1. Yini leyabangela kutsi iShilo igcwale lusizi nesililo?

SAMUWELI abeluva lusizi lwaseShilo. Bekubonakala shengatsi lonkhe lelidolobha beligcwele tinyembeti ngenca yelusizi. Bangakhi nje bafati nebantfwana labebalilela bobabe babo, emadvodza, emadvodzana, nabomnakabo labebangeke basabuya emakhaya? Siyati kutsi ema-Israyeli alahlekelwa ngemasotja langaba ngu-30 000 ngalesikhatsi ancotjwa ngemaFilisti emphini, ngemuva kwekulahlekelwa ngulangu-4 000 kulenye imphi.​—1 Sam. 4:1, 2, 10.

2, 3. Nguluphi luhidze lwetinhlekelele letaletsa lihlazo nekulahleka kwenkhatimulo eShilo?

² Leyo kwakungulenye nje inhlekelele emkhatsini waletinyenti letaba khona. Emadvodzana a-Eli lakhohlakele lamabili, boHofni naFinehasi, akhipha libhokisi lesivumelwane laNkulunkulu eShilo ahamba atungeleta nalo. Lelibhokisi lelalivamise kuvalelwa endzaweni lengcwele lesethendeni lekukhontela belimelela kuba khona kwaNkulunkulu. Labantfu base bayalitsatsa baya nalo emphini, futsi ngebulima lobukhulu bebacabanga kutsi litabaletsela inhlanhla letabenta bancobe. Kodvwa emaFilisti alitfumba leLibhokisi, abulala boHofni kanye naFinehasi.​—1 Sam. 4:3-11.

³ Besekuphele iminyaka lengemakhulu lelithende lekukhontela leliseShilo lihlonishwa kakhulu ngenca yekutsi bekunaleLibhokisi Lesivumelwane. Manje lelo bhokisi beselingekho. Ngemuva kwekuva loko, Eli labesaneminyaka lengu-98 budzala, wawa sinyova esihlalweni sakhe, wafa. Malukatane wakhe labesandza kuba ngumfelokati ngalelo langa, wafa nakabeleka. Ngembikwekutsi afe, watsi: “Inkhatimulo isukile ka-Israyeli.” Abecinisile, iShilo yayingeke iphindze ibe njengobe yayinjalo.​—1 Sam. 4:12-22.

4. Yini lesitawucoca ngayo kulesehluko?

⁴ Bekuyomtsintsa njani Samuweli lokudvumateka lokungaka labebhekene nako? Kukholwa kwakhe kwakuyocina yini kangangekutsi abengakhona kusita bantfu lebesebalahlekelwe sivikelo saJehova kanye nekutsandvwa nguye? Sonkhe lamuhla singahle sibhekane nebumatima nekudvumateka lokuvivinya kukholwa kwetfu, ngako asesibone kutsi ngukuphi lokunye lesingakufundza kuSamuweli.

5, 6. Yini liBhayibheli lelisitjela ngayo ngalesikhatsi lesiminyaka lengu-20, futsi Samuweli abephishaneke ngani ngaleso sikhatsi?

⁵ Kulandzisa kweliBhayibheli kubese akusachazi lutfo ngaSamuweli kulesikhatsi, kodvwa kusitjela ngaleLibhokisi Lesivumelwane, kusichazele ngendlela emaFilisti lahlupheka ngayo ngekutsatsa lelo bhokisi ate aphoceleleka kutsi alibuyisele emuva. LiBhayibheli liphindze likhulume ngaSamuweli ngemuva kweminyaka lengu-20. (1 Sam. 7:2) Bekentani kuso sonkhe leso sikhatsi? Akudzingeki sicombelele ngobe liBhayibheli liyasitjela.

⁶ LiBhayibheli litsi ngembikwekutsi kucale leyo minyaka lengu-20, “livi laSamuweli lalivakala lihloniphekile kuso sonkhe sive sema-Israyeli.” (1 Sam. 4:1) Lokulandzisa kusitjela kutsi ngemuva kwekuba sekwendlule leyo minyaka, Samuweli abehamba ajikeleta emadolobha lamatsatfu aka-Israyeli, alungisa kungevani, aphindze aphendvule nemibuto. Ngemuva kwaloko bekabese ubuyela edolobheni lakubo eRama. (1 Sam. 7:15-17) Kuyacaca-ke kutsi Samuweli abehlala aphishanekile, futsi nakuleyo minyaka lengu-20, abenalokunyenti lobekufanele akwente.

