Lomunye umzalwane watsi: “Sekuphele iminyaka lengu-19 solo ngilindzele loku.” Yini lebekayilindzele? Lihumusho Lemhlaba Lomusha LemiBhalo YemaKhristu YesiGriki ngelulwimi lwakhe siBengali. Bantfu labanyenti basho intfo lefanako nakukhicitwa Lihumusho Lemhlaba Lomusha ngelulwimi lwabo. Kodvwa uke watibuta yini kutsi kufaka ekhatsi ini kuhumusha liBhayibheli kanye nekulikhicita?

 Ngaphansi kwekucondziswa yiKomidi Yekubhala yeSigungu Lesibusako, licembu lekuhumusha labelwa umsebenti wekuhumusha liBhayibheli. Kulitsatsa sikhatsi lesingakanani lelicembu kuhumusha liBhayibheli? Nicholas Ahladis, losebenta eTikweni Lekuhumusha e-Warwick, e-New York, utsi: “Tinyenti tintfo letibukwako, lokufaka ekhatsi kutsi bangaki bahumushi labangenta lomsebenti, lolulwimi lumatima kangakanani, nekutsi bafundzi beliBhayibheli bajwayelene kangakanani netintfo lebetenteka ngetikhatsi teliBhayibheli, kanye nekutsi lolulwimi luhluke kangakanani esigodzini ngasinye. Ngekwesilinganiso, licembu lekuhumusha litsatsa umnyaka munye kuya kulemitsatfu kuhumusha ImiBhalo YemaKhristu YesiGriki kanye neminyaka lengaba mine kuya etulu kuhumusha liBhayibheli leliphelele. Emacembu lahumusha lulwimi lwetandla wona atsatsa sikhatsi lesidze kunalesi.”

 Kudzingeka lokungetulu nje kwekumane kube nebahumushi kute kuhunyushwe liBhayibheli. Kuphindze kube nelicembu lebazalwane nabodzadze lababuketa loko losekuhunyushiwe futsi loko bakwenta ngaphandle kwekubhadalwa. Lelicembu lesuka etindzaweni letehlukahlukene futsi ngalesinye sikhatsi emaveni lahlukene futsi bakhule ngetindlela letingafani. Loko labakutfolako nabasafundza kusita bahumushi kutsi bakhiphe liBhayibheli lelishaya emhlolweni, lelicondzakalako nalelivakalako. Ngetulu kwaloko, lomunye umzalwane locecesha bahumushi beliBhayibheli eNingizimu Afrika utsi: “Bahumushi bativa banemsebenti lomkhulu wekwendlulisela loko Jehova labaphatsise kona kuze labo labatawufundza liVi lakhe bakuve kahle.”

 Nasekuphelile lokuhumusha lamaBhayibheli abese ayaphrintwa bese ayahlanganiswa. Kuze yente loku, imishini yekuphrinta isebentisa tintfo letifaka ekhatsi emaphepha, i-ink kanye nalokunye lokunyenti kuze kuhlanganiswe leliBhayibheli. Nga-2019, kwasetjentiswa imali langanga nga-292 029 800 kute kukhicitwe liBhayibheli. Bantfu labasebentia e-Printery bacitsa ema-awa langu-300 000 ngaloyomnyaka kute bakhicite liBhayibheli baphindze balihambise liye etindzaweni letehlukahlukene.

 Kungani sicitsa sikhatsi lesingaka kanye nemali kute sente lemisebenti lenjana? Joel Blue loseTikweni Lekuphrinta emhlabeni wonkhe, watsi: “LiBhayibheli liyincwadzi lebaluleke kakhulu lesiyikhicitako. Ngako sifuna kutsi kubukeka kwalo kukhatimulise Nkulunkulu lesimkhontako kanye nemlayeto lesiwushumayelako.”

 Ngaphandle nje kwekukhicita Lihumusho Lemhlaba Lomusha, siphindze sikhicite lamanye emahumusho ebantfu labanetidzingo letikhetsekile. Sibonelo nje i-braille yeLihumusho Lemhlaba Lomusha itfolakala ngetilwimi letingu-10. LiBhayibheli linye leliphelele nge-braille lingatsatsa ema-awa langaba ngu-8 kulenta, futsi bukhulu balo bungaba ngemamitha langaba ngu-2.3. Siphindze sikhicite neliBhayibheli lelikhetsekile letiboshwa letisemajele lapho khona kuvumeleke tincwadzi letite sigwabugwabu.

 Lihumusho Lemhlaba Lomusha liyakutsintsa kuphila kwalabo labalifundzako. Cabanga ngelibandla lelikhuluma siKiluba endzaweni lebitwa ngekutsi kuseTombe, eDemocratic Republic of the Congo. Kutsatsa libanga lelingetulu kwemakhilomitha langu-1 700 kusuka enhloko-dolobha yalelive uye eTombe. BoFakazi bebaneliBhayibheli linye lesiKiluba futsi nalo belilakadzeni. Bazalwane bebabolekana leliBhayibheli kuze balungiselele imihlangano. Kodvwa kusukela nga-August 2018, emakophi eLihumusho Lemhlaba Lomushao laphelele nalamelula sewayatfolakala ngesiKiluba futsi bonkhe bantfu ebandleni sebanalo.

 Nakakhuluma ngeLihumusho Lemhlaba Lomusha lelibuketiwe ngelulwimi lwakhe, dzadze lokhuluma siJalimane utsi: “Angisasho kutsi kufanele ngifundze liBhayibheli. Kunaloko sengitibuta kutsi ngitalifundza nini?” Lesinye siboshwa sabhala satsi: “Nganiketwe ikophi yeLihumusho Lemhlaba Lomusha, futsi iyakushintja kuphila kwami. Sengilicondza kancono liVi laNkulunkulu liBhayibheli kusukela ngicale kufundza lelihumusho. Ngifuna kwati lokunyenti ngaBoFakazi BaJehova nekutsi ngingaba njani ngulomunye wabo.”

 Bonkhe bantfu labafundza Lihumusho Lemhlaba Lomusha bayabonga ngeminikelo leyentiwe kute kusekelwe lokukhicitwa kwalamaBhayibheli. Leminikelo lesekela umsebenti wamhlaba wonkhe yentiwa ngetindlela letehlukahlukene letitfolakala ku donate.jw.org. Siyabonga ngemoya wenu wekupha.