SIFUNDVO 40
Yini Lesingayenta Kuze Sibe Bantfu Labahlantekile Emehlweni ANkulunkulu?
Cabanga ngamake lonelutsandvo lolungiselela umfanyana wakhe kutsi aye esikolweni. Uyaciniseka kutsi lomntfwana wakhe ugezile futsi netimphahla takhe tihlobile. Loku kwenta lomntfwana abe nemphilo lenhle futsi kukhombisa nalabanye kutsi batali bakhe bayamnakekela. Ngendlela lefanako, Babe wetfu lonelutsandvo, Jehova, ufuna sihlanteke emtimbeni nasendleleni lesitiphatsa ngayo. Nasihlantekile, sitisita tsine futsi siletse ludvumo kuye.
1. Singahlanteka njani emtimbeni?
Jehova usitjela kutsi ‘kufanele sibe ngcwele.’ (1 Phetro 1:16) Kuze sibe ngcwele, kufanele sihlanteke emtimbeni nasendleleni lesitiphatsa ngayo. Kuze sihlanteke emtimbeni, kufanele sigeze njalo futsi sigcine timphahla tetfu, emakhaya etfu kanye netimoto tetfu kuhlantekile. Singaphindze sisite nasekuhlanteni emaHholwa eMbuso. Sidvumisa Jehova ngekutigcina sihlantekile emtimbeni.—2 KubaseKhorinte 6:3, 4.
2. Ngumiphi imikhuba lokufanele siyibalekele nasifuna kuba bantfu labahlantekile?
LiBhayibheli lisikhutsata kutsi ‘sitihlante kuko konkhe kungcola kwenyama nekwemoya.’ (2 KubaseKhorinte 7:1) Loko kusho kutsi kufanele sibalekele nobe ngabe yini lengangcolisa imitimba netingcondvo tetfu. Imicabango yetfu kufanele imjabulise Jehova, ngako senta konkhe lokusemandleni etfu kuze sisuse imicabango lengakalungi. (Tihlabelelo 104:34) Siphindze sente konkhe lokusemandleni etfu kuze sikhulume tintfo letihlantekile.—Fundza KubaseKholose 3:8.
Yini lenye lengangcolisa imitimba kanye nekutiphatsa kwetfu? Letinye tintfo tingawulimata umtimba wetfu. Ngako kufanele singalisebentisi ligwayi futsi singatisebentisi kabi netidzakamiva. Ngekubalekela loku, siba nemphilo lenhle futsi sikhombisa kutsi siyasihlonipha sipho sekuphila. Siphindze sente konkhe lesingakwenta kuze sitigcine sihlantekile ngekulwa nemikhuba lengcolile lenjengekushaya indlwabu kanye nekubukela titfombe letikhombisa kungcola. (Tihlabelelo 119:37; Kubase-Efesu 5:5) Kungaba matima kuncoba lemikhuba, kodvwa Jehova angasisita siyincobe.—Fundza Isaya 41:13.
CHUBEKA UFUNISISA
Fundza kutsi simdvumisa njani Jehova nasihlantekile emtimbeni uphindze utfole kutsi singayincoba njani imikhuba lengcolile.
3. Kuhlanteka emtimbeni kudvumisa Jehova
Nasifundza ngemtsetfo Jehova lawuniketa sive sema-Israyeli, siyabona kutsi kubaluleke kangakanani kuye kutsi bantfu bakhe bahlanteke. Fundza Eksodusi 19:10; na-30:17-19, bese nicoca ngalemibuto:
-
Lamavesi avetani ngembono waJehova ngekuhlanteka emtimbeni?
-
Yini longayenta ngaso sonkhe sikhatsi kuze uhlale uhlantekile?
Kuhlanteka emtimbeni kudzinga umetamo futsi kutsatsa sikhatsi. Singahlala sihlantekile ngisho nobe sihlala kuphi, sinjingile nobe seswele. Dlala le-VIDEO, bese nicoca ngalombuto lolandzelako.
-
Kugcina tintfo tetfu tihlantekile kutabenta njani bantfu lesibashumayelako bahloniphe Jehova?
4. Ncoba imikhuba lemibi
Jehova angasisita sincobe nobe ngabe ngumuphi umkhuba lomubi
Nangabe uyabhema nobe usebentisa kabi tidzakamiva, kungenteka uyati kutsi kumatima kuwuyekela lomkhuba. Yini lengakusita? Cabanga ngekutsi lomkhuba ukulimata njani. Fundza Matewu 22:37-39, bese nicoca ngendlela ligwayi nekusebentisa kabi tidzakamiva lokubutsintsa ngayo . . .
