Tikhulu 2:1-23
2 Ngemuva kwaloko ingilosi yaJehova+ yesuka eGilgali+ yakhuphukela eBhokhimu yase itsi: “Nganikhipha eGibhithe nganiletsa eveni lengafunga ngalo kubokhokho benu.+ Ngetulu kwaloko ngatsi: ‘Angeke ngize ngisephule sivumelwane lengisente nani.+
2 Nine akukafaneli nente sivumelwane nebantfu bakulelive+ futsi nibobhidlita ema-al’thare abo.’+ Kodvwa-ke anikalilaleli livi lami.+ Nikwenteleni loko?
3 Kungako ngibese ngitsi: ‘Angeke ngiticoshe letive embikwenu+ futsi titawuba lugibe kini,+ nabonkulunkulu bato batanikhweshisa kimi.’”+
4 Kwatsi lapho ingilosi yaJehova ikhuluma lamavi kuwo onkhe ema-Israyeli, labantfu bakhala kakhulu.
5 Ngako lendzawo bayibita ngekutsi yiBhokhimu* futsi bentela Jehova umhlatjelo lapho.
6 Ngesikhatsi Joshuwa akhulula labantfu kutsi bahambe, onkhe ema-Israyeli aya endzaweni lelifa lawo kuze atsatse lelive libe ngelawo.+
7 Labantfu bachubeka bakhonta Jehova onkhe emalanga ekuphila kwaJoshuwa nakuwo onkhe emalanga ekuphila kwemadvodza lamadzala lachubeka aphila ngemuva kwaJoshuwa, futsi labekatibone tonkhe tintfo letimangalisako Jehova labekatentele ema-Israyeli.+
8 Joshuwa indvodzana yaNuni, lebekayinceku yaJehova, wafa aneminyaka lengu-110 budzala.+
9 Ngako bamngcwaba endzaweni lelifa lakhe leseThimnathi-heresi,+ esifundzeni setintsaba saka-Efrayimu, lesisenyakatfo neNtsaba iGashi.+
10 Sonkhe leso situkulwane safa njengabo bonkhe bantfu baso,* kwabese kuba nalesinye situkulwane lesavela ngemuva kwaso lebesingamati Jehova nobe loko labekwentele ema-Israyeli.
11 Ngako ema-Israyeli enta lokubi emehlweni aJehova futsi akhonta boBhali.+
12 Amshiya Jehova, longuNkulunkulu wabokhokho bawo, lobekawakhiphe eGibhithe.+ Alandzela labanye bonkulunkulu,+ lokwakubonkulunkulu bebantfu lebebawatungeletile futsi abakhotsamela, atfukutselisa Jehova.+
13 Amshiya Jehova, akhonta Bhali kanye netithico ta-Ashtarothe.+
14 Intfukutselo yaJehova yawavutsela ema-Israyeli, ngako wawanikela kubantfu labawemuka tintfo tawo.+ Wawanikela etandleni tetitsa lebetiwatungeletile+ futsi awazange aphindze akhone kumelana nato.+
15 Nobe ngukuphi lapho bekaya khona, sandla saJehova besimelana nawo, siwaletsela inhlekelele+ njengobe Jehova bekashito nanjengobe nje Jehova bekafungile kuwo.+ Ema-Israyeli abecindzeteleke kakhulu.+
16 Ngako Jehova abewanika tikhulu kuze bawakhulule esandleni salabo bebawemuka tintfo tawo.+
17 Kodvwa ema-Israyeli ala ngisho nekulalela letikhulu futsi abegwadla nalabanye bonkulunkulu aphindze abakhotsamele. Ngekushesha ayishiya indlela yabokhokho bawo, lebebalalele imitsetfo yaJehova.+ Kepha wona ehluleka kwenta njalo.
18 Ngaso sonkhe sikhatsi Jehova nakawanika tikhulu,+ Jehova bekaba naleso sikhulu futsi asindzise ema-Israyeli etitseni tawo kuwo onkhe emalanga ekuphila aleso sikhulu, ngobe Jehova bekawavela*+ ema-Israyeli nawakhala ngenca yalabo lebebawacindzetela nalabo lebebawaphatsa kabi.+
19 Kodvwa bekutsi nakufa leso sikhulu, ema-Israyeli aphindze atiphatse ngekukhohlakala kwendlula bokhokho bawo ngekutsi alandzele labanye bonkulunkulu, abakhonte futsi abakhotsamele.+ Awazange ayiyekele imikhuba yawo kanye nenkhani yawo.
20 Ekugcineni intfukutselo yaJehova yawavutsela ema-Israyeli,+ wase utsi: “Ngenca yekutsi lesive sisephulile sivumelwane+ lengasenta nabokhokho baso futsi sangangilaleli,+
21 nami angeke ngize ngicoshe ngisho nasinye sive embikwaso kuleto Joshuwa latishiya nakafa.+
22 Lena kutawuba yindlela yekuvivinya ema-Israyeli kuze kubonakale kutsi atayigcina yini indlela yaJehova+ ngekuhamba kuyo njengobe kwenta bokhokho bawo.”
23 Ngako Jehova wavumela letive kutsi tichubeke tikhona. Akazange aticoshe ngekushesha futsi akazange atinikele esandleni saJoshuwa.
Imibhalo lengentansi
^ Lokusho kutsi “Bantfu labakhalako.”
^ NgesiHebheru kutsi, “sabutselwa kubantfu bakuso.”
^ Nobe “bekatisola.”
