SIFUNDVO 06
Kwacala Njani Kuphila?
“Nguwe [Nkulunkulu] umtfombo wekuphila.” (Tihlabelelo 36:9) Uyakukholelwa yini loko? Labanye bantfu bacabanga kutsi kuphila kwamane kwativelela nje. Nangabe loko kuliciniso, kusho kutsi natsi sabakhona ngeliphutsa. Nobe kunjalo, nangabe kunguJehova Nkulunkulu lowadala kuphila, kusho kutsi kuphila kunenjongo. a Cabanga ngaloko liBhayibheli lelikushoko mayelana nendlela kuphila lokwacala ngayo nekutsi kungani singakwetsemba loko lelikushoko.
1. Wavelaphi umhlaba kanye nayo yonkhe indalo?
LiBhayibheli litsi: “Ekucaleni Nkulunkulu wadala emazulu nemhlaba.” (Genesisi 1:1) Bososayensi labanyenti bayavuma kutsi umhlaba kanye nayo yonkhe indalo kunesicalo. Nkulunkulu wakudala njani? Wasebentisa ‘umoya wakhe,’ lokungumoya wakhe longcwele kute adale yonkhe intfo, lokufaka ekhatsi tonkhe tinkhanyeti kanye nemaplanethi.—Genesisi 1:2.
2. Kungani Nkulunkulu adala umhlaba?
Jehova ‘akazange awudalele lite nje [umhlaba], kodvwa wawudalela kutsi kuhlalwe kuwo.’ (Isaya 45:18) Wenta umhlaba kutsi ube yindzawo lenhle kuze bantfu bakujabulele kuphila kuwo kuze kube phakadze. (Fundza Isaya 40:28; 42:5.) Bososayensi batsi umhlaba lesihlala kuwo wehlukile kulamanye emaplanethi. Kute lenye iplanethi lenetintfo letidzingekako kute bantfu baphile kuyo.
3. Yini leyenta bantfu behluke etilwaneni?
Ngemuva kwekutsi Jehova adale umhlaba, wase udala tintfo letiphilako kuwo. Wacale wadala tihlahla netilwane. Ngemuva kwaloko, ‘Nkulunkulu wadala umuntfu waba ngumfanekiso wakhe.’ (Fundza Genesisi 1:27.) Yini leyenta bantfu behluke kuto tonkhe tintfo Nkulunkulu latidalile? Ngenca yekutsi bantfu badalwa ngemfanekiso waNkulunkulu, bayakhona kuveta buntfu lobufana nebaKhe, lobufaka ekhatsi lutsandvo kanye nekulunga. Nkulunkulu waphindze wasidala ngendlela yekutsi sikhone kufundza letinye tilwimi, sijabulele tintfo letinhle futsi sitsandze nemculo. Ngalokwehlukile etilwaneni, tsine siyakhona kukhonta uMdali wetfu.
CHUBEKA UFUNISISA
Cabanga ngebufakazi bekutsi kuphila kwadalwa kanye nekutsi loko lokushiwo liBhayibheli ngekudalwa kwetintfo kuliciniso. Tfola kutsi buntfu lobukhonjiswa bantfu, busifundzisani ngaNkulunkulu.
4. Kuphila kwadalwa
Bantfu batfola ludvumo ngetintfo labatakhako labatikope endalweni. Ngako ngubani lokufanele atfole ludvumo ngendalo bantfu labakopa kuyo? Dlala le-VIDEO, bese nicoca ngalombuto lolandzelako.
-
Ngutiphi tintfo letentiwe bantfu labatikope endalweni?
Tonkhe tindlu takhiwe ngumuntfu lotsite, kodvwa ngubani lowadala tonkhe tintfo letikhona? Fundza KumaHebheru 3:4, bese nicoca ngalemibuto:
-
Ngutiphi tintfo letidaliwe lotitsandzako?
-
Kunengcondvo yini kukholelwa kutsi tonkhe tintfo letikhona tadalwa? Usho ngani?
Bewati yini?
