JESU abetfunyweni emhlabeni? Yena lucobo lwakhe watsi: “Kufanele ngishumayele liVangeli ngembuso waNkulunkulu . . .  ngoba Nkulunkulu ungitfume kwenta kona loko.” (Lukha 4:43) Ase uhlole tintfo letine Jesu latisho ngalowo Mbuso, lobekuyimfundziso leyinhloko yekushumayela kwakhe.

1. Jesu abetawuba yiNkhosi. Jesu washo ngalokucondzile kutsi yena abenguMesiya lotsenjisiwe. (Johane 4:25, 26) Waphindze wabonisa kutsi unguleNkhosi leyabonwa ngumphrofethi Danyela embonweni. Jesu watjela baphostoli bakhe kutsi ngalelinye lilanga abetawuhlala “esihlalweni senkhatimulo” futsi nabo bebatawuhlala etihlalweni tebukhosi. (Matewu 19:28) Watsi lelicembu lebabusi “lingumhlambi lomncane”, futsi watsi ‘unaletinye timvu’ letingasito talesibaya.—Lukha 12:32; Johane 10:16.

2. UMbuso waNkulunkulu utawuletsa kulunga. Jesu wakhombisa kutsi loMbuso utawucedza konkhe kungalungi ngekungcwelisa ligama laJehova Nkulunkulu, futsi ulikhulule etinsolweni taSathane lamsola ngato ensimini yase-Edeni. (Matewu 6:9, 10) Jesu waphindze wabonisa kungakhetsi ngoba malanga onkhe abefundzisa emadvodza, bafati, labaphuyile nalabacebile. Nobe-nje abetfunywe kuma-Israyeli ngalokucondzile, waphindze wasita nemaSamariya kanye nalabanye labangasiwo emaJuda. Ngalokungefanani nebaholi benkholo bangesikhatsi sakhe, Jesu abengakhetsi.

3. UMbuso waNkulunkulu angeke ube yincenye yalelive. Jesu waphila esikhatsini lapho kwakunetingucuko kanye netinkinga letinkhulu kutepolitiki. Indzawo yakubo yayibuswa bantfu bekuhamba. Ngesikhatsi bantfu betama kumbamba kute bamente inkhosi, wabaleka. (Johane 6:14, 15) Watjela Philatu watsi: “Umbuso wami awusiwo wakulelive.” (Johane 18:36) Watsi kubalandzeli bakhe: “Anisibo belive.” (Johane 15:19) Abengeke abavumele kutsi basebentise tikhali temphi, ngisho nekutsi bamvikele imbala.—Matewu 26:51, 52.

4. Khristu uyawubusa ngelutsandvo. Jesu wetsembisa kuphumuta bantfu, kanye nekubetfula imitfwalo. (Matewu 11:28-30) Jesu wenta njengekusho kwakhe. Waniketa sicondziso selutsandvo, nalesilusito, sekumelana nekukhatsateka, kutfutfukisa budlelwane nalabanye, kuncoba kutsandza umcebo, kanye nenjabulo. (Matewu, sehluko 5-7) Ngenca yekutsi Jesu abengumuntfu lotsandza bantfu, loko kwenta kutsi abe ngumuntfu longenekako. Bantfu bato tonkhe tinhlobo, ngisho nalabacindzetelekile, baya kuye futsi banelitsemba lekutsi utawuba nemusa kubo, futsi abaphatse ngenhlonipho. Jesu utawuba nguMbusi lomuhle sibili!

Kunalenye futsi indlela Jesu lafundzisa ngayo ngeMbuso waNkulunkulu. Wenta timangaliso letinyenti. Kungani akwenta loku? Ase sibone.

—Lendzaba itsetfwe encwadzini yaMatewu, Makho, Lukha, kanye naJohane.