Tikhulu 3:1-31
3 Nguleti tive Jehova lativumela kutsi tichubeke tikhona kuze tivivinye bonkhe bantfu baka-Israyeli lebebangakase batibone timphi letaliwa eKhenani+
2 (loku kwentelwa kutsi titukulwane tema-Israyeli letalandzela tiyibone imphi, lokutitukulwane lebetingazange titibone tintfo letinjalo):
3 babusi labasihlanu bemaFilisti,+ nawo onkhe emaKhenani, nebantfu baseSidoni+ kanye nemaHivi+ labehlala eNtsabeni iLebanoni+ kusukela eNtsabeni iBhali-hemoni kuze kuyewufika eLebo-hamathi.*+
4 Letive taba yindlela yekuvivinya ema-Israyeli kuze kubonakale kutsi abetayilalela yini imitsetfo yaJehova labeyinike bokhokho bawo asebentisa Mosi.+
5 Ngako ema-Israyeli ahlala emkhatsini wemaKhenani,+ wemaHethi, wema-Amori, wemaPheresi, wemaHivi nemaJebhusi.
6 Abetsatsa emadvodzakati akuleto tive awente bafati, nemadvodzakati awo awendzisele emadvodzana akuleto tive. Acala nekukhonta bonkulunkulu bato.+
7 Ngako ema-Israyeli enta lokubi emehlweni aJehova, futsi amkhohlwa Jehova Nkulunkulu wawo, ase akhonta boBhali+ netinsika letingcwele.*+
8 Intfukutselo yaJehova yawavutsela ema-Israyeli, ngako wawanikela esandleni saKhushani-rishathayimu, inkhosi yaseMesophothamiya.* Aba ngaphansi kwaKhushani-rishathayimu iminyaka lengu-8.
9 Ngesikhatsi ema-Israyeli acela lusito kuJehova,+ Jehova wawaniketa Othniyeli,+ indvodzana yaKhenazi umnakaboKhalebi lomncane waba ngumsindzisi lobekatawakhulula.+
10 Umoya waJehova wehlela etikwakhe+ futsi waba sikhulu saka-Israyeli. Watsi nakaya emphini, Jehova wanikela Khushani-rishathayimu inkhosi yaseMesophothamiya* esandleni sakhe, futsi wamncoba.
11 Lelive lase litfola kuphumula* iminyaka lengu-40. Ngemuva kwaloko Othniyeli indvodzana yaKhenazi wafa.
12 Ema-Israyeli aphindze enta lokubi emehlweni aJehova.+ Ngako Jehova wavumela Egloni inkhosi yakaMowabi+ kutsi awancobe, ngobe ema-Israyeli bekente lokubi emehlweni aJehova.
13 Ngetulu kwaloko, Nkulunkulu wenta kutsi ema-Amoni+ nema-Amaleki+ amelane nawo. Ahlasela ema-Israyeli futsi atsatsa lidolobha letihlahla telusundvu.+
14 Ema-Israyeli aba ngephansi kwa-Egloni inkhosi yakaMowabi iminyaka lengu-18.+
15 Ngemuva kwaloko acela lusito kuJehova,+ ngako Jehova wawaniketa umsindzisi,+ lobekungu-Ehudi+ indvodzana yaGera wesive sakaBhenjamini,+ lobekalencele.+ Ngekuhamba kwesikhatsi ema-Israyeli amtfuma kutsi ayomikisa sipho lebesifunwa ngu-Egloni inkhosi yakaMowabi.
16 Ngaleso sikhatsi Ehudi watentela inkemba lesika nhlangotsi totimbili, lebeyingaba ngemasentimitha langu-38* budze. Wabese uyibophela ngephansi kwengubo yakhe engculwini yangesekudla.
17 Ngemuva kwaloko wetfula lesipho ku-Egloni inkhosi yakaMowabi. Egloni lona abeyindvodza lekhuluphele kakhulu.
18 Ngesikhatsi Ehudi acedza kwetfula lesipho, wahambisa labantfu lebebafike naso.
19 Kodvwa ngemuva kwekutsi sekafike etithicweni letibatiwe* lebetiseGilgali,+ wajika wabuyela enkhosini. Wafike watsi: “Nkhosi, kunemlayeto loyimfihlo lengikuphatsele wona.” Ngako inkhosi yatsi: “Ase nithule!” Nativa loko, tonkhe tinceku tayo taphuma.