7, 8. (a) Ngumuphi umlayeto Samuweli lawetfulela bantfu ngemuva kweminyaka lengemashumi lamabili yekusebenta matima? (b) Bantfu benta njani nabeva lesicinisekiso lesentiwa nguSamuweli?

⁷ Kutiphatsa kabi nekonakala kwemadvodzana a-Eli bekukucedze nya kukholwa kwalabanye bantfu. Kubonakala shengatsi loku kwase kwenta labanyenti bacala kukhonta tithico. Ngemuva kweminyaka lengemashumi lamabili yekusebenta kamatima, Samuweli wetfula lomlayeto kubantfu: “Naniphendvukela kuSimakadze ngayo yonkhe inhlitiyo yenu, kufanele nitisuse tonkhe letithico tebetive kanye nabo-Ashtarothe benu, bese nitinikela kuSimakadze nikhonte yena yedvwa, yena-ke utawube sewuyanikhulula esandleni semaFilisti.”​—1 Sam. 7:3.

⁸ “Sandla semaFilisti” besibacindzetela kakhulu bantfu. Njengobe libutfo lema-Israyeli beselincotjiwe, emaFilisti ativa akhululekile kucindzetela bantfu baNkulunkulu, ati kutsi abengeke entiwe lutfo ngaloko. Samuweli wacinisekisa ema-Israyeli kutsi lesimo besiyogucuka nangabe nje abuyela kuJehova. Abefisa yini ema-Israyeli kwenta loko? Ngekuhambisana naloko lobekufiswa nguSamuweli, alahla tithico tawo “ase akhonta Simakadze yena yedvwa.” Samuweli walungiselela kutsi kube nemhlangano eMispa, lokwakulidolobha leliseveni lelitintsabantsaba enyakatfo yeJerusalema. Bantfu bahlangana, bazila kudla, baphindze baphendvuka etonweni tabo letinyenti tekukhonta tithico.​—Fundza 1 Samuweli 7:4-6.

9. Nguliphi litfuba emaFilisti lalitfola, futsi yini bantfu baNkulunkulu labayenta nababona leyo ngoti?

 ⁹ EmaFilisti eva ngalombutsano lomkhulu ase abona kutsi bekulitfuba lekuhlasela. Atfumela libutfo lawo kutsi liyocotfula tikhonti taJehova eMispa. Ema-Israyeli eva imibiko ngalengoti lebeyiwasondzelela. Njengobe abetfuke kakhulu, acela kutsi Samuweli awathantazele. Wawathantazela, waphindze wenta nemhlatjelo. Ngalesikhatsi usachubeka loyo mkhosi longcwele, emaFilisti atseleka eMispa. Jehova wabese uyawuphendvula umthantazo waSamuweli. Waletsa simo lesesabeka kakhulu. Nkulunkulu wabangela kutsi ‘lidvume kakhulu kumaFilisti.’​—1 Sam. 7:7-10.

10, 11. (a) Kungani kubonakala shengatsi bekunalokutsite lokungakavami ngalokudvuma Jehova lakuletsela libutfo lemaFilisti? (b) Waba yini umphumela walemphi leyesuka eMispa?

¹⁰ Kufanele yini sicabange kutsi lamaFilisti abesanjengebantfwana labancane, lokutsi ngekwesaba lokukhulu bagijime bayobhaca ngemuva kwabonina nabeva litulu lidvuma kamatima? Cha, phela lawa bekungemasotja latidlakela futsi lasanesikhatsi enta lomsebenti. Lokudvuma loku kufanele kutsi bekwehluke kakhulu kunanome yini lebebake bayiva. Bekumane nje kungumsindvo ‘lomkhulu’ yini? Lomsindvo bewuchamuka esibhakabhakeni lesingenalutfo yini, nome bewuchamuka ngemuva kwetintsaba? Nanome singaciniseki kutsi yini mbambambamba leyenteka, siyati kutsi lolokwenteka kwenta emaFilisti adideka futsi esaba. Kuloko kudideka, tintfo tawajikela, kunekutsi wona ahlasele, besekungiwo lahlaselwako. Emadvodza aka-Israyeli aphuma ngalamakhulu ematubane eMispa, agijimisa emaFilisti sigaba lesidze, ate ayofika eningizimu nshonalanga yeJerusalema.​—1 Sam. 7:11.

