SIFUNDVO 20
Indlela Libandla Lelihlelwe Ngayo
Jehova nguNkulunkulu lohlelekile. (1 KubaseKhorinte 14:33) Ngako silindzele nekutsi bantfu bakhe bahleleke. Lihlelwe njani libandla lebuKhristu? Yini lesingayenta kuze konkhe kuhambe kahle ebandleni?
1. Ngubani umholi welibandla?
‘Khristu uyinhloko yelibandla.’ (Kubase-Efesu 5:23) Ngisho nobe asezulwini, Jesu uhola yonkhe imisebenti leyentiwa bantfu baJehova emhlabeni wonkhe. Jesu ubeke ‘sisebenti lesetsembekile nalesihlakaniphile,’ lokulicembu lelincane lemadvodza lamadzala lasakhonte Jehova ngekwetsembeka sikhatsi lesidze, laphindze abitwe ngekutsi Sigungu Lesibusako. (Fundza Matewu 24:45-47.) Njengebaphostoli nemadvodza lamadzala aseJerusalema angelikhulu lekucala, Sigungu Lesibusako siniketa ticondziso emabandleni lasemhlabeni wonkhe. (Imisebenti 15:2) Nobe kunjalo, lamadvodza awasibo baholi benhlangano yetfu. Afundza liBhayibheli kuze atfole loko Jehova lafuna akwente, futsi alandzela ticondziso taJesu ngekutitsandzela.
2. Uyini umsebenti walabadzala belibandla?
Labadzala belibandla ngemadvodza langemaKhristu, lasakhonte Jehova ngekwetsembeka sikhatsi lesidze. Bafundzisa bantfu baJehova loko lokuseBhayibhelini, babasite baphindze babakhutsate. Ababhadalwa ngalomsebenti labawentako. Kunaloko, ‘bawenta ngekutitsandzela embikwaNkulunkulu, hhayi ngekufuna kutizuzisa, kodvwa ngekutimisela.’ (1 Phetro 5:1, 2) Labadzala basitwa tinceku letisebentako, lokutsi ngekuhamba kwesikhatsi, nasetifaneleka tigcine setingulabadzala.
Sigungu Lesibusako simisa labanye labadzala kutsi babe babonisi labajikeletako. Lababonisi bavakashela emabandla lehlukahlukene kuze bacondzise futsi bakhutsate bazalwane nabodzadze. Nabamisa labadzala kanye netinceku letisebentako, basebentisa loko lokushiwo liBhayibheli.—1 KuThimothi 3:1-10, 12; KuThithusi 1:5-9.
3. Uyini umsebenti waFakazi waJehova ngamunye?
Bonkhe ebandleni ‘badvumisa libito laJehova’ ngekwenta konkhe lokwentiwa emihlanganweni yelibandla kanye nekushumayela, kuye ngetimo tabo.—Fundza Tihlabelelo 148:12, 13.
CHUBEKA UFUNISISA
Fundza kutsi Jesu ungumholi lonjani nendlela labadzala labazama ngayo kumlingisa, kanye nekutsi singamlalela njani Jesu futsi sibambisane nalabadzala.
4. Jesu ungumholi lonemusa
Jesu usimema ngemusa. Fundza Matewu 11:28-30, bese nicoca ngalombuto:
-
Ungumholi lonjani Jesu futsi ufuna sitive njani ngekuholwa nguye?
Labadzala belibandla basilingisa njani sibonelo lesabekwa nguJesu? Dlala le-VIDEO.
LiBhayibheli likuveta ngalokucacile kutsi labadzala kufanele bawente njani umsebenti wabo.
Fundza Isaya 32:2 na-1 Phetro 5:1-3, bese nicoca ngalemibuto:
-
Utiva njani ngekwati kutsi labadzala, njengaJesu, betama kuphatsa labanye ngemusa?
-
Ngutiphi letinye tindlela labadzala labamlingisa ngato Jesu?
5. Labadzala bafundzisa ngekuba sibonelo
Jesu ufuna labadzala bawutsatse njani umsebenti wabo? Dlala le-VIDEO.
Jesu ubabekela sibonelo labo labaholako emabandla. Fundza Matewu 23:8-12, bese nicoca ngalombuto:
-
Yini loyitsandzako ngemehluko lokhona endleleni liBhayibheli lelitsi labadzala kufanele bahole ngayo kanye naloko lokubone kubaholi benkholo?
-
Labadzala bacinisa buhlobo babo naNkulunkulu kanye nebemindeni yabo
-
Labadzala banakekela bonkhe labasebandleni
-
Labadzala bashumayela njalo
-
Labadzala bayafundzisa, bahlante tindzawo tekukhontela baphindze bente naleminye imisebenti
6. Singabambisana njani nalabadzala?
LiBhayibheli lisiniketa tizatfu letibalulekile tekubambisana nalabadzala. Fundza KumaHebheru 13:17, bese nicoca ngalemibuto:
-
Kungani liBhayibheli litsi kufanele sibalalele ngekutitsandzela labo labaholako? Wena utiva njani ngaloko?
Fundza Lukha 16:10, bese nicoca ngalombuto:
-
Kungani kufanele sichubeke sibalalela labadzala, ngisho nobe sicabanga kutsi loko labakushoko akukabaluleki?
LABANYE BANTFU BATSI: “Akudzingeki kutsi ube senkholweni letsite.”
-
Ucabanga kutsi kukahle ngani kuba yincenye yelibandla?
LOKO LESICOCE NGAKO
NguJesu lohola libandla. Siyakujabulela kubambisana nalabadzala labacondziswa nguye, ngobe basiphatsa ngemusa futsi basifundzisa ngekuba sibonelo.
Yini Loyifundzile?
-
Ngubani umholi welibandla?
-
Labadzala balisita njani libandla?
-
Uyini umsebenti wesikhonti saJehova ngasinye?
LOKUNYE LONGAKUHLOLA
Buka bufakaza bekutsi Sigungu Lesibusako kanye nalabanye labadzala bawakhatsalela njani emaKhristu lamuhla.
Fundza ngemsebenti lowentiwa babonisi betigodzi.
Fundza ngendzima lebalulekile yebantfu besifazane ebandleni.
Fundza indlela labadzala labasebenta kamatima ngayo kuze bakhutsate labakholwa nabo.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
