SIFUNDVO 80
Jesu Ukhetsa Baphostoli Labangu-12
Ngesikhatsi Jesu sekashumayele umnyaka nehhafu, besekufanele ente sincumo lesibalulekile. Bekatawukhetsa bobani kutsi basebente naye? Bekatawucecesha bobani kutsi bahole ebandleni lebuKhristu? Kuze Jesu ente lesincumo bekufanele atfole sicondziso saJehova. Ngako waya entsabeni lapho bekatawuba yedvwana khona, wathantaza busuku bonkhe. Ekuseni, Jesu wabita balandzeli bakhe wase ukhetsa baphostoli labangu-12. Ngubaphi losakhumbula emagama abo? Emagama abo bekuboPhetro, Andreya, Jakobe, Johane, Filiphu, Bhatalomewu, Tomase, Matewu, Jakobe indvodzana ya-Alfiyose, Thadiyosi, Simoni, naJudasi Skariyothi.
Andreya, Phetro, Filiphu, Jakobe
Laba labangu-12 bebatawuhamba naye nakashumayela. Nasekabaceceshile, wabese ubatfuma kutsi bayoshumayela babodvwa. Jehova wabanika emandla ekucosha emadimoni kanye nekuphilisa labagulako.
Johane, Matewu, Bhatalomewu, Tomase
Jesu wababita ngekutsi bangani bakhe laba labangu-12 futsi bekabetsemba. Bafarisi bebacabanga kutsi labaphostoli baJesu abakafundzi futsi babantfu nje. Kodvwa Jesu wabafundzisa lokunyenti kuze bawente kahle lomsebenti wekushumayela. Bebatawuba naJesu ngisho nangetikhatsi letibalulekile ekuphileni kwakhe, ikakhulukati ngembi ngekufa kwakhe nalapho sekavusiwe. NjengaJesu, liningi lalabaphostoli bakhe belisuka eGalile. Labanye bebanebafati.
Jakobe indvodzana ya-Alfiyose, Judasi Skariyothi, Thadiyosi, Simoni
Labaphostoli bebabantfu labangakapheleli futsi bebawenta emaphutsa. Ngaletinye tikhatsi bebakhuluma bangakacabangi futsi bente tincumo letimbi. Bebahle bangakhoni kubeketela. Baze baphikisana ngekutsi ngubani lomkhulu emkhatsisini wabo. Ngetulu kwako konkhe loku, bebabantfu labakahle labatsandza Jehova. Bebatawusala banakekela libandla lebuKhristu nasekahambile Jesu.
“Nginibita ngekutsi nibangani bami ngobe nginitjele tonkhe tintfo lengitive kuBabe.”—Johane 15:15