Ungatfola tihloko kanye nema-video laluchungechunge lakhuluma ngendalo ku-jw.org ngephansi kwesihloko lesitsi “Ingabe Kwadalwa?” nalesitsi “Imibono Lemayelana Nekutsi Kuphila Kwacala Njani.”
“Ecinisweni, nguleyo naleyondlu inemakhi wayo, kodvwa loyo lowakhe tonkhe tintfo nguNkulunkulu”
5. Kunengcondvo kukholelwa kutsi loko liBhayibheli lelikushoko ngekudalwa kwetintfo kuliciniso
KuGenesisi sehluko 1, liBhayibheli lichaza kutsi umhlaba kanye nako konkhe lokuphila kuwo, kwadalwa njani. Ungakwetsemba yini loko lelikushoko nobe kumane nje kuyinganekwane? Dlala le-VIDEO, bese nicoca ngalemibuto lelandzelako.
-
LiBhayibheli lifundzisa kutsi umhlaba kanye nako konkhe lokukuwo kwadalwa ngemalanga lasitfupha lanema-awa langu-24 yini?
-
Ucabanga kutsi loko lokushiwo liBhayibheli ngekudalwa kwetintfo kunengcondvo yini? Kungani utsi yebo, nobe utsi cha?
Fundza Genesisi 1:1, bese nicoca ngalombuto:
-
Bososayensi batsi tonkhe tintfo letikhona tinesicalo. Loko labakushoko kuhambisana njani naloko losandza kukufundza eBhayibhelini?
Labanye bantfu bayatibuta kutsi, Nkulunkulu wasebentisa kutigucukela kwemvelo yini kute adale tonkhe tintfo letikhona. Fundza Genesisi 1:21, 25, 27, bese nicoca ngalemibuto:
-
LiBhayibheli lifundzisa kutsi Nkulunkulu wadala tintfo letitsite letabese tiyatigucukela yini, taba tilwane kanye nebantfu? Nobe lifundzisa kutsi Nkulunkulu wadala tonkhe tinhlobonhlobo tetintfo letiphilako? b
6. Nkulunkulu wadala bantfu ngendlela leyehlukile
Tsine sehlukile etilwaneni. Fundza Genesisi 1:26, bese nicoca ngalombuto:
-
Ngenca yekutsi sadalwa ngemfanekiso waNkulunkulu, indlela lesikhombisa ngayo luvelo kanye nelutsandvo, isitjelani ngebuntfu bakhe?
LABANYE BANTFU BATSI: “Loko lokushiwo liBhayibheli ngekudalwa kwetintfo kuyinganekwane.”
-
Wena ucabangani? Yini lekwenta ucabange kanjalo?
LOKO LESICOCE NGAKO
Jehova wadala tonkhe tintfo kanye nako konkhe lokuphilako.
Yini Loyifundzile?
-
LiBhayibheli lifundzisani ngesicalo sako konkhe lokudaliwe?
-
Nkulunkulu wadala tintfo letitsite letabese tiyatigucukela yini nobe wadala tonkhe tintfo?
-
Yini leyenta bantfu behluke kuletinye tintfo letidaliwe?
LOKUNYE LONGAKUHLOLA
Buka indlela tintfo letidaliwe letifakazela ngayo kutsi kuneMdali.
“Ifundisani Indalo?” (Phaphama! ya-September 2006, letfolakala ngesiZulu)
Buka indlela babe langachazela ngayo indvodzana yakhe leseyincane kutsi tintfo tadalwa njani.
Tfola kutsi kuliciniso yini loko lokushiwo bantfu ngekutigucukela kwemvelo kanye naloko lokushiwo liBhayibheli.
Tfola kutsi ematsambo akadzeni kanye naloko lokutfolwe bososayensi nabacwaninga, kukufakazela njani kutsi tonkhe tintfo letikhona tadalwa, atizange tibe khona ngekutigucukela.
The Origin of Life—Five Questions Worth Asking (incwajana letfolakala ngesiNgisi)
a Sifundvo 25 sitawukhuluma ngenjongo yaNkulunkulu ngebantfu.
b EBhayibhelini, ligama lelitsi “tinhlobonhlobo” lisho tintfo letehlukahlukene letiphilako.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