¹¹ Lemphi yaletsa lushintjo lolukhulu kubantfu baNkulunkulu. EmaFilisti awazange aphindze abahlasele kuso sonkhe sikhatsi Samuweli laba ngaso sikhulu. Emadolobha labetfunjiwe aphindze abuyela kubantfu baNkulunkulu.​—1 Sam. 7:13, 14.

12. Kusho kutsini kutsi Samuweli ‘wenta lokulungile,’ futsi yini leyamsita kutsi ahlale enta njalo?

¹² Ngemuva kwemakhulu eminyaka, umphostoli Pawula wabala Samuweli eluhlwini lwetikhulu nebaphrofethi labetsembekile ‘labenta lokulungile.’ (Heb. 11:32, 33) Samuweli wakwenta mbamba lokuhle emehlweni aNkulunkulu waphindze wakhutsata nalabanye kutsi bente lokufanako. Wachubeka aphumelela ngobe abehlale alindze Jehova, ngaso sonkhe sikhatsi enta umsebenti wakhe ngekwetsembeka nangetulu kwekudvumateka. Waphindze wakhombisa kutsi ungumuntfu lobongako. Ngemuva kwekuncoba kulemphi lebeyiseMispa, Samuweli wamisa litje lelikhulu lebelitawuba sikhumbuto sendlela Jehova lasite ngayo bantfu bakhe.​—1 Sam. 7:12.

13. (a) Ngubuphi buntfu lesibudzingako nangabe sifuna kulingisa Samuweli? (b) Ucabanga kutsi ngusiphi sikhatsi lesikahle sekufundza kuba nebuntfu lobunjengebaSamuweli?

 ¹³ Uyafuna yini nawe ‘kwenta lokulungile’? Nangabe kunjalo, utawube wenta kahle nawulingisa sibonelo saSamuweli sekubeketela, kutfobeka, kanye nekubonga. (Fundza 1 Phetro 5:6.) Ngubani nje emkhatsini wetfu longadzingi kuba nebuntfu lobunjalo? Kwaba kahle kakhulu ngaSamuweli kutsi abe nebuntfu lobunjalo futsi abuvete asemncane, ngobe wahlangabetana nekudvumateka lokukhulu nasakhulile.

14, 15. (a) Ngukuphi kudvumateka lokukhulu Samuweli labhekana nako lapho ‘sekamdzala’? (b) Samuweli abengubabe loyekelelako yini njenga-Eli? Chaza.

¹⁴ Siphindze sifundze ngaSamuweli ngesikhatsi ‘sekamdzala.’ Ngaleso sikhatsi, Samuweli abenemadvodzana lasakhulile lamabili, boJoweli na-Abiya, futsi wawaniketa umsebenti wekutsi amsite ekwehluleleni. Ngelishwa, lelitsemba lakhe abelibeke endzaweni lengasiyo. Nanome Samuweli abelungile futsi etsembekile, emadvodzana akhe asebentisa letikhundla tawo kuze atizuzise wona, agwegwisa umtsetfo aphindze emukela kudizelwa.—1 Sam. 8:1-3.

¹⁵ Ngalelinye lilanga, emadvodza lamadzala aka-Israyeli aya kulomphrofethi losakhulile ayokhonona. Afike atsi: ‘Emadvodzana akho akatiphatsi kahle njengawe.’ (1 Sam. 8:4, 5) Abeyati yini Samuweli  lenkinga? Asitjelwa lutfo mayelana naloko. Ngalokungafanani na-Eli, Samuweli abengasuye babe loyekelelako. Jehova wamsola waphindze wamjezisa Eli ngekwehluleka kwekhuta bubi bemadvodzana akhe, nekuhlonipha wona kakhulu kunaNkulunkulu. (1 Sam. 2:27-29) Jehova akazange awabone emaphutsa lanjalo kuSamuweli.

16. Bativa njani batali labanebantfwana labangalaleli, futsi batali bangayitfola njani indvudvuto nesicondziso lesihle esibonelweni saSamuweli?

