba. Jesu wase utsi kubo: ‘Ngimi, ningesabi.’

Phetro watsi: “Nkhosi, nangabe kunguwe, ngitjele ngite lapho kuwe.” Jesu watsi kuPhetro: ‘Wota.’ Kusahhusha lomoya lomkhulu, Phetro wehla esikebheni futsi wahamba etikwemanti waya kuJesu. Njengobe asondzela kuJesu, Phetro wabuka lomoya lomkhulu futsi wesaba. Wase ucala kucwila. Wamemeta watsi: “Nkhosi ngisindzise!” Jesu wambamba sandla watsi: ‘Yini lekwente wangabata? Kuphi kukholwa kwakho?’

Jesu naPhetro base bagibela esikebheni futsi ngekushesha lomoya lomkhulu wase uyaphela. Ucabanga kutsi bativa njani baphostoli? Batsi: “Vele uyiNdvodzana yaNkulunkulu.”

Jesu waphindze wawulawula umoya. Ngalelinye lilanga, ngesikhatsi Jesu nebaphostoli bakhe bahamba ngesikebhe elwandle, Jesu waya kuyolala ngemuva esikebheni. Ngesikhatsi aselele, kwafika umoya lomkhulu. Emagagasi ashaya lesikebhe futsi sagcwala emanti. Baphostoli bavusa Jesu bamemeta batsi: ‘Mfundzisi sisite! Siyafa!’ Jesu wavuka wase wekhuta lomoya watsi: ‘Thula!’ Ngekushesha nje lomoya kanye nelwandle kwathula. Jesu wabuta baphostoli bakhe watsi: ‘Kuphi kukholwa kwenu?’ Bakhuluma bodvwana batsi: ‘Umoya kanye nelwandle kuyamlalela.’ Labaphostoli bafundza kutsi bekufanele bametsembe Jesu futsi bangesabi lutfo.