“Esikhatsini lesengcile bekungabonakala kulukhuni kutfola imfundvo levela kuNkulunkulu etintfweni tebuchwephesha.” Uyavumelana yini nalamavi? Bewayincenye yemavi lakhutsatako lakhulunywa nguGeoffrey Jackson Ekwatisweni Kwakamuva Kwa-2020 #6. Wachubeka watsi: “Kodvwa kungenteka nyalo niyatibuta kutsi ngabe senta njani kulesimo kube bekute i-JW Library. Kuyo yonkhe leminyaka Jehova bekasolo asilungiselela simo lesifana nalesi.”

 Nguyiphi indlela Jehova lasilungiselele ngayo? Yini leyentiwe kuze kwakhiwe i-JW Library app, futsi yini ledzingekile kuze inakekelwe futsi itfutfukiswe?

 NgaMay 2013, Sigungu Lesibusako sacela litiko laka-MEPS Programming lelisendlunkhulu yemhlaba wonkhe kutsi lakhe i-app leneLihumusho Lemhlaba Lomusha lelibuketiwe. Paul Willies losebenta kulelitiko utsi “Ngaleso sikhatsi bekusete ngisho nayinye i-app lebesike sayikhululula ku-app store, ngako kwakhiwa licembu, kwamiswa leminye imisebenti lebesiyenta, futsi sasebentisana nalamanye ematiko kuze sakhe le-app nalebekutawufakwa kuyo. Sathantaza kanyenti futsi Jehova wasisita sakhona kukhulula le-app ngemuva nje kwetinyanga letisihlanu emhlanganweni wemnyaka!”

 Lenye inkinga bekukushintja le-app kutsi ibe yi-library lenetincwadzi letinyenti futsi letitfolakala nangetilwimi letinyenti. Nga-January 2015, tincwadzi tetfu letinyenti letitfolakala ngesiNgisi besetitfolakala kule-app futsi ngemuva nje kwetinyanga letisitfupha bantfu besebangatitsatsela letincwadzi nangaletinye tilwimi letinyenti.

 Kusukela ngaleso sikhatsi labazalwane bengeta ema-video, bahlangisa ndzawonye tincwadzi nalokulalelwako lebekutawusentjetiswa emihlangweni yelibandla, baphinde benta kutsi loyisebentisako akhone kutfola tikhombo te-Research Guide ngalokucondzile eBhayibhelini.

 I-JW Library ivulwa etintfweni tebucwephesha letingu-8 million ngelilanga nakuletingu-15 million ngenyanga! Yini ledzingekako kuze le-app ichubeke isebenta kahle kuletintfo tebuchwephesha? Umzalwane Willies uyachaza: “Kwenta i-mobile app akupheli, sihlale singeta lokutsite kuyo kuze ibe lusito lolukhulu futsi kubemelula kuyisebentisa. Ngenca yekutsi indlela yekusebenta kwetintfo tebuchwephesha ihlale itfutfukiswa, natsi sihlale siyitfutfukisa le-app kuze ibe sezingeni lelifanako. Njengobe linani letincwadzi letitfolakala ku-JW Library kanye nalokurekhodiwe kuchubeka kwandza natsi kudzingeke kutsi siyinakekele siphindze siyitfutfukise le-app.” Kunetincwadzi letingetulu kwa-200 000, ema-video nalokurekhodiwe lokungetulu kwa-600 000 lokutfolakalako nyalo ku-JW Library!

 Kudzingeke lokungetulu kwema-computer kuze le-app ichubeke isebenta. Kudzingeke kutsi kubhadalwe imali letsite kuze kutfolakale i-license yekusebentisa lamanye ema-program e-computer. I-license iyinye ibita E21 921.90 ($1,500) ngemnyaka. Ngetulu kwaloko, litiko laka MEPS Programming licitsa imali lenganga E146 146 ($10 000) njalo ngemnyaka etintfweni tebuchwephesha letakhiwe tinkapani letehlukahlukene kuze liciniseke kutsi le-app ichubeka isebenta kahle kuma-computers lamasha, kuma-tablets nasetincingweni letinsha.