¹⁶ Lokulandzisa kweliBhayibheli akukhulumi ngekutsi Samuweli wativa ahlazekile, akhatsatekile, nome advumele ngemuva kwekuva kutsi emadvodzana akhe atiphatsa kabi. Kodvwa kungaba melula kubatali labanyenti kubona kutsi Samuweli wativa njani. Kuletikhatsi talamuhla letigcwele umonakalo, kudlange kakhulu kuvukela ligunya neseluleko sebatali. (Fundza 2 Thimothi 3:1-5.) Batali labasesimeni lesibuhlungu lesifanako, bangatfola indvudvuto nesicondziso lesikahle esibonelweni saSamuweli. Akazange avumele kutiphatsa kabi kwebantfwana bakhe kunciphise kukholwa kwakhe. Khumbula kutsi ngisho nobe emavi nesiyalo sebatali kungehluleka kufinyelela tinhlitiyo letilukhuni tebantfwana, sibonelo sabo sona sisengayiletsa imiphumela lemihle. Batali bahlale banelitfuba lekwenta Babe wabo, longuJehova Nkulunkulu, atigcabhe ngabo​—njengobe kwenta Samuweli.

17. Yini emadvodza lamadzala aka-Israyeli labeyifuna kuSamuweli, futsi wativa njani ngaloko?

¹⁷ Emadvodzana aSamuweli kungenteka abengacabangi kutsi bewutawuba mkhulu kangakanani umonakalo lobewubangwa bugovu bawo. Emadvodza lamadzala aka-Israyeli achubeka atsi kuSamuweli: “Sale usibekela inkhosi kuze natsi sibe njengaletinye tive.” Loko labakusho kwenta Samuweli weva shengatsi bebangasamfuni yini? Phela abebe ngumehluleli losebentela Jehova emashumi eminyaka. Manje, bebangasafuni nje umphrofethi njengaSamuweli, kodvwa besebafuna inkhosi letawuba ngumehluleli wabo. Tive lebetiwatungeletile betinawo emakhosi, ngako nema-Israyeli abesafuna kuba neyawo. Wativa njani Samuweli ngaloko? LiBhayibheli litsi “loko kwamphatsa kabi Samuweli.”​—1 Sam. 8:5, 6.

18. Jehova wamdvudvuta njani Samuweli, futsi wabembula njani bukhulu besono sema-Israyeli?

¹⁸ Naka kutsi Jehova waphendvula watsini ngalesikhatsi Samuweli ancuma kwetfula lendzaba kuye ngemthantazo: “Kulalele konkhe loko lokukhulunywa ngulesive kuwe; akusiwe labamlahlile, kodvwa sebalahle mine kutsi ngibe yinkhosi yabo.” Cabanga nje kutsi lamavi amdvudvuta njani Samuweli, kodvwa loko lokwakushiwo ngulabantfu bekumhlambalata kakhulu Nkulunkulu Somandla! Jehova watjela umphrofethi wakhe kutsi ecwayise ema-Israyeli ngemiphumela lemibi lebeyitawubangwa kuba nenkhosi lengumuntfu. Ngalesikhatsi Samuweli enta njengobe atjeliwe, bantfu baphikelela batsi: “Cha! Sifuna  inkhosi letasihola.” Alalela loko lokwakushiwo nguNkulunkulu wakhe, Samuweli wahamba wayogcoba inkhosi lebeyikhetfwe nguJehova.​—1 Sam. 8:7-19.

19, 20. (a) Samuweli wasilalela njani sicondziso saJehova sekutsi agcobe Sawula kutsi abe yinkhosi yaka-Israyeli? (b) Samuweli wachubeka abasita njani bantfu baJehova?

¹⁹ Yini Samuweli layenta kulendzaba? Wacansuka yini nome wangavumelani kahle naloko labetjelwe kutsi akwente? Wakuvumela yini kudvumateka kulimate inhlitiyo yakhe, nekutsi kucansuka kwakhele kuyo? Bantfu labanyenti bangaba nemiva lenjalo nabasesimeni lesinjengesaSamuweli, kodvwa yena akazange. Wagcoba Sawula futsi wavuma kutsi lendvodza beyikhetfwe nguJehova. Wanga Sawula, futsi loko bekuluphawu lwekwemukela lenkhosi nekutitfoba kuyo. Wase sewutsi kubantfu: “Niyambona-ke umuntfu lokhetfwe nguSimakadze? Kute namunye lofanana naye kubo bonkhe labanye bantfu.”​—1 Sam. 10:1, 24.

