Bantfu sebaphelelwe similo. Tigulane titsetsisa bodokotela, bantfu ababaphatsi kahle labo labasebenta etindzaweni tekudlela futsi bagibeli betindiza labangalawuleki balwa nalabo labasebenta etindizeni. Etikolweni bantfwana labangalaleli bahlekisa, basongele baphindze balwe nabothishela. Labanye bosopolitiki benta tintfo letetfusako, kantsi labanye bativeta shengatsi batiphatsa kahle.

 LiBhayibheli linesicondziso longasetsemba sekutsi kuyini kutiphatsa kahle, liphindze livete kutsi yini leyenta bantfu baphelelwe similo lamuhla.

 Bantfu labanyenti emhlabeni wonkhe sebaphelelwe similo.

•   Luhlolo lwakamuva lolwentiwe luveta kutsi lizinga lekutiphatsa kwebantfu baseMelika selehle kakhulu manje kunaseminyakeni lengu-22 leyengcile.

•   Kulolunye luhlolo kutfolakele kutsi kubantfu labangetulu kwa-32 000 emaveni langu-28, labangemaphesenti langu-65 batsi bantfu sebatiphatsa kabi kakhulu manje kunasesikhatsini lesendlulile.

 LiBhayibheli laphrofetha ngendlela bantfu labatiphatsa ngayo lamuhla.

•   “Emalangeni ekugcina kuyawufika tikhatsi letimatima. Bantfu bayawutitsandza, batsandze imali, batigcabhe, batigabatise, balulate Nkulunkulu ngenhlamba. Bayawuba ngulabangalaleli batali babo, bangabongi, . . . babe nebulwane, batondze lokuhle.”​—2 KuThimothi 3:1-3, LiBhayibheli LesiSwati Lelivamile.

 Kuze utfole lokunyenti ngendlela lesiphrofetho lesigcwaliseka ngayo, fundza sihloko lesitsi “Ingabe IBhayibheli Layibikezela Indlela Abantu Abacabanga Nabenza Ngayo Namuhla?,” lesitfolakala ngesiZulu.

 Tigidzi tebantfu titfole kutsi liBhayibheli linesicondziso lesihle kakhulu lesibasita babe nesimilo lesihle ngisho nobe bantfu labanyenti emhlabeni sebete similo. Seluleko salo endzabeni yekutiphatsa ‘sihlale setsembekile futsi sitawuchubeka sinjalo kuze kube phakadze.’ (Tihlabelelo 111:8) Nati tibonelo letimbalwa:

•   Lokushiwo liBhayibheli: “Tonkhe tintfo lenifuna bantfu batente kini, nani tenteni kubo.”​—Matewu 7:12.

   Lokukushoko: Kufanele siphatse labanye ngemusa nangenhlonipho njengobe natsi singatsandza kuphatfwa kanjalo.

•   Lokushiwo liBhayibheli: “Njengobe seniwalahlile emanga, nguloyo naloyo akakhulume liciniso kumakhelwane wakhe.”​—Kubase-Efesu 4:25.

   Lokukushoko: Kufanele setsembeke kuko konkhe lesikushoko nalesikwentako.

 Kuze utfole lokunyenti ngalesihloko, sicela ufundze:

•   Sicongosekulindza lesinesihloko lesitsi “Lokuhle Nalokubi​—Lokutakusita Ukhetse Kahle.”

•   Sihloko lesitsi “Kubeketelela Labanye Bantfu​—LiBhayibheli Lingasisita Njani?”