 Ngenca ye-JW Library, seyinciphe kakhulu imali lecitfwa ekuphrinteni, ekuhlanganiseni kanye nasekutfumeleni tincwadzi. Sibonelo nje, cabanga ngencwajana letsi Kuhlolisisa ImiBhalo Malanga Onkhe. Nga-2013, saphrinta emakhophi alencwajana langu-12 million, kodvwa nga-2020 siphrinte emakhophi langaba ngu-5 million ngisho nobe sinebamemeteli labangaba ngetulu kwa-700 000 emhlabeni wonkhe. Lubangelwe yini lolushintjo lolungaka? Bazalwane nabodzadze wetfu labanyenti sebayifundza ku-JW Library lencwajana. a

 I-JW Library isita labayisebentisako ngetindlela letinyenti kakhulu. Geneviève, lohlala eCanada, utsi le-app imsite wakhona kutadisha liBhayibheli onkhe malanga. Uyavuma: “Ecinisweni kube bengingabutsisa tincwadzi kuze ngitifundze, angicabangi kutsi bengingatifundza onkhe malanga ekuseni. Kodvwa ngale-app ngivele ngitsatse i-tablet yami futsi ngitfole konkhe lengikudzingako kiyo. Lokutadisha onkhe malanga kucinise kukholwa kwami futsi kwangenta ngasondzela kakhulu kuJehova.”

 Le-app isite kakhulu kulesikhatsi se-COVID-19. Charlyn, wase-United States, utsi: “Njengobe umhlaba uhlaselwe yi-COVID-19, sekuphele umnyaka wonkhe ngingakaze ngabona tincwadzi letinsha letikhululiwe tiphrintiwe. Kodvwa i-JW Library isinikete konkhe lesikudzingako kuze sicinise kukholwa kwetfu futsi ngiyambonga Jehova ngayo.”

 Bantfu labanyenti bativa ngendlela Faye, lohlala ePhilippines, lativa ngayo. Utsi: “Ngisebentisa le-app kuze ngihlale ngisondzelene naJehova. Ekuseni nje nangivuka, ngivele ngingene kuyo ngifundze. Ngilalela yona ngisho ngenta imisebenti yami yasekhaya. Ngisebentisa yona nangilungiselela imihlangano. Ngisebentisa yona nanangilungiselela kufundza nemuntfu liBhayibheli. Ngibukela ema-video kuyo ngesikhatsi sekuphumula. Ngifundza liBhayibheli kanye tihloko letisekelwe kulo nobe ngabe ngikuphi. I-JW Library app iligugu sibili.”

 Le-app iphindze yaba lusito kakhulu emsebentini wekushumayela. Sibonelo nje, ngesikhatsi lomunye dzadze ashumayela eCameroon, wafuna kusebentisa umbhalo lebekeve lomunye dzadze awusebentisa emavikini lambalwa lendlulile. Nobe kunjalo, bekangasakhumbuli kutsi angawutfola kuphi. Utsi: “Ngiyabonga kutsi bengikhumbula incenye letsite yalelivesi. Ngavula le-app, ngaya eBhayibhelini futsi ngafuna lencenye yalombhalo lebengiyikhumbula ku-search. Ngekushesha ngawutfola lombhalo lebengiwufuna. Nangisebentisa le-app ngiyakhona kutfola emavesi eliBhayibheli lamanyenti lengihle ngiwakhohlwa.”

 Iminikelo yenu leniyente nisebentisa tindlela letichazwe ku-website letsi donate.jw.org isisitile sakhona kutfutfukisa nekunakekela le-JW Library app kuze bazalwane nabodzadze wetfu emhlabeni wonkhe bakhone kuyisebentisa. Sibonga kakhulu ngeminikelo yenu.

1. Nga-October 2013—Kwakhululwa i-app leneLihumusho Lemhlaba Lomusha lelibuyeketiwe

2. Nga-January 2015—Kwafakwa letinye tincwadzi tesiNgisi, kwase kulandzela taletinye tilwimi letinyenti

3. Nga-November 2015—Kwengetwa tintfo letikusita ukhone kubekisa kanye nekudvwebela

4. Nga-May 2016—Kwengetwa i-tab yemihlangano

5. Nga-May 2017—Kwengetwa intfo lekusita ubhale ema-notes nobe utibhalele lokutsite

6. Nga-December 2017—Kwengetwa tintfo ku-Study Bible

7. Nga-March 2019—Kwengetwa lokutsite lokukusita ukhone kutitsatsela lokulalelwako lokurekhodiwe, kubukela ema-video ungakawa-download kanye nekutfola tikhombo letiku-Research Guide

8. Nga-January 2021—Kwatfutfukiswa lokutsite encwadzini letsi Jabulela Kuphila Kuze Kube Phakadze!