²⁰ Samuweli wanaka lokuhle, hhayi emaphutsa alendvodza Jehova labeyikhetsile. Wabese unaka nemlandvo wakhe webucotfo kuNkulunkulu kunekunaka kwemukelwa bantfu labagucugucukako. (1 Sam. 12:1-4) Waphindze wasebenta ngekwetsembeka emsebentini wakhe, eluleka bantfu baNkulunkulu mayelana netingoti letitsintsa buhlobo babo naNkulunkulu, futsi wabakhutsata kutsi bahlale betsembekile kuJehova. Seluleko sakhe satitsintsa tinhlitiyo talabantfu, base bacela Samuweli kutsi abathantazele. Wabaniketa nayi imphendvulo lenhle kakhulu: “Kodvwa mine akube khashane nami kutsi ngingona kuSimakadze ngekutsi ngingete nganikhulekela. Ngitanifundzisa indlela lenguyonayona nalelungile.”​—1 Sam. 12:21-24.

21. Sibonelo saSamuweli singaba lusito kanjani nangabe kwenteka utiva udvumele ngenca yekutsi lomunye utfole sikhundla nome lilungelo lelitsite?

²¹ Wake wativa yini udvumatekile ngenca yekutsi lomunye unikwe lilungelo nome sikhundla lesitsite? Sibonelo saSamuweli sisikhumbuto lesihle kakhulu sekutsi akukafaneli sivumele umona nome kucansuka kwakhele etinhlitiyweni tetfu. (Fundza Taga 14:30.) Nkulunkulu unemsebenti lomnyenti lozuzisako nalowenetisako longentiwa ngito tonkhe tinceku takhe letetsembekile.

22. Kungani Samuweli angentanga liphutsa ngekubona lokuhle Sawula labenako ekucaleni?

²² Samuweli abengakenti liphutsa ngekubona lokuhle kuSawula, vele Sawula abeyindvodza lemangalisako. Abemudze, alikhwa, abephindze anesibindzi, ahlakaniphile, futsi ekucaleni abetfobekile, angatiphakamisi. (1 Sam. 10:22, 23, 27) Ngetulu kwaletiphiwo  lesisandza kutibala, abenalesiligugu kakhulu​—inkhululeko yekutikhetsela, lokulikhono lekukhetsa indlela latawuphila ngayo aphindze atentele tincumo takhe. (Dut. 30:19) Wasisebentisa kahle yini leso siphiwo?

23. Nguyiphi intfo leligugu leyaba yekucala kulahlekela Sawula, futsi wakhombisa njani kutsi kutigabatisa kwakhe bekuya embili?

²³ Ngelishwa, nangabe umuntfu aniketwe ligunya, kutfobeka ngiko lokuvame kusheshe kumphelele. Masinyane, Sawula wacala kutigabatisa. Wakhetsa kungayilaleli imiyalo yaJehova labeyitjelwa nguSamuweli. Ngalesinye sikhatsi, Sawula wehluleka kubeketela wenta umhlatjelo lobekunguSamuweli kuphela labenelilungelo lekuwenta. Kwadzingeka kutsi Samuweli amnikete siyalo lesicinile, wabiketela nekutsi bukhosi bebungeke buhlale emndenini wakhe. Kunekutsi afundze kuleso siyalo, Sawula wachubeka wenta lokubi kakhulu.​—1 Sam. 13:8, 9, 13, 14.

24. (a) Sawula wamdzelela njani Jehova nakalwa imphi nema-Amaleki? (b) Sawula wenta njani ngesiyalo laniketwa sona, futsi saba yini sincumo saJehova kulendzaba?

