Asewucabange nganasi simo: Sipho weva kushwaca lugogo ngesikhatsi bafana lababili lafundza nabo esikolweni beta ngakuye. Sengemahlandla lamabili kuleliviki labafana solo betama kumbhemisa. Nyalo sekutawuba kwesitsatfu solo mane betama.

Umfana wekucala utsi:

Usebentisa leligama lelitsi “umngani” nje ukhipha lokutsite ekhikhini akunike Sipho.

Nakatsi uyabuka Sipho abone ligwayi eminweni yalomfana. Etfuke kakhulu kunasekucaleni.

Kube wena bewunguSipho, yini lebewutawuyenta?

Labotsanga yaSipho bacabangisise kahle yini ngalentfo labayentako? Batentele bona yini vele lesincumo sekubhema? Cha. Kungenteka kutsi nabo bayengwe ngulabanye. Ngesizatfu sekutsi bafuna kwemukeleka, bavumele labanye kutsi balawule labakwentako.

Nangabe bewungabhekana nesimo lesinjena, bewungayikhetsa njani indlela leyehlukile kute umelane nekuyengwa bontsanga yakho?

1. HLALE UKULUNGELE

   LiBhayibheli litsi: “Umuntfu lohlakaniphile ingoti uyibona iseta, bese uyayibalekela; kantsi longenangcondvo ucondza ngco kuyo, bese utisola emvakwesikhatsi.”—Taga 22:3.

   Esikhatsini lesinyenti ingoti uyibona isengakenteki. Ake sibekise: Mhlawumbe ubona sicumbi sebafundzi khashanyana sibhema. Ngekuhlale uyilungele inkinga, utawukhona kumelana nayo.

2. CABANGA

   LiBhayibheli litsi: “Londvolotani nembeza lomuhle.”—1 Phetro 3:16.

   Tibute, ‘Ngekuhamba kwesikhatsi ngitawutiva njani nangikhetsa kuhambisana nelinyenti nyalo?’ Kuliciniso kutsi kwanyalo ungakhona kubalekela kuhlekwa bontsanga. Kodvwa ngekuhamba kwesikhatsi utawutiva njani? Uyafuna yini kulahlekelwa buntfu bakho lobuhle kute nje ujabulise lofundza nabo?—Eksodusi 23:2.

3. YENTA SINCUMO

   LiBhayibheli litsi: “Umuntfu lohlakaniphile uyacaphelisisa.”—Taga 14:16, catsanisa ne-NW.

   Sincumo kufanele sigcine sisentile futsi sibhekane nemiphumela yaso. LiBhayibheli likhuluma ngaJosefa, Jobe nangaJesu labenta tincumo letinhle. Liphindze likhulume ngaKhayini, Esawu nangaJudasi labenta tincumo letimbi. Yini wena lebewutawuyenta kube bewusesimeni sabo?

LiBhayibheli likukhutsata kutsi “wente lokuhle.” (Tihlabelelo 37:3) Nangabe sewucabangisisile ngemiphumela wabese wenta sincumo engcondvweni yakho, kutawuba melula kakhulu kubatjela ngalokucacile kutsi uncume ini futsi kube nemiphumela lemihle.

Ungakhatsateki kakhulu—kute sidzingo sekusolo uchazelana nabontsanga yakho. Kumane nje utsi CHA kwenele. Nome nawungafuni kutsi nisolo nikhuluma ngalendzaba, ungamane nje utsi:

• “Ningangifaki mine kulentfo yenu!”

• “Mine angikwenti loko!”

• “Niyadlala nje nine!”

Likhambi likutsi ukhulume ngekutetsemba. Nawenta njalo utawumangala kubona indlela bontsanga yakho labawubaleka ngayo!

Kutsiwani nangabe bontsanga yakho bahlekisa ngawe? Ungatsini nabangatsi, “Kantsi unani wena—uligwala yini?” Loluhlobo lwekuphukutwa lumane nje lukuyengwa bontsanga. Yini longayenta? Ungakhetsa kwenta kunye kunaku lokubili.

• Ungavumelana nako lokuphukutwa. (mhlawumbe utsi “Nicinisile, vele ngiyesaba!” Ngemuva kwaloko bese ubachazela kafishane sizatfu lesikwenta wesabe.)

• Ungabashaya ngetindvuku tabo. Ngekusho sizatfu sakho sekungavumi bese sewutsi, (“Benginitsatsa njengebantfu labahlakaniphile kutsi ningaze nibheme!”)

Nangabe bontsanga yakho bachubeka nekuhlekisa ngawe, vele uhambe! Khumbula kutsi nawusolo ume lapho batawuhlekisa ngawe kakhulu. Nawusuka kuleyondzawo, utawube ukhombisa kutsi awufuni kubavumela kutsi bakushintje.

Ecinisweni, kuyengwa bontsanga angeke sikubalekele. Kodvwa nguwe longatikhetsela loko longakwenta, mani ucine kulokulungile. Nguwe lokufanele utentele tincumo!—Joshuwa 24:15.