20 Ehudi wasondzela enkhosini njengobe beyihleti yodvwa ekamelweni layo lelipholile lelisetulu. Wabese utsi: “Ngikuphatsele umlayeto lovela kuNkulunkulu.” Ngako inkhosi yasukuma esihlalweni sayo sebukhosi.*
21 Ngemuva kwaloko Ehudi wahoshula lenkemba lebeyisengculwini yakhe yangesekudla ngesandla sakhe sangesencele, wagwaza lenkhosi esiswini.
22 Lenkemba yangena yonkhe nesibambo sayo, futsi emanoni ayimbonya, ngobe akazange ayikhiphe esiswini salenkhosi futsi kwase kuphuma nemangcoliso.
23 Ehudi waphumela ngephandle,* wavala iminyango yalelikamelo lelisetulu futsi wayikhiya.
24 Watsi nasekaphumile, letinceku tenkhosi tabuya takhandza iminyango yalelikamelo lelisetulu ikhiyiwe. Ngako tatsi: “Mhlawumbe inkhosi iyatikhulula* ekamelweni lelipholile lelingekhatsi.”
25 Tachubeka timile taze tadliwa ngemahloni, futsi tatsi natibona kutsi inkhosi beyisolo ingayivuli iminyango yalelikamelo lelisetulu, tatsatsa sikhiya tayivula. Tabona inkhosi yato iwele phansi,* ifile!
26 Ehudi wabaleka ngalesikhatsi tisemile, futsi wendlula ngasetithicweni letibatiwe,*+ wefika aphephile eSeyira.
27 Nakefika lapho, washaya luphondvo+ esifundzeni lesinetintsaba saka-Efrayimu.+ Ema-Israyeli ehla esuka kulesifundza lesinetintsaba, futsi yena abewahola.
28 Wabese utsi kuwo: “Ngilandzeleni, ngobe Jehova sewunikele bakaMowabi labatitsa tenu esandleni senu.” Ngako ema-Israyeli amlandzela futsi atsatsa ematubuko aseJordane kuze alwe nebakaMowabi. Awavumelanga muntfu kutsi ewele.
29 Ngaleso sikhatsi, abulala emadvodza akaMowabi+ labengaba ngu-10 000, onkhe lamadvodza abenemandla futsi angemachawe. Kute ngisho nayinye leyakhona kubaleka.+
30 Ngako ngalelolanga, ema-Israyeli abancoba bantfu bakaMowabi. Lelive laphumula* iminyaka lengu-80.+
31 Ngemuva kwa-Ehudi kwalandzela Shamgari+ indvodzana ya-Anathi, lowabulala emadvodza langemaFilisti+ langu-600 ngendvuku lecijile yekugalela tinkhomo.+ Naye wasindzisa ema-Israyeli.
Imibhalo lengentansi
^ Nobe “esangweni laseHamathi.”
^ Fundza Tinchazelo Temagama.
^ NgesiHebheru kutsi, “yase-Aramu-naharayimu.”
^ NgesiHebheru kutsi, “yase-Aramu.”
^ Nobe “kuthula.”
^ NgesiHebheru kutsi, “likhyubhitha.” Kungenteka leli likhyubhitha lelincane. Fundza Sandzisanchazo B14.
^ Kungaphindze kubekwe ngekutsi, “emigodzini lekumbiwa kuyo ematje ekwakha.”
^ Nobe “esitulweni sayo.”
^ Kungaphindze kubekwe ngekutsi, “waphuma ngembobo yekungenisa umoya.”
^ NgesiHebheru kutsi, “imbonye tinyawo tayo.”
^ NgesiHebheru kutsi, “emhlabeni.”
^ Kungaphindze kubekwe ngekutsi, “ngasemigodzini lokumbiwa kuyo ematje ekwakha.”
^ Nobe “kuthula.”