²⁴ Jehova watfumela Samuweli kutsi atjele Sawula ayokulwa nema-Amaleki. Ticondziso taJehova betifaka ekhatsi kutsi abulale Agagi, inkhosi lembi yema-Amaleki. Kodvwa Sawula akambulalanga Agagi, futsi akazange atibhubhise naletinye tintfo letinhle lebekutsiwe atibhubhise. Kwatsi lapho Samuweli amyala ngaloko labekwentile, Sawula wakhombisa kutsi abesashintje kangakanani. Kunekutsi asemukele ngekutitfoba lesiyalo, watitsetselela, wetama kuyendlulisa lendzaba, futsi wasola labanye bantfu ngaloko lokwentekile kunekutsi avume liphutsa lakhe. Ngalesikhatsi Sawula etama kubalekela lesiyalo ngekutsi atsi letinye taletintfo langakatibhubhisi utibekele kutsi kwentiwe ngato umhlatjelo kuJehova, Samuweli washo lamavi ladvumile latsi: “Kulalela kuncono kunemhlatjelo.” Ngesibindzi, Samuweli wayikhuta lendvodza futsi wayitjela ngesincumo lesitsetfwe nguJehova mayelana naloko lekwentile: Lobukhosi bebutawususwa kuSawula, buniketwe umuntfu loncono kunaye. *​—1 Sam. 15:1-33.

25, 26. (a) Samuweli abemlilelelani Sawula, futsi Jehova wameluleka njani ngemusa lomphrofethi waKhe? (b) Ngusiphi sifundvo lesafundvwa nguSamuweli nakefika endlini yaJese?

²⁵ Amjabhisa kakhulu Samuweli emaphutsa labentiwa nguSawula.  Wacitsa busuku bonkhe akhala kuJehova mayelana nalendzaba. Waze wahamba wayoyililela lendvodza. Samuweli abebone emakhono, kanye nebuntfu lobuhle kuSawula, kodvwa manje onkhe ematsemba labenawo abesashabalele. Lendvodza labeyati beseyishintjile​—beseyilahlekelwe buntfu bayo lobuhle futsi seyimgucukele naJehova. Samuweli akafunanga kuphindze ambone Sawula. Ngekuhamba kwesikhatsi, Jehova weluleka Samuweli ngemusa watsi: “Utamkhalela kuze kube ngunini Sawula, ngobe sengimalile kutsi abe yinkhosi yema-Israyeli? Gcwalisa luphondvo lwakho ngemafutsa, ungenele indlela yakho. Ngikutfuma endlini yakaJese waseBhetlehema, ngobe ngitikhetsele lomunye wemadvodzana akhe kutsi abe yinkhosi.”​—1 Sam. 15:34, 35; 16:1.

²⁶ Injongo yaJehova ayiyi ngebantfu labanesono, labahle bangabi cotfo. Nangabe lotsite angasatsembeki, Jehova utfola lomunye latamsebentisa ekufezeni intsandvo yaKhe. Ngako Samuweli labesakhulile wayekela lokulibala kukhalela Sawula. Acondziswa nguJehova, Samuweli wahamba waya ekhaya laJese eBhetlehema, lapho akhandza khona emadvodzana aJese lamahle. Jehova wavele wamkhumbuta ekucaleni nje Samuweli kutsi anganaki kubukeka kwangephandle. (Fundza 1 Samuweli 16:7.) Ekugcineni, Samuweli wabona Davide, indvodzana yaJese lencane kunawo onkhe, futsi nguye labekhetfwe nguJehova.

27. (a) Yini leyenta kukholwa kwaSamuweli kwachubeka kucina kakhulu? (b) Utiva njani ngalesibonelo lesabekwa nguSamuweli?

²⁷ Eminyakeni yakhe yekugcina, Samuweli wacala kubona kahle kutsi sincumo saJehova sekubeka Davide esikhundleni saSawula besisihle kakhulu. Sawula wase sewuba sihlubuki, wacala kuba nemona, asafuna nekubulala Davide. Nanome kunjalo, Davide wakhombisa buntfu lobuhle​—sibindzi, bucotfo, kukholwa, kanye nekwetsembeka. Njengobe emalanga ekufa kwaSamuweli abesasondzela, kukholwa kwakhe kwacina kakhulu. Wabona kutsi akukho kudvumateka lokukhulu Jehova langehluleka kukwelapha, kukulungisa, nome langehluleka kukugucula kube sibusiso. Ekugcineni, Samuweli wafa, washiya ngemuva umlandvo lomuhle wekuphila kwakhe lokwatsatsa iminyaka lecishe ibe likhulu. Akumangalisi kutsi onkhe ema-Israyeli alila kakhulu ngekulahlekelwa yindvodza leyetsembeke ngalendlela. Kuze kube ngulamuhla, tinceku taJehova tenta kahle ngekutibuta kutsi: ‘Ngitakulingisa yini kukholwa kwaSamuweli?’