Etindzabeni letiphatselene nenkholo, kunini lapho wesifazane longumKhristu kufanele ashucule khona enhloko, futsi kungani? Ase sicabangele inkhulumo lephefumulelwe yemphostoli Pawula lekhuluma ngalendzaba. Isiniketa sicondziso lesisidzingako kute sente sincumo lesikahle, futsi lesidvumisa Nkulunkulu. (1 Khorinte 11:3-16) Pawula wakhuluma ngetici letintsatfu lokufanele sicabange ngato: (1) imisebenti ledzinga kutsi wesifazane ashucule, (2) timo lokufanele ashucule kuto, kanye (3) netisusa takhe tekulalela lomyalo.

Imisebenti. Pawula wakhuluma ngemisebenti lemibili: kuthandaza kanye nekuphrofetha. (Emavesi 4, 5) Kuliciniso kutsi kuthandaza kuyindlela yekukhuluma naJehova. Lamuhla, kuphrofetha kungase kuhlanganise kufundzisa nganobe ngabe ngutiphi timfundziso letisekelwe eBhayibhelini umKhristu langase akwente. Pawula abesho kutsi ngaso sonkhe sikhatsi lapho wesifazane athandaza nobe afundzisa emaciniso eliBhayibheli kwakufanele ashucule yini? Cha. Timo lapho wesifazane lathandaza nobe afundzise kuto ngito letiyoncuma.

Timo. Pawula abekhuluma ngetimo letimbili, nobe tindzawo lapho lomsebenti lobewungentiwa khona—lokungusekhaya nobe ebandleni. Watsi: ‘Inhloko yemfati yindvodza . . . Ngulowo nalowo mfati losuke athandaza nome aphrofetha, angabophi lutfo  enhloko, usuke ahlazisa inhloko yakhe.’ (Emavesi 3, 5) Ekhaya, indvodza yalomfati ngiyo lebekwe nguJehova kutsi ibe yinhloko yakhe. Nangabe umfati angalinaki ligunya lendvodza yakhe, uyohlazisa inhloko yakhe ngekutsi ente imisebenti Jehova layabele indvodza. Nasi sibonelo: Nangabe umfati kunguye lokufanele achube sifundvo kepha indvodza yakhe ikhona, uyotfobela ligunya layo ngekutsi ashucule. Loko kufanele akwente nalapho indvodza yakhe ibhajatisiwe nobe cha, ngobe indvodza iyinhloko yelikhaya. * Nalapho kufanele wesifazane athandaze nobe afundzise kukhona indvodzana yakhe lencane lebhajatisiwe, kufanele ashucule, hhayi ngobe lendvodzana iyinhloko yelikhaya, kepha ngenca yeligunya leliniketwe onkhe emadvodza labhajatisiwe langemalunga elibandla lebuKhristu.

Pawula wakhuluma ngeluhlelo lwasebandleni watsi: “Nangabe umuntfu afuna kuphika inkhani, tsine site lelinye lisiko enkozweni, nemabandla aNkulunkulu ate lelinye.” (Vesi 16) Ebandleni lebuKhristu, bunhloko buniketwa emadvodza labhajatisiwe. (1 Thimothi 2:11-14; Hebheru 13:17) Bantfu besilisa kuphela labamiswa njengalabadzala netinceku letisebentako, kute bente umsebenti labawunikwe nguNkulunkulu wekunakekela umhlambi wakhe. (Imisebenti 20:28) Kuletinye timo letimbalwa, kungase kwenteke dzadze longumKhristu abekwe kute ente imisebenti leyentiwa bazalwane lababhajatisiwe. Nasi sibonelo saloko: Kungase kudzingeke kutsi achube umhlangano wemsebenti wasensimini ngobe bangekho bazalwane lababhajatisiwe. Nobe angase achube sifundvo seliBhayibheli sasekhaya lesihlelwe kusengembili abe ahamba nemzalwane lobhajatisiwe. Kepha ngenca yekutsi imisebenti lenjalo iyincenye yemisebenti yelibandla lebuKhristu, kufanele ashucule kute akhombise kuvuma kwakhe kutsi umsebenti lawentako wabelwa bazalwane.

Nobe kunjalo, tikhona netimo lapho kungadzingeki ngadzadze longumKhristu kutsi ashucule lapho enta imisebenti yelibandla. Sibonelo saloko kutsi akudzingeki ashucule lapho aniketa timphendvulo emihlanganweni yebuKhristu, lapho enta umsebenti  wendlu ngendlu ahamba nendvodza yakhe nobe lomunye umzalwane lobhajatisiwe, nalapho afundza nobe athandaza nebantfwana bakhe labangakabhajatiswa. Kuliciniso kutsi ikhona naleminye imibuto lengaphakama mayelana nalendzaba, futsi nangabe dzadze longumKhristu angaciniseki ngesimo lesitsite, angenta lucwaningo lolubanti. * Nangabe asalwentile kepha angaciniseki ngemphendvulo layitfolile, nanembeza wakhe umenta ative angakhululeki, kuncono akhetse kushucula kunekuhamba ngenhloko, njengobe kubonisiwe kulesitfombe.

Tisusa. Evesini 10, sitfola tizatfu letimbili letenta bodzadze labangemaKhristu bashucule enhloko: “Ngenca yetingilosi umfati kufanele abe neluphawu lwekuhlonipha enhloko yakhe.” Kwekucala, caphela inkhulumo letsi “luphawu lwekuhlonipha.” Ngako-ke, kushucula kuyindlela wesifazane lakhombisa ngayo kutsi uyalitfobela ligunya Jehova lalinikete emadvodza labhajatisiwe ebandleni. Kanjalo usuke aveta lutsandvo nekwetsembeka kwakhe kuNkulunkulu Jehova. Sizatfu sesibili sitfolakala emavini latsi “ngenca yetingilosi.” Besifazane batitsintsa njani letidalwa temoya ngekushucula enhloko?

Tingilosi tiyakujabulela kubona ligunya lasezulwini licashelwa ngenhlangano yaJehova lesezulwini nalesemhlabeni. Tiphindze tizuze ngekubuka tibonelo tebantfu labangakapheleli. Phela nato kufanele tititfobe elungiselelweni laJehova—lekuyintfo tingilosi letinyenti letahluleka kuyenta etikhatsini tasendvulo. (Juda 6) Lamuhla, tingilosi tibona timo lapho wesifazane longumKhristu anelwati lolunyenti, futsi ahlakaniphile kwendlula bazalwane lababhajatisiwe ebandleni; kepha nobe kunjalo, achubeke nekulitfobela ligunya. Kuletinye timo, ukhandza kutsi lona wesifazane  ungumKhristu logcotjiwe lotawutsi ngekuhamba kwesikhatsi abe yindlalifa yaKhristu. Wesifazane lonjalo, madvutane utawujabulela kutfola sikhundla lesikhulu lesengca ngisho setingilosi, futsi utawubusa naKhristu ezulwini. Kuliciniso kutsi lesi sibonelo lesihle kakhulu tingilosi letingasilingisa. Leli kuphindze kube lilungelo lelikhulu kubodzadze labangemaKhristu, ngobe ngekulalela, kutitfoba, kanye nekutiphatsa kwabo ngekwetsembeka, babekela tigidzi tetingilosi sibonelo sekwetsembeka.