1. Ngutiphi letinye tinkholo letikhona e-Afrika?

LINYENTI lebantfu e-Afrika liyavuma kutsi kubalulekile kukhonta Nkulunkulu. Kepha kunekungavumelani ngendlela lokufanele akhontwe ngayo. Labanye baya etakhiweni lokuhlangana kuto emaMoslem, kantsi bemdzabu banetindzawo tekukhumbula bokhokho lasebafa. Labanye bona baya emasontfweni. Kepha kungaba liphutsa kucabanga kutsi tintsatfu kuphela tinkholo letise-Afrika. Tinkholelo temaMoslem nemitsetfo yawo kuyehlukahlukana. Inkholo yemdzabu nayo ishiyana kakhulu indzawo nendzawo. Kuphikisana kukhulu nakakhulu emasontfweni ebantfu labatsi balandzela Khristu. Ngephandle kwemasontfo lahamba embili, kunetinkhulungwane talamanye emasontfo e-Afrika.

2. (a) Yini levamise kuncuma kutsi umuntfu uba kuyiphi inkholo? (b) Yini lengabuniketi bufakazi bekutsi inkholo yetfu iyamjabulisa Nkulunkulu?

² Kwentiwa yini kutsi bantfu bakhetse kukhonta Nkulunkulu ngaletindlela? Linyenti lebantfu lemukela inkholo yebatali babo. Lokwenteka kadzeni nako kunesandla ekutseni bantfu bakuyiphi inkholo lamuhla. Incwadzi lenesihloko lesitsi The Africans—A Triple Heritage itsi: “Kuncoba kwemave ebuMoslem indzawo lesenyakatfo yeSahara [lugangadvu lolutsatsa incenye lenkhulu ye-Afrika lesenyakatfo]  kwasakata buMoslem kuleyondzawo, nebuKhristu basakateka eningizimu yeSahara ngendlela lefanako. Nasingatsi buMoslem busakateke enyakatfo yeSahara ngenkemba, singatsi buKhristu busakateke eningizimu yeSahara ngesibhamu.” Nome kunjalo, linyenti letfu linelitsemba lekutsi inkholo yetfu iyamjabulisa Nkulunkulu. Kepha kutsi nje inkholo letsite sayitfola kubatali betfu nome imibuso yalamanye emave yafaka bokhokho betfu kuyo akusho kutsi ilungile.

3-5. Ngusiphi sibonelo lesingasisita sibone kutsi akusito tonkhe tinkholo letifundzisa liciniso?

³ Nome nje tonkhe tinkholo titsi tiniketa sicondziso lesetsembekile sendlela yekukhonta Nkulunkulu, imibono yato ayifanani. Tifundzisa lokwehlukahlukene ngekutsi Nkulunkulu ungubani nekutsi ufunani kitsi. Cabanga ngaloku: Ase sitsi utfola umsebenti enkampanini lenkhulu. Ngelilanga lekucala emsebentini, utfola kutsi umphatsi usemaholideyini. Manje-ke ubuta tisebenti letintsatfu kutsi kufanele wenteni. Sisebenti sekucala sitsi umphatsi ufuna kutsi utsanyele. Sesibili sitsi kufanele upende sakhiwo. Sisebenti sesitsatfu sona sitsi umsebenti wakho kuniketa leletinye tisebenti tincwadzi letisuke tibhalelwe tona.

⁴ Ngemva kwaloko, ubuta letisebenti macondzana nemphatsi. Sisebenti sekucala sitsi umphatsi mudze, usemusha, futsi unelulaka. Sesibili sitsi mfisha, mdzala, futsi unemusa. Sesitsatfu sona sitsi umphatsi akasiyo nani indvodza—ungumfati. Cishe utawuphetsa ngekutsi emkhatsini wabo kukhona labanemanga. Nangabe ufuna kuchubeka usebenta lapho, utawenta luphenyo kute utfole liciniso leliphelele ngekutsi ungubani lomphatsi nekutsi ufuna wenteni.

⁵ Kunjalo nangenkholo. Njengoba kunemibono leminyenti ngekutsi Nkulunkulu ungubani nekutsi yini layifunako kitsi, kufanele sitenetise ngekutsi indlela lesimkhonta ngayo ihambisana neliciniso yini. Kepha singalitfola kanjani liciniso ngaNkulunkulu?