NGEMUVA kwekufa kwaSamsoni, Samuweli waba ngumphrofethi futsi waba sikhulu ka-Israyeli. Ema-Israyeli bekaloku amtjela kutsi afuna kuba nenkhosi njengaletinye tive. Nakuba lesicelo saba buhlungu kuJehova, kepha watjela Samuweli kutsi avumelane nawo. Nkulunkulu wakhetsa Sawula indvodza leyayitfobekile kutsi abe yinkhosi. Ngekuhamba kwesikhatsi iNkhosi Sawula yatikhukhumeta futsi yangalaleli. Jehova wamyekelisa kuba yinkhosi, wase utjela Samuweli kutsi akhetse umfana longuDavide. Kwatsatsa iminyaka kutsi Davide abe yinkhosi.

Asesengumfana, Davide wavakashela banakabo labebasebutfweni lemphi laSawula. Lonkhe libutfo belesaba Goliyathi lisotja lelalisidlakela, lelalibeya futsi ledzelela naNkulunkulu. Atfukutsele, Davide wavuma kulwa nalesidlakela. Waphuma kuyokulwa nalesitsa sakhe lesasingaba ngemamitha lamatsatfu budze, ahlome ngesilingi nematje lambalwa nje kuphela. Lapho Goliyathi ahlekisa ngaye, Davide watsi yena uhlome kancono kunalesidlakela, ngobe yena abelwa ngeligama laJehova Nkulunkulu! Wabulala lesidlakela lesinguGoliyathi ngelitje linye, wase usijuba inhloko ngenkemba yaso. Libutfo lemaFilisti labaleka ngenca yekwesaba.

Ekucaleni, Sawula sammangalisa lesibindzi saDavide, wase umenta umphatsi welibutfo lakhe. Kuphumelela kwaDavide kwenta Sawula waba nemona kakhulu. Kwadzingeka kutsi Davide abaleke kute aphephise imphilo yakhe, futsi waphila lemphilo yekubaleka iminyaka leminyenti. Nome kwakunjalo, Davide wachubeka etsembekile kulenkhosi leyayifuna kumbulala, ngobe bekati kutsi iNkhosi Sawula yayibekwe nguJehova Nkulunkulu. Ekugcineni Sawula wafa emphini, futsi ngemuva kwesikhashana nje Davide waba yinkhosi, njengoba Jehova abetsembisile.

Njengenkhosi, Davide waba nesifiso lesikhulu sekwakhela Jehova lithempeli. Jehova wamtjela kutsi laliyokwakhiwa ngulomunye webantfwana bakhe. Solomoni indvodzana yakhe, nguye lowakha lelithempeli. Nkulunkulu wambusisa Davide ngekutsi ente naye sivumelwane lesijabulisako: Emndenini wakhe kuyawutalwa emakhosi. Ekugcineni, kulomndeni waDavide kwakuyawutalwa uMsindzisi nobe iNtalo leyatsenjiswa e-Edeni. Loyo abeyawuba nguMesiya, lokusho kutsi “Logcotjiwe,” lobekwe nguNkulunkulu. Jehova wetsembisa kutsi loMesiya abetawuba nguMbusi wahulumende, nobe uMbuso loyawuhlala kute kube phakadze.

Davide wabutsa tintfo tekwakha letinhle letinyenti labetawukwakha ngato lelithempeli. Waphindze wacamba tingoma letinyenti. Lapho asatawukufa, Davide wabonga: ‘Umoya waNkulunkulu wakhuluma ngami. Livi lakhe labaselulwimini lwami.’—2 Samuweli 23:2.

—Lendzaba itsetfwe encwadzini ya-1 Samuweli na-2 Samuweli; 1 Tikhronike; Isaya 9:7; Matewu 21:9; Lukha 1:32; Johane 7:42.