DANYELA, lijaha lebelicotfo kakhulu, watfunjelwa eBhabhulona ngembi kwekubhujiswa kweliJerusalema. Yena kanye naletinye titfunjwa letingemaJuda bebakhululekile kwenta tintfo letitsite. Esikhatsini lesidze lasiphila eBhabhulona, Nkulunkulu wambusisa kakhulu futsi wamsindzisa emabhubesini, wabona nemibono leyamenta wabona likusasa. Linyenti letiphrofetho taDanyela lalimayelana naMesiya kanye nekubusa kwaKhe.

Danyela utjelwa kutsi utawufika nini Mesiya. Danyela watjelwa kutsi bantfu baNkulunkulu bebangakulindzela nini kufika kwaMesiya, uMholi. Kwakuyawuba ngemva kwemaviki eminyaka langu-69 kukhishwe umyalo wekuvusetela tindvonga taseJerusalema. Njengoba liviki lingemalanga lasikhombisa; liviki leminyaka lona liyiminyaka lesikhombisa. Lomyalo wakhishwa nga-455 B.C.E., esikhatsini lesidze ngemuva kwekufa kwaDanyela. Lamaviki langu-69 ayiminyaka lengu-483, kusukela ngalomnyaka wa-455 B.C.E. kuze kube ngumnyaka wa-29 C.E. Encenyeni lelandzelako yalencwajana, sitawubona kutsi kwentekani ngalowo mnyaka. Danyela waphindze waboniswa kutsi Mesiya utawubulawa, kute kuhlengwe bantfu esonweni.—Danyela 9:24-26.

Mesiya utawuba yiNkhosi ezulwini. Embonweni longakavami welizulu, Danyela wabona Mesiya lokwatsiwa ‘ngulonjengendvodzana yemuntfu,’ asondzela esihlalweni sebukhosi saJehova. Jehova ‘wamnika emandla ekubusa, nenkhatimulo, kanye nebukhosi.’ LowoMbuso wawuyohlala phakadze. Danyela wabona lomunye umniningwane lojabulisako ngaloMbuso waMesiya, kutsi kunalabanye labayobusa naye, lokulicembu lokutsiwa ‘ngulabangcwele baLongetulu Kwako Konkhe.’—Danyela 7:13, 14, 27.

LoMbuso uyawubhubhisa bohulumende bebantfu. Nkulunkulu wanika Danyela likhono lekuchaza liphupho lebelicaka Nebukhadnezari, inkhosi yaseBhabhulona. Lenkhosi beyibone sizemazema sesitfombe lesinenhloko yeligolide, sifuba nemikhono yelisiliva, sisu kanye nematsanga elitfusi, imilente yensimbi kanye netinyawo tensimbi lehlanganiswe nelubumba. Kwacephuka litje entsabeni lashaya tinyawo talesitfombe futsi lasiphishita saba yimphuphu. Danyela wachaza kutsi letitfo talesitfombe timelela kushiyelana kwemibuso yemhlaba, lokwacala ngembuso waseBhabhulona njengenhloko yeligolide. Danyela wabona kusengembili esikhatsini lapho kubusa umbuso wekugcina yalelive lelibi, kutsi uMbuso waNkulunkulu uyawutsatsa sinyatselo. Utawupitjita bonkhe bohulumende bebantfu, bese wona ubusa kuze kube phakadze.—Danyela, sahluko 2.

Danyela besagugile, futsi waphila kwaze kwaba ngulapho liBhabhulona liwa. INkhosi Khuresi yalicitsa lelidolobha njengoba baphrofethi bebabiketele. EmaJuda akhululwa ekutfunjweni, ngemuva kweminyaka lengu-70 leyabiketelwa kutsi liJerusalema liyawushiwa lingenabantfu. Acondziswa babusi labetsembekile, baphristi, kanye nebaphrofethi, emaJuda agcina alivusetele liJerusalema futsi alungisa lithempeli laJehova. Kwakuyawentekani ngemuva kwaleminyaka lengu-483?

—Lendzaba itsetfwe encwadzini yaDanyela.