UTIVA ngendlela lefana neyaLinda yini, lowalinyatwa ngulakholwa naye? Kuyadzabukisa kutsi indlela labanye labenta ngayo iphatamisa kutiphatsa kwalabanye kangangekutsi kuze kwatsintseka neluhlelo lwabo lwekukhonta Nkulunkulu. Kwenteke lokufananako yini nakuwe?

Kuliciniso kutsi singase sikutfole kumatima kucolela lesikholwa naye losilimete. Nanobe kunjalo, emaKhristu kufanele atsandzane. (Johane 13:34, 35) Nangabe kwentekile wakhutjwa ngulokholwa naye, kudvumala kanye nebuhlungu kungase kukulimate kakhulu.​—Tihlabelelo 55:12.

Kuyavunywa kutsi liBhayibheli litsi kunetikhatsi lapho khona emaKhristu aba ‘nesizatfu sekukhonona ngalomunye.’ (Kholose 3:13) Nanobe kunjalo, nakwenteka loko kitsi singase sikutfole kungasimelule kubhekana nako. Kukhona yini lokungasisita? Ase sicoce ngetimiso teliBhayibheli letintsatfu:

Babe wetfu losezulwini ukubona konkhe lokwentekako. Jehova ukubona konkhe lokwentekako lokufaka ekhatsi kungaphatseki kahle lesihlangabetana nako nebuhlungu lesibuvako. (Hebheru 4:13) Ngetulu kwaloko, Jehova usivela buhlungu nasihlupheka. (Isaya 63:9) Akavumeli noma ngabe yini kutsi ‘isehlukanise nelutsandvo lwaKhe’ kungaba ‘kuhlupheka nobe kucindzeteleka’ lesinako, ngisho netikhonti lesikanye nato akativumeli. (Roma 8:35, 38, 39) Ngako-ke, kute intfo nobe umuntfu lokufanele simvumele asehlukanise naJehova.

Kucolela akusho kuvumelana naloko lokwentekile. Nasicolela labanye akusho kutsi sisuke sinciphisa nobe singanaki nobe sivumelana naloko labakwentile. Khumbula kutsi Jehova akavumelani nekwentiwa kwesono kodvwa uyacolela nangabe kunesizatfu sekwenta njalo. (Tihlabelelo 103:12, 13; Habakhuki 1:13) Nakasikhutsata kutsi sicolele labanye Jehova usuke asicela kutsi simlingise. “Akahlali atfukutsele kuze kube phakadze.”​—Tihlabelelo 103:9; Matewu 6:14.

Sisuke sitisita tsine nasendlulisa intfukutselo. Njani? Ase ucabange nganasi simo lesilandzelako. Ubutsa litje, lelisindzasindzako nje, bese uchubeka ulibambile welule sandla. Kungenteka ungabi nenkinga yekulibamba lelitje sikhashana nje. Kodvwa yini letokwenteka nawuchubeka ulibambile sikhatsi lesidze? Ungalibamba sikhatsi lesidze kangakanani vele​—imizuzu, li-awa, nobe ngetulu? Akungabateki kutsi umkhono wakho ungadzinwa kakhulu! Kuliciniso kutsi lesisindvo salelitje sitawube singakashintji. Kodvwa kuchubeka ulibambile kulente lavakala lisindza kakhulu. Kunjalo-ke nangentfukutselo. Nawuchubeka ubambe ligcubu, ngisho noma bewutfukutseliswe yintfo lencane kangakanani, utawulimala. Akumangalisi-ke kutsi Jehova usikhutsata kutsi singawabambi  emagcubu. Kusizuzisa kakhulu kungawabambi emagcubu.​—Taga 11:17.

Yini leyasita Linda wangawabambi emagcubu nasicabanga indlela laphatfwa ngayo ngulakholwa naye? Kuzindla ngemiBhalo lekhutsata kutsetselela kwaba ngulokunye lokwamsita. (Tihlabelelo 130:3, 4) Linda wakhutsatwa kakhulu kwati kutsi nasicolela labanye naJehova utasitsetselela. (Efesu 4:32–5:2) Mayelana nendlela lemiBhalo leyamtsintsa ngayo, utsi: “Ngativa kungatsi Jehova ukhuluma ucondzise kimi.”

Ngemuva kwesikhatsi wakhona kuyendlulisa lendzaba. Wamcolela ngenhlitiyo yonkhe lodzadze futsi nyalo sebabangani. Linda uyachubeka nekukhonta Jehova. Ciniseka kutsi Jehova ufisa kukusita kutsi wente lokufanako.