-
buhlobo umuntfu lanabo naJehova
-
umndeni wakhe kanye nalabasedvute naye
Yenta luhlelo lwekuncoba umkhuba lomubi. a Dlala le-VIDEO.
Fundza KubaseFiliphi 4:13, bese nicoca ngalombuto:
-
Kuthantaza njalo, kutadisha liBhayibheli nekuba khona emihlanganweni, kungamsita njani umuntfu kutsi ancobe umkhuba lomubi?
5. Lwisana nemicabango kanye nemikhuba lengcolile
Fundza KubaseKholose 3:5, bese nicoca ngalemibuto:
-
Sati njani kutsi kubukela titfombe letikhombisa kungcola, kutfumelelana imilayeto, titfombe nobe ema-video ngekuya ecasini kanye nekushaya indlwabu kungcolile emehlweni aJehova?
-
Ucabanga kutsi kukahle yini kutsi Jehova alindzele kutsi sitiphatse ngendlela lehlantekile? Usho ngani?
Tfola kutsi ungalwisana njani nemicabango lengcolile. Dlala le-VIDEO.
Jesu wasebentisa umfanekiso kuze akhombise kutsi kufanele sitimisele kuze sihlale sitiphatsa ngendlela lehlantekile. Fundza Matewu 5:29, 30, bese nicoca ngalombuto:
-
Jesu bekangasho kutsi sitilimate mbamba, kodvwa bekasho kutsi kudzingeka kube khona lokwentako. Ngusiphi sinyatselo lesicinile umuntfu langasitsatsa kuze abalekele imicabango lengcolile? b
Nangabe ulwela kuncoba imicabango lengcolile, Jehova uyajabula ngemetamo yakho. Fundza Tihlabelelo 103:13, 14, bese nicoca ngalombuto:
-
Nangabe ulwisana nemkhuba longcolile, lombhalo ukusita njani kutsi uchubeke ulwa?
Kuwa, akusho kwehluleka!
Kungaba melula kuphetsa ngekutsi, ‘Sengehlulekile, asale vele ngiyekela.’ Cabanga nganaku: Kutsi ingijimi iwile, akusho kutsi ngeke isafika etsanjeni futsi akusho nekutsi kutawudzingeka iyocala phansi. Ngendlela lefanako, kutsi uphindze wawenta lomkhuba akusho kutsi sewehlulekile kulwa nawo. Akusho nekutsi imetamo yakho yasesikhatsini lesendlulile beyilite. Kuwa kuyintfo levamile, kuyincenye yekulwa kwakho nalomkhuba. Ungapheli emandla! Ngekusitwa nguJehova, ungawuncoba lomkhuba.
LABANYE BANTFU BATSI: “Lomkhuba sewungingenile, angeke ngikhone kuwuyekela.”
-
Ngumuphi umbhalo longawusebentisa kuze ukhombise lomuntfu kutsi Jehova angamsita awuyekele lomkhuba lomubi?
LOKO LESICOCE NGAKO
Sijabulisa Jehova nasigcina imitimba yetfu, tingcondvo tetfu nendlela lesitiphatsa ngayo kuhlantekile.
Yini Loyifundzile?
-
Kubaluleke ngani kuhlanteka?
-
Ungahlanteka njani emtimbeni?
-
Ungayigcina njani imicabango kanye nekutiphatsa kwakho kuhlantekile?
LOKUNYE LONGAKUHLOLA
Ngutiphi tintfo letimelula longatenta kuze uhlale uhlantekile emtimbeni ngisho nobe weswele?
Tfola tinyatselo longatitsatsa kuze ukhone kuyekela kubhema.
“Indlela Yokuyeka Ukubhema” (Phaphama! yaMay 2010, letfolakala ngesiZulu)
Fundza ngemiphumela yekubukela titfombe letikhombisa kungcola.
Fundza kutsi lenye indvodza yawuncoba njani umkhuba wekubukela titfombe letikhombisa kungcola, lebesekulukhuni kuwuyekela.
“Ngehluleka Kanyenti, Kodvwa Ngagcine Ngiphumelele” (Sicongosekulindza No. 4 2016)
a Esihlokweni lesitsi “Indlela Yokuyeka Ukubhema,” lesisencenyeni letsi “Lokunye Longakuhlola,” kulesifundvo, kuchazwa tintfo longatenta kuze uncobe umkhuba longayekeleki.
b Kuze utfole lusito lwekuncoba umkhuba wekushaya indlwabu, fundza sihloko lesitsi “Ngingawunqoba Kanjani Umkhuba Wokushaya Indlwabu?” lesisencwadzini letsi Intsa Iyabuza—Izimphendulo Ezisebenzayo, Umqulu 1, sehluko 25, letfolakala ngesiZulu.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
