SIFUNDVO 46
Kungani Kufanele Utinikele Futsi Ubhajatiswe?
Utinikela kuJehova ngekuthantaza umetsembise kutsi utawukhonta yena yedvwa, nekutsi utawenta intsandvo yakhe ite kucala ekuphileni kwakho. (Tihlabelelo 40:8) Ngemuva kwaloko, ubese uyabhajatiswa. Ngekwenta njalo, usuke ukhombisa labanye kutsi sewutinikele. Kutinikela kuJehova kusincumo lesibaluleke kakhulu longasenta. Lesi sincumo lesibaluleke kakhulu lesingashintja kuphila kwakho. Yini lengakwenta usitsatse?
1. Yini lekhutsata umuntfu kutsi atinikele?
Indlela lesimtsandza ngayo Jehova isenta kutsi sitinikele kuye. (1 Johane 4:10, 19) LiBhayibheli liyasikhutsata litsi: “Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho, nangawo onkhe emandla akho.” (Makho 12:30) Sikhombisa kutsi siyamtsandza Nkulunkulu hhayi ngemavi kuphela kodvwa nangetento tetfu. Njengobe nebantfu labatsandzanako bashada, natsi indlela lesimtsandza ngayo Jehova isenta sitinikele kuye futsi sibhajatiswe.
2. Jehova ubabusisa njani boFakazi bakhe lababhajatisiwe?
Nawubhajatiswa, utawuba lilunga lemndeni waJehova futsi utawujabula kanye nawo. Nawubona tindlela letinyenti Jehova lakhombisa ngato kutsi uyakutsandza utawubese usondzela kakhulu kuye. (Fundza Malakhi 3:16-18.) Ngetulu kwekutsi Jehova utawuba nguBabe wakho, utawuba nalilunga lemndeni webazalwane nabodzadze labakutsandzako nalabatsandza Jehova. (Fundza Makho 10:29, 30.) Kuliciniso kutsi ngaphambi kwekutsi ubhajatiswe kufanele wente lokutsite. Kufanele ufundze ngaJehova, umtsandze futsi ube nekukholwa eNdvodzaneni yakhe, bese ekugcineni unikela kuphila kwakho kuJehova. Nawenta konkhe loku futsi ubhajatiswe, utawuba sendleleni leya ekuphileni lokuphakadze. LiVi laNkulunkulu litsi: “Lubhabhatiso . . . seluyanisindzisa.”—1 Phetro 3:21.
CHUBEKA UFUNISISA
Tfola kutsi kubaluleke ngani kutinikela kuJehova futsi ubhajatiswe.
3. Sonkhe kufanele sikhetse kutsi sitawukhonta bani
Ka-Israyeli wasendvulo, labanye bantfu bebacabanga kutsi bangamkhonta Jehova ngesikhatsi lesifanako babebakhonta naBhali, nkulunkulu wemanga. Nobe kunjalo, Jehova watfumela umphrofethi wakhe Elija kutsi alungise indlela labantfu lebebacabanga ngayo. Fundza 1 Emakhosi 18:21, bese nicoca ngalombuto:
-
Ngusiphi sincumo ema-Israyeli lebekufanele asente?
Njengema-Israyeli, natsi kufanele sikhetse kutsi sitawukhonta bani. Fundza Lukha 16:13, bese nicoca ngalemibuto:
-
Kungani singeke sikhone kukhonta Jehova ngesikhatsi lesifanako sibe sikhonta lomunye umuntfu nobe lenye intfo?
-
Simkhombisa njani Jehova kutsi sikhetsa kukhonta yena?
4. Cabangisisa ngendlela Jehova lakutsandza ngayo
Jehova usiphe tipho letinyenti letinhle. Tsine singamupha ini? Dlala le-VIDEO.
Ngutiphi letinye tindlela Jehova lakhombise ngato kutsi uyakutsandza? Fundza Tihlabelelo 104:14, 15 na-1 Johane 4:9, 10, bese nicoca ngalemibuto:
-
Ngutiphi tipho letivela kuJehova lobonga kakhulu ngato?
-
Letipho tikwenta utive njani ngaJehova?
Nasiphiwe sipho lesisitsandzako sifuna kukhombisa lomuntfu losiphe sona kutsi siyabonga ngaso. Fundza Dutheronomi 16:17, bese nicoca ngalombuto:
-
Nawucabanga ngako konkhe Jehova lakwentele kona ukhutsateka kutsi umenteleni?
5. Kutinikela kuletsa tibusiso letinyenti
Bantfu labanyenti bacabanga kutsi ludvumo, kuba nemsebenti lokahle, nobe kuba nemali kutabaletsela injabulo. Kuliciniso yini loko? Dlala le-VIDEO, bese nicoca ngalemibuto lelandzelako.
-
Ngisho nobe lendvodza lekule-video beyikutsandza kudlala ibhola, yini leyayenta yayiyekela?
-
Yakhetsa kutimisela kukhonta Jehova kunekudlala ibhola. Ucabanga kutsi yenta sincumo lesikahle yini? Usho ngani?
Ngaphambi kwekutsi umphostoli Pawula abe ngumKhristu, bekafundzela umsebenti losetulu. Thishela lodvumile bekamfundzise umtsetfo wemaJuda. Nobe kunjalo, wakushiya konkhe loko kuze abe ngumKhristu. Watisola yini Pawula ngako konkhe loku? Fundza KubaseFiliphi 3:8, bese nicoca ngalemibuto:
-
Yini leyenta Pawula watsi konkhe lebekakwenta ngaphambi kwekutsi abe ngumKhristu bekakutsatsa “njengencumbi yetibi”?
-
Yini labese uyayitfola?
-
Ngukuphi lokuncono nawucatsanisa kukhonta Jehova kanye nalenye indlela longakusebentisa ngayo kuphila kwakho?
Pawula watfola lokunyenti kakhulu ngesikhatsi aba ngumKhristu kunaloko lokwamlahlekela
LABANYE BANTFU BATSI: “Akunangcondvo kunikela kuphila kwakho kuNkulunkulu.”
-
Ucabanga kutsi kukahle yini kunikela kuphila kwakho kuJehova?
LOKO LESICOCE NGAKO
Lutsandvo lusenta sitinikele kuJehova futsi sibhajatiswe.
Yini Loyifundzile?
-
Yini leyenta Jehova kumfanele kutsi simtsandze ngenhlitiyo yonkhe futsi simkhonte?
-
Jehova ubabusisa njani boFakazi bakhe lababhajatisiwe?
-
Ungatsandza yini kutinikela kuJehova?
LOKUNYE LONGAKUHLOLA
Buka kutsi yini leyenta lendvondza nalowesifazane bakhetsa kutinikela kuJehova.
Bantfu Labasha Bayabuta—Ngitawentani Ngekuphila Kwami?—Limuva Lami (6:54)
Fundza ngaletinye tizatfu tekutinikela.
“Kungani Kufanele Utinikele KuJehova?” (Sicongosekulindza, saJanuary 1, 2010)
Kule-video yemculo, buka injabulo labo labatinikela kuJehova lababa nayo.
Endzabeni lenesihloko lesitsi “Sekuyiminyaka Ngizibuza Ukuthi, ‘Kungani Silapha?’” naka kutsi yini leyenta lowesifazane wahlolisisa kutsi yini lebeyita kucala ekuphileni kwakhe.
“IBhayibheli Lishintsha Ukuphila” (Sicongosekulindza, saNovember 1, 2012 lesitfolakala ngesiZulu